NGENA ATE DIBATA DINGEN IERGAKEN MANUSIA

(Erguna Ersaksi I Bas Budaya Karo)

Roma 14: 13 – 18

14:13 Karena itu janganlah kita saling menghakimi lagi! Tetapi lebih baik kamu menganut pandangan ini: Jangan kita membuat saudara kita jatuh atau tersandung!

14:14 Aku tahu dan yakin dalam Tuhan Yesus, bahwa tidak ada sesuatu yang najis dari dirinya sendiri. Hanya bagi orang yang beranggapan, bahwa sesuatu adalah najis, bagi orang itulah sesuatu itu najis.

14:15 Sebab jika engkau menyakiti hati saudaramu oleh karena sesuatu yang engkau makan, maka engkau tidak hidup lagi menurut tuntutan kasih. Janganlah engkau membinasakan saudaramu oleh karena makananmu, karena Kristus telah mati untuk dia.

14:16 Apa yang baik, yang kamu miliki, janganlah kamu biarkan difitnah.

14:17 Sebab Kerajaan Allah bukanlah soal makanan dan minuman, tetapi soal kebenaran, damai sejahtera dan sukacita oleh Roh Kudus.

14:18 Karena barangsiapa melayani Kristus dengan cara ini, ia berkenan pada Allah dan dihormati oleh manusia.

A. PERSIKAPEN

B. PERPULUNGEN JABU-JABU

1. Rende KEE 215: 1 (ibabai Nande)
Lias ate ni Tuhanta, e lalap man pujin
Ras pe kebenarenNa, pebelinlah madin
Kueteh peratenNa ras dosa labo singgur
Nggo tetap jujurenNa si labo banci luntur
E desken batu mamak, enteguh labo mugur
Bagem kepeken Kam, nggo tetap i bas bujur

2. Ertoto (ibabai Bapa)

3. Ngoge kata Dibata
Teks : Roma 14: 13 – 18 (iogeken Anak)
Tema : Ngena Ate Dibata Dingen Iergaken Manusia

Lit dua pelajaren man banta arah pengogen ayat 13-16, e me cara nggeluh kalak si enggo erkiniteken man Tuhan Jesus. Pemena, la lit hakta ngadili kalak si deban, sabap kalak si deban labo ertanggungjabap man banta, bage ka pe kita man bana. Ise pe kalak si deban e ras kai pe si ibahanna arus ipertanggungjababkenna man tuanna, labo man banta. Kune banci ras ngasup kita nampati ia i bas sada dahin, em si mehulina, tapi kita labo erkuasa i bas kiniteken kalak si deban. Peduaken, pangen me kita ngadili (niksiki) dirinta jine, kai si arus si urus guna dirinta, ras si e enggo mehuli ras cukup man banta (bdk. Gal. 6: 4), sekalak-sekalak arus nguji lagu langkahna jine, nggit ras pang mpertanggungjababken perbahanenna jine. Si enda lah min si ndemi perukurenta. Kalak si niksiki bana ras mpeteruk ukurna labo nggit ngadili ras nalahken seninana si sada kiniteken.

Orat nggeluh kalak Kristen e me patuh nandangi kuasa Dibata alu bersih pusuh perukuren. Si jadi perayaken e me pantek kinirajan Dibata i doni enda (ay. 17-18). Pemena, Kinirajan Dibata labo soal pangan ras inemen, pantang entah lang man pangan si enda entah si ah. Sabab aturen kerna pangan ras inemen e me cara-cara pembersihen nge ngenca i bas paksa si nai, aturen si arah darat seh ku bas paksa ipelimbarui Dibata kerina si nasa lit (Heb. 9: 10). Peduaken, kalak si ringan i bas kinirajan Dibata e teridah perbahanen si mehuli (Indo. kebenaran), kemalemen ate (Indo. damai sejahtera), ras keriahen (sukacita) si ibereken Kesah Si Badia.

Perbahanen si mehuli si perlu ilakoken kalak si ringan i bas kinirajan Dibata e me:
• Nandangi Dibata, kita enggo ipetunggung iadepen-Na, ibenarken alu kuasa kematen/pengorbanen Kristus i kayu persilang.
• Nandangi seninanta, si pentingna kal e me kemalemen ate, nggeluh i bas dame ras dem kekelengen, sisampat-sampaten, nggeluh dame ras kerina manusia. Sabab Kristus reh ku doni enda maba kemalemen ate (damai sejahtera).
• Nandangi dirinta, keriahen si ibereken Kesah Si Badia i bas pusuh kalak si tek. Kalak si enggo ibenarken ngelakoken kinibujuren, i bas kinibujuren lit kedamen ras ketenengen rasa lalap (Jes. 32:17).

Kai kin si ngena ate Dibata i bas kegeluhenta? E me kap ngkelengi Dibata asa gegeh ras ukurta lit ras ngkelengi teman manusia bagi dirinta jine. Ngkelengi Dibata alu patuh ras setia ngikutken kataNa ras ngkelengi temanta manusia alu kiniulin (gegeh ras pemeteh) si lit i bas kita. Sukat-sukat geluh manusia meherga ras iergaken, perlebe labo arah erta ras jabatenna, tapi alu kiniteken ras kiniulin si teridah ras tergejap arah kegeluhenna si teptep wari.

Sendalanen ras bahan oratenta rikut kawitenna ku bas tema PJJ-nta wari sendah, maka lit akap kami pe kawitenna ku bas pedah-pedah orang tuanta si arah lebe, jadi curak/dalan ngergaken kegeluhenta kalak Karo si enggo jadi pengikut Kristus, e me:
• Ula belasken kata la tuhu, kata tengteng banci turiken
• Ula kekurangen kalak ngenda si pandangi, kekurangentalah lebe pepayo
• Ula tabehen siakap mandangi kalak, pandangilah lebe man banta jine
• Ula min teman usur si juruken adi man banta pe lenga lit man usihen
• Adi kin ate nampati man teman, babalah pijerpodi man manusia (Pijerpodi e senuan senuan si mejile: page, kapas, rudang si mejile ras si debanna)
• Ula min kita pejenggi-jenggiken, kalak lah min mujikenca
• Ula min ban usur ranan siagaken, madinlah ngerana bagi si nungkir buluh sengawan
• Ula min pergeluhta bagi percebuni belkih, takalna ceburkenna ku paya, ikur ndarat teridah
• Madin me kita nggeluh bagi surat ukat, rendi enta gelah ula rubat
• Belinen untungna siapul-apulen, asangken sijuru-jurun (sigelar-gelaren)
I bas iketen budaya rakut si telu, si e pe enggo jadi kesemalen i bas orat nggeluh kalak Karo, nai nari asum ndauh denga kekristenen ndahi kegeluhenta. Kesemalen orat nggeluh enda labo petembil ras kinitekenta, bagi tersena arah ndung-ndungen si teruh enda;
• Mehamat man kalimbubu bage kepe adatna tuhu. Arus kap kita nggeluh erlagu, ola bagi jelma la erluhu. Jumpa sangap me kita tentu, kerina gelah jadi sempabu.
• Di ersenina arus metenget, sangkut ukur minter tersinget, natap kecibal arus megermet, cakap la payo ola ni inget, bas la teng-teng ola mesimet, persada arih ola metahat, kerna si kitik ola sempat rubat.
• Man anak beru kita metami, mindo ia ola simbaki, bas dahinna ola pandangi, kune salah minter embari, si la teng-teng minter iajari, dahi lakonna ola tanggungi.

4. Diskusi
‒ Rikutken bahan PJJ-nta Roma 14:13-18, uga nge si mehulina silakoken tandana kita tuhu-tuhu ngergaken temanta sada kiniteken?
‒ Turiken pengalamenta (2-3 kalak) i bas ngelakoken perbahanen si mehuli nandangi sangkep geluhta; kemalemen ate ras keriahen si uga nge igejapken keluarganta bage pe kita si ngelakokenca? Turikenlah!

5. Persembahen: Rende KEE No. 450: 1-2

Endesken kami man baNdu, sada bagin pemereNdu
Persembahen kami baNdu, gelah ialokenNdu
Pasu-pasuNdu min gelah, si tading i bas kami
AjariNdu dage kami, m’re persembahen baNdu

Si pepulung persembahen, si endesken e man Tuhan

Asa gegeh kengasupen, mari si persembahken
Pasu-pasuNdu min gelah, si tading i bas kami
AjariNdu dage kami, m’re persembahen baNdu

6. Pertoton Persembahen ras Sapaat
‒ Perpulungen encidahken orat nggeluh kekristenen man sangkep nggeluh ras sekelewetna (Bapa)
‒ Perpulungen tetap ngenanami keriahen, kedamen ras kemalemen ate i bas geluhna si teptep wari (nande)
‒ Kerna persembahen ras si turah i bas perpulungen (sekalak serayan)
‒ Pertoton Tuhan

7. Momo

Pdt. Amos R. Ginting, S.Th., M.Sn
HP/WA: 082161494067