Tanggal 14 Juli 2024- 20 Juli 2024
Tantangan Hidup Saitun
Ogen : Kolose 3: 12-17
Tema : DAME KEL PUSUHKU
Tujun : Gelah Saitun:
1) Ngantusi kerna nggeluh i bas kegeluhen si mbaru
2) Ncidahken ulih kalak si nggeluh i bas kegeluhen si mbaru
Metode : Sharing
I. BENA KATA
Hampir kerina kalak senang adi ngaloken barang si mbaru. Umpamana, baju si mbaru alu model si mbaruna kel, enggo pasti senang ukurta dikenca tukurken anakta baju mbaru man banta. Sepatu si mbaru alu merek terkenal, e enggo pasti sekalak perbapan senang ngalokenca. Sekalak remaja senang ukurna sebab ialokenna Hp si mbaru. Bage ka pe danak – danak senang ukurna adi ialokenna main – mainen si mbaru. Tapi kenca enggo ndekah sipake barang – barang ndai, enggo la nai mbaru, enggo male, enggo bosan kita makesa, enggo ceda, enggo la nai siat, rsd. Biasana kerina barang si enggo male ras enggo lanai sipake ndai siambekken, situkur ka si mbaru. Bage kap seterusna si terjadi i bas geluhta si tep – tep wari.
I bas kesempaten enda radu ras kita erlajar kerna kegeluhen si mbaru i bas Kristus. Kegeluhen si mbaru i bas Kristus labo seri ras barang – barang si lit i bas doni enda. Janah kegeluhen si mbaru i bas Kristus maba dame i bas kegeluhenta si tep – tep wari
II. MPEBAGESI OGEN
Kolose eme sada kuta i Asia kitik arah matawari pultak i Epesus. Perpulungen Kolose, si umumna kalak non-Yahudi, ipanteki Epafras rekan sekerja Rasul Paulus. Epafras ras Paulus pernah radu ras ipenjara i bas sada ingan (bdk. Plm. 23: 24). Surat Rasul Paulus man Perp. Kolose pe erkiteken lit je peran Epafras (bdk. Kol. 1: 7-8). Amin pe labo Paulus si manteki perpulungen e, tapi rutang pusuhna erkiteken ieteh Paulus lit guru – guru perguak si nehken pengajaren si papak.
Judul perikopta secara keseluruhen bindu 3: 5- 17 eme “Kegeluhen si male ras kegeluhen si mbaru” (terj. TB-LAI “Manusia Baru”). Secara umum situasi si terjadi i bas Perp. Kolose, lit ajaren-ajaren sesat si erbahanca piga – piga perpulungen bimbang i bas kinitekenna man Yesus Kristus. Ajaren – ajaren si papak e mpengaruhi moralitas piga – piga perpulungen si bimbang ndai alu perbahanen – perbahanen si la mehuli. Situasi si bage rupana mpeturah keresahen i tengah – tengah perpulungen. Perbahanen – perbahanen si la mehuli e tangkas ijelasken Paulus i bas ay. 5 – 10. Arah suratna enda, Rasul Paulus mpetetap ukur perpulungen gelah tetap paguh erkiniteken man Yesus Kristus amin pe melala tantangen.
I bas bindu 3 enda pe tangkas kal kerna hal – hal praktis ras konkrit si arus ilakoken selaku kalak si enggo jadi sikerajangen Kristus. Bahkan Paulus ngatakenca, maka perpulungen e eme anak – anak Dibata, ikelengi ras ipilih Dibata jadi sikerajangenNa. Perpulungen siumumna kalak non Jahudi, eme anak – anak Dibata, sikerajangen Dibata labo erkiteken kehebaten ras kiniulin perpulungen enda, tapi perkuah ate Tuhan Jesus Kristus, sabab IA sienggo mereken keselamaten man doni enda, Selaku kalak si enggo iselamatken Kristus arus ertanggung jawab nggeluhken geluhna bagi si ngena ate Tuhan. Emaka i jenda melala Paulus ngerana labo hanya soal pengajaren (doktrin) tapi pe kerna etika Kristen, uga kearusen nggeluh sebage kalak si enggo jadi sikerajangen Kristus. Paulus tegas ngatakenca man Perp. Kolose maka arus bulat ukurna ndarami erta – erta i surga, labo ndarami perkara – perkara doni si banci meneken. I bas si e Paulus ngajuk perpulungen gelah tetap ukur na ula bimbang. Adi kalak si enggo ersada ras Kristus ia enggo i bas kegeluhen si mbaru (Hidup Baru). Emaka kegeluhen si male arus ibunuh (ay. 5), iambeken (ay.8) ras itangtangi (ay 9.).
Selanjutna Rasul Paulus erbahan anding – andingen (metafor) “paken si mbaru” si arus ipakeken sekalak si enggo ersada ras Kristus. Kegeluhen si mbaru i bas Kristus eme: ate perkuah, mehuli, rukur meteruk, lemah – lembut dingen saber (ay. 12), ola pergelut dingen sialem – alemen salah (ay. 13), sikeleng – kelengen (ay. 14, i bas bhs. Ind., nina “kasih, sebagai pengikat yang mempersatukan dan menyempurnakan”), dame si ibereken Kristus i bas pusuhndu min ngajari kam i bas erbahan keputusen – keputusen (ay. 15, i bas bhs. Ind, nina, “damai sejahtera Kristus memerintah dalam hatimu), Kata Dibata nggeluh i bas pusuh peraten, ngendeken puji – pujin man Dibata, lalap ngataken bujur (ay. 16), ras kai gia si ibahan, subuk i bas ngerana entah i bas perbahanen, bahanlah e i bas gelar Yesus Kristus (ay. 17). E kerina wujud konkrit paken si mbaru si arus ipakeken sekalak si enggo ersada ras Kristus.
III. PENGKENAINA
Kerina kalak si nggeluh denga i doni enda enggo pasti harus menghadapi tantangen. Mulai kin tubuh nari ku doni enda sekalak bayi enggo langsung ngadapi tantangen pertumbuhen, sakit pinakit, rsd.-na. Kenca enggo beranjak dewasa pe sekalak jelma pasti harus ngadapi erbage – bage tantangen arah bas bage pe arah darat nari. Tantangen – tantangen labo ngadi seh kita nadingken doni enda. Man banta si pulung i bas PA Saitun sendah pe banci radu ras sigejapken, tantangen kai saja si ialami kita sebage sekalak si enggo lanjut usia. Kitap Masmur ngatakenca maka: ‘…adi kami megegeh banci jadi seh waluh puluh tahun, tapi kesusahen e me ayam – ayam nggeluh.” (Mz 90: 10) Ertina, secara kesehaten, enggo mulai i nderpa pinakit, labo sada jenis ngenca tapi banci erbage – bage.. Pemegi ras pengidah enggo reh urak na, ras nggejapken kelungunen erkiteken anak – anak enggo lit kesibukenna masing – masing, keuangen pe lanai bagi si gel – gel, janah piga – piga anak – anak man sampaten denga.
Uga cara ngalakenca, gelah arah tantangen – tangtangen si lit, Saitun tetap dame pusuhna ras ngasup tetap ncidahken biak-biak simehuli la nambahi dosa. Sabab lit ka deba reh tambahna umur, tambah jungut – jungutna, mesera guna ngalemi, rukur negative, rsd. Kerina e banci ialaken adi tetap saitun nggeluh rembak ras Tuhan, mbangun hubungen si ndeher ras Tuhan. Alu kata sideban Usia boleh terus bertambah tapi pusuh ras pertendin la banci menua, arus tetap ipelimbarui wari lepas wari. Kai sibanci ilakoken Saitun?
- Tetap fit ras aktif. Olah raga si ringan ras tetap menjaga pola makan alu nutrisi si sehat.
- Tetap berkarya tanpa batas. Umur si enggo metua labo ngalangi Saitun terus berkarya, tetap semangat alu ngelakoken hal hal si isenangi; umpana nuan – nuan, ngasuhi ternak (manuk, itik, nurung), mbayu, nyulam, ngoge, ercatur, rsd.
- Mediate ras mereken usihen arah erbage pengalamen sienggo ialami Saitun, nandangi anak – anak, kempu, perpulungen Gereja (sesekali reh ku PA Moria, Mamre, Permata guna mereken motivasi).
- Sipentingna tetap erbahan hubungen si mejile, ras Tuhan rembak ras la, erbahan paksa teneng, ogeken / megiken renungen Kristen ras nde – nden rohani arah Youtube, ras arah erPA Saitun.
IV. PERTOTON
O Tuhan sampat tetap kani, aminna pe umur enggo meganjang tapi pusuh ras ukur kami tetap ipelimbaruiNdu wari lepas wari sierbahanca dame pusuh kami, amin gia mbue tantangen sialaken kami. I bas Tuhan Yesus Kristus ertoto kami, amin.
V. STUDI KASUS
Karo Layas la pernah erlayas ukurna, kerina pandangen bas ia. Kurang iakapna medahi anak – anakna ras permen / kela rikutken kempuna. Kurang iakapna jingkatna permenna i bas erkai pe, la bali ras ia, meletsa erkai pe. Kadang cikurakina ka permenna siberu ginting man permenna sintua siberu karo, perban la kin bekas pilihenna permenna e. Lalap ia jungut – jungut dikenca la bagi ukurna. Lit nge bas ia, sebab erta bulang Layas ndube seh kel buena itadingken man bana, tapi la ia melumbar mere. Dikenca lit panitia kai pe bas Gereja reh mindo donatur bas ia nari, cakapna enggo panjang lebar man Panitia pemerena Rp 100.000,- ngenca. Man kempuna pe kurang ia melumbar, ulang tahun kempuna sekali pe la pernah berena kado ulang tahun. Maka kerina kempuna pe kurang ndeher ras ia.
Penungkunen:
- Banci denga nge akapndu karo layas e ilayasi ukurna gelah dame pusuhna ras geluhna jadi pasu-pasu? Bagi nina kuan-kuan ngataken: “adi enggo metua mesera mperubahi sa”.
- Kai sibanci silakoken gelah terjadi perubahen i bas karo layas?
- Kai tekadndu gelah reh tuana umur, reh damena pusuh?
VI. USULAN LAGU:
- KEE No. 205: 1,5;
- KEE No. 320:1-2;
- KEE No. 445:1;
- KEE No. 381:1, 3
Pdt. Larena br. Sinuhadji