Riahken Uga Itna
Ogen : 1 Timotius 6: 6-8
Tema : Riahken Uga itna
Tujun : Gelah Saitun:
- Ngasup ngataken bujur kai si lit i bas ia baik i bas keadan mbue ntah sitik.
- Ngasup makeken bekas pemere Dibata alu meriah ukur.
Metode: Diskusi
1 Timotius 6: 6 – 8
6:6 Memang ibadah itu kalau disertai rasa cukup, memberi keuntungan besar. 6:7 Sebab kita tidak membawa sesuatu apa ke dalam dunia dan kitapun tidak dapat membawa apa-apa ke luar. 6:8 Asal ada makanan dan pakaian, cukuplah.
I. BENA KATA
Kita si nggit ras hobby rende tentu siinget ras pernah si endeken lagu “Bentan – Bentan.” Pedah ras persinget bas ende – enden enda seh kal ulina ras jilena. Kata – kata bas refreinna nina:
E iah cirem-cirem siang ayota Odakken odak odakta ota
E iah cirem-cirem siang ayota Odakken odak odakta ota
Lagu enda ngajuk ras ndilo kita gelah ermeriah ukur. Ermeriah ukur bas kerina kecibal geluhta. Kata Dibata ras tema PA Saitunta pe nuruh kita ermeriah ukur. Ermeriah ukur gia nggeluh biasa ras sederhana (keugaharian). la kita dekahen berjut asangken meriah. Sebalikna, buenlah kita ermeriah ukur. Adi banci tetaplah ras teruslah kita ermeriah ukur. Uga kita ermeriah ukur; ras bas kai kita ermeriah ukur? Mari si siksiki arah Kata Dibata si jadi ogenta.
II. MPEBAGESI OGEN
Rasul Paulus si nulisken surat enda mereken kata ajar ras pedah man serayan Dibata si nguda denga si tergelar Timotius. Timotius e anak pertendin (rohani) rasul Paulus. Iidah rasul Paulus maka lit guru – guru ras pengajaren si papak si banci jadi la iidah Timotius. Guru – guru ras pengajar si papak enda la sue ras pengajaren kiniteken si payo si iajarken rasul Paulus ras rasul – rasul si debanna. Guru – guru palsu ras pengajaren si papak enda mabai kalak ndauh ras nilah bas Kata Dibata si payo nari. Pengajaren si papak enda ipeseh ras ielaken alu halus ras menarik, si erbahanca kalak papak alu la si sedarina. Emaka Paulus mpesehsa dingen ngajarkenca man Timotius. Lit 3 ciri si ituriken Paulus si lit bas pengajaren si papak enda, eme:
Pemena, ajarenna ndempar bas pengajaren rasul-rasul nari.
Peduaken, ngajarken ras mabai perpulungen ku bas perjengilen. cian ate, perubaten, perpecahen, cekurak ras sisangka – sangkan si la mehuli.
Peteluken, arah pengajarenna ia ndarami duit / kinibayaken.
Pengajaren si papak enda makeken pelayanen ras pengajarenna guna encari ras mpepulung erta kinibayaken. Kata Dibata ras pelayanen ikomersilkenna guna pribadina jine.
Paulus ngajarken maka agama si tuhu – tuhu dingen payo eme si ngajarken pengikutna gelah puas akapna erkiteken kai si lit i bas ia (ayat 6). Labo puas erkiteken erta kinibayaken doni, tapi erkiteken isi kiniteken si iajarken i bassa. Kalak si tek puas akapna erkiteken kai si lit i bas ia aminna sitik ngenca, ntah biasa – biasa ngenca geluhna. Labo kap lit si baba tupung kita tubuh. Janah labo ka kai pe pagi sibaba tupung kita mate / nadingken doni enda. Kerina pagi itadingken. Paulus ngajarken nggeluh sederhana saja, labo erlebihen ntah pe rula-ula. Tole Paulus ngajarken gelah Timotius merasa cukup kune nggo tersehi keperlun sewari – wari eme pangan ras paken (ayat 7-8). La berarti bahwa kalak si tek salah ras erdosa adi nggeluh bas standar kegeluhen si menengah ku datas. Siitekanken Paulus kal e me uga Timotius ras kalak si tek banci erpuas ate. Erpuas ate labo erkiteken kiniliten ntah barang-barang doni. Keriahen ras kepuasen kalak si tek erkiteken hubungenna ras kerembakenna ras Kristus. Keriahen ras kepuasen kalak si patuh mbaboi erta, barang doni si lit, ras fokus ia kerna si tetap dingen tahan rasa lalap.
III. PENGKENAINA
Nina sada kata pentar, “Ulin 1 perik i bas tanta asangken 10 perik bas peren.” Ertina, ulin kai si nggo lit bas kita asangken kai si lenga ras la lit. Mbue dingen melala gia tapi adi labo i bas tanta, labo sekerajangenta me labo lit gunana si mbue e. Sada ntah sitik pe gia tapi nggo jadi sekerajangenta eme si kata tuhu. Ola kari ban menggana ateta man simbue piah lupa kita si nggo bas tanta jenari ban lupa kita njemaksa piah si sada ndai pe pulah dingen kabang. Emaka mari riahken kai si lit bas kita. Bagi nina tema: “Riahken Uga Litna.” Ndauh riahen kai si lit bas kita asangken kai si la lit bas kita apai ka sekerajangen kalak. Kai kin si nggo lit bas kita? Si nggo lit bas kita eme: umur nggedang ras pengalamen kegeluhen ras erkiniteken. Jenari anak, kempu, deba erente ras entah. Erta, kinibayaken gia la melala nggo lit bas kita. Ola lupa kita ermeriah ukur kerna si e. Ngataken bujurlah ras ermeriah ukurlah kerna kai si nggo lit ibereken Dibata man banta. Uga gia litna bas kita marilah si riahken. Ola kita erbanding – banding. Ola ninta, “Anakku, kelaku, permenku, kempuku la bagi anak / kela / permen ras kempu kalak. Ertaku la bagi erta kalak mbuena. Ola si pergogoi ras si tangisi kai si la lit bas kita tapi riahkenlah kai si lit bas kita. Kai si lit bas kita banci jadi la lit bas kalak si deban. Kai si la lit bas kalak, bas kita lit ibereken Dibata. Si lit bas kita e erguna man kalak si la lit bas ia, bagepe kebalikenna. Nggeluh enda saling ngelengkapi sada ras si debanna. Ola kita bagi kerbo Penampen, tarun – tarun natap piah lupa nggagat erbahanca daging kertang. Erkiteken ndekahsa ngehenen kalak, kiniliten ras sekerajangen kalak, piah lupa si lit bas ia. Si lit i bas ia pe si tuhuna nggo mehuli ras banci mereken keriahen dingen kemalemen ate. Tapi erkiteken ndekahsa natap ras ermengga ate nangdangi kiniliten kalak, piah bene keriahen si lit i bas ia. Pindolah man Dibata gelah ipengasupna kita ngataken bujur kerna kai si lit I bas kita subuk mbue ntah sitik si lit bas kita. Ingetlah, kalak si ngasup ngataken bujur nge si ermalem ate bas geluhna. Kalak Kristen si tuhu dingen payo eme kalak si ngataken bujur man Dibata i bas si kugapana pe. Eme si ngena ate Tuhan guna silakoken (bdk. 1 Tesalonika 5: 18). Kalak si ngataken bujur nge si tuhuna kalak bayak. Tetap kita ngasup ngataken bujur man Dibata aminna sitik gia lit bas kita. Kalak si ngataken bujur eme kalak si nggo ngasup ngaloken kegeluhenna uga litna. Sebalikna kalak bayak si la ngasup ngataken bujur kalak musil kap. Jenari tentu la terjeng ngataken bujur ngenca, tapi pe ngasup kita makeken bekas pemere Dibata e alu meriah ukur. Ingetlah maka kiniliten si ibereken Dibata labo guna dirita saja tapi pe guna perpulungen, teman ras ras sekelewetta. Emaka meriah pe ukurta mere ras berbagi sada ras si debanna. Kinilitenku e gunandu; kinilitendu e gunaku ras gunata
IV. PERTOTON
Bujur Tuhan sabab nggo kap iberekenNdu kiniliten man bangku. Nggo kami ngalo bas Kam nari Bapa. Pengasup dage kami alu KesahNdu ngidah kai si nggo iberekenNdu. Jenari pengasup kami ermeriah ukur kai si lit bas kami, ngeriahken uga litna kegeluhen ras kecibal kami. Lanai kami erbanding – banding ras kalak si deban. Ngataken bujur kami jenari pakeken kami pemereNdu guna pelayanen alu meriah ukur. Amin.
V. DISKUSI/ SHARING
a. Turiken apai buen ras dekahen kita ermeriah ukur asangken gulut ukur!
b. Kai akibatna adi la kita ngasup ermeriah ukur ras ngataken bujur? Janah kai sibahan kita gelah ngasup ermeriah ukur?
VI. USULEN LAGU
- KEE No. 192: 1, 2.
- KEE No. 313: 1, 2.
- KEE No. 293: 1, 2.
- KEE No. 257: 1, 2
- KEE No. 199: 1, 3.
Pdt. Juris Tarigan, M.Th (GBKP RG Bogor)
(Hp/ Wa: 081316879945)
MEMINTA ITU ENAK
MEMBERI ITU SUSAH
Tiap hari manusia meminta kepada Tuhan
Tapi LUPA MEMBERI