KekelengenNa Kap Kegeluhenku
3:16 Karena begitu besar kasih Allah akan dunia ini, sehingga Ia telah mengaruniaka Anak-Nya yang tunggal, supaya setiap orang yang percaya kepada-Nya tidak binasa, melainkan beroleh hidup yang kekal
3:17 Sebab Allah mengutus Anak-Nya ke dalam dunia bukan untuk menghakimi dunia, melainkan untuk menyelamatkannya oleh Dia.
3:18 Barangsiapa percaya kepada-Nya, ia tidak akan dihukum; barangsiapa tidak percaya, ia telah berada di bawah hukuman, sebab ia tidak percaya dalam nama Anak Tunggal Allah.
Ogen : Johanes 3: 16 -18
Tema : KekelengenNa kap Kegeluhenku
Tujun : Gelah Saitun:
- Meteh ras tetap nggejapken kekelengen Dibata si la ersibar
- Ngasup ngajarken ras ncidahken kekelengen nandangi teman manusia.
Metode : Sharing
I. BENA KATA
Kerina manusia meteh dingen ngangkai uga ulina adi nggeluh i bas kekelengen. Ulihna lit i bas keriahen, kemalemen ate, senang dingen dame pekepar, ras kerina pengkebet kiniulin si rulih i bas kekelengen e nari. Kalak si nggeluh i bas kekelengen, teridah jelmana la sombong, la meganjang ukur tapi mehuli dingen meteruk ukur ras lit i bas ia biak si mpehaga entah ngergaken kalak si deban. La lit i bas ia ngukurken keperlun dirina saja ngenca, tapi keperlun kalak pe rusaha ia gelah banci tersampat (bd I Kor 13: 4-7).
Kekelengen la ncedai tapi nambari ras mpekena si la sikap. Alu bage kekelengen la terjeng ibelasken tapi teridah bekasna simpehuliken dingen ngerakut sada ras sidebanna si nggeluh i bas kekelengen e (oge Pil 2: 1,2; Kol 3: 14, 1Tes 4: 9). Bage min kearusen nggeluh sikerajangen Dibata, gelah banci tersehi sue bagi tema-nta sendah ‘Kekelengen Na kap kegeluhenku’
II. MPEBAGESI OGEN
Oratenta paksa enda ibenai arah percakapen bage pe pengajaren Jesus man Nikodemus, sekalak peminpin agama Jahudi i bas golongen Parisi nari. la reh njumpai Jesus i bas sada berngi, situhuna atena mpepayo engkai maka Jesus ngasup erbahan tanda-tanda sengget sededekah wari raya Paskah Jahudi i Jerusalem. Ikataken Nikodemus man jesus, “O Guru ieteh kami maka Kam me Guru si isuruh Dibata. Sabab ise pe labo ngasup erbahan tanda tanda sengget bagi sibahan Ndu e, adi la kin Dibata ras ia” (ay 1, 2). Kai si ikataken Nikodemus man Jesus e nuduhken maka langa bo ietehna ras itandaina ise kin Jesus e. Seakatan terjeng kemamangen ia arah perbahanen tanda – tanda sengget si ibahan Jesus ngenca. Ertina Nikodemus pe langa tek man Jesus Anak Dibata si isuruh Dibata reh ku doni. Bage pe langa ia tek man Dibata si nuruh AnakNa Jesus e si reh ku doni enda.
Pengajaren Jesus man Nikodemus arah oratenta (ay 16 – 18) mereken penegasen ras penekanen, maka arah perbahanen Jesus si idahna erbahan tanda – tanda sengget, nuduhken belinna keleng ate Dibata si mereken kegeluhen si tuhu – tuhu si la erkeri- kerin man kerina manusia. Keleng ate Dibata e dungna ipetangkas arah pengorbanen Jesus seh la mate i datas kayu persilang guna nebusi ras nelamatken doni i bas dosa ras kejahaten nari. Si iperbandingken Jesus ras nipe tembaga siibahan Musa nandangi bangsa Israel (ay 14) Kerinana e idahiken Jesus sue bagi si isura Dibata Bapa si nuruh AnakNa si Tonggal e nusur i Surga nari (ay 13) ku doni enda.
Arah pengajaren Jesus e NIkodemus arus tek man Jesus si enggo isuruh Dibata reh ku doni enda. Kerehen Anak Dibata ku doni nuduhken belinna keleng ate Dibata man manusia ras doni enda. Belinna keleng ate Dibata la ersibar nandangi kerina manusia rikut pe ras kerina golongen agama kalak Israel siapai pe. Erti belinna keleng ate Dibata si la ersibar e ngelebihi batas kengasupen perukuren manusia, si teridah arah pemere Dibata nandangi AnakNa si Tonggal guna nebusi manusia bage pe doni enda i bas dosa ras si jahat nari (bd Rom 5:8).
E maka penegasen Jesus tole man Nikodemus, kerehen Anak Dibata e labo guna nghakimi entah pe ngukum. I bas perdalinen geluh Israel megati ndatken pengukumen i bas Dibata nari erkiteken bangsa e la setia ras la tek man Dibata je nari isembahna dibata – dibata si deban. E maka nina Jesus ise si la tek man Anak Dibata la enggo kena ukumen. Tapi ise si tek man Anak Dibata e la ia iukum (ay 18)
III. PENGKENAINA
Nggeluh i bas keleng ate Dibata arus teridah arah pengkebet perbahanen geluh si tep tep wari, si erpalas ku bas kiniteken si paguh dingen tetap setia nggeluh erkemalangen man Tuhan. Sikap nggeluh i bas keleng ate Dibata la erbatas entah la erbide terjeng si ban man ateta ngena ras si meriah ras kita. Pengajaren ras pendalanken biak nggeluh i bas kekelengen enggo ijujurken ras sehken Dibata man banta si tek baNa arah pengorbanen Kristus. E maka biak nggeluh i bas kekelengen banci saja megati ngalaken sikap pengorbanen. Sabab pengorbanen e me tempas kekelengen kap. Ertina labo si perkiraken kai si enggo sibahan, bicara gia lit kinirugin secara manusia. Sabab bage me erti kekelengen si la ersibar e si ngelebihi kengasupen perukurenta, si jadi kegeluhenta perbahan iantusi arah perbahanen Dibata si erkeleng ate arah AnakNa si enggo mereken geluh si la erkeri – kerin.
IV. PERTOTON
Terpuji Kam o Dibata kami si enggo mereken kekelengenNdu simbelin arah pengorbanen AnakNdu si Tonggal, gelah ngasup kami nggeluh dingen si ajar – ajaren i bas kekelengenNdu e nandangi sada ras sidebanna. I bas gelar Jesus Kristus, ertoto kami man baNdu.
Amin.
V. SHARING
Megati sibelasken, ‘aminna sukah merawa entah merambit ras jungut – jungut rusur, tapi jelmana perkeleng’. Mari si sharing (berbagi pengalaman) i bas pengangkan ntah pengakap si bage, lako mpepayo uga arusna kekelengen i bas sesekalak si mabai ku bas kegeluhen si tuhu – tuhu.
Dungi sharing-ta e alu ras-ras ngogeken surat 1 Petrus 4: 8.
VI. USULEN LAGU:
- KEE No. 177: 1, 2
- KEE No. 59: 1, 2
- KEE No. 77: 1, 4, 6
- KEE No. 1651 1, 2
- KEE No. 281: 1, 3
Pdt Merry Tatuwo br Kembaren, M.Th
0821 6679 5962