Ogen : Kejadin 24: 3-8; 67
Tema : Pengajaren Kerna Perjabun Si Payo.
Tujun : Gelah Mamre:
1) Meteh kerna sura-sura Abraham kerna Perjabun Ishak.
2) Nuriken pengajaren si payo man anak, kerna perjabun selaku Kalak Karo ras Kalak Kristen.
24:3 supaya aku mengambil sumpahmu demi TUHAN, Allah yang empunya langit dan yang empunya bumi, bahwa engkau tidak akan mengambil untuk anakku seorang isteri dari antara perempuan Kanaan yang di antaranya aku diam. 24:4 Tetapi engkau harus pergi ke negeriku dan kepada sanak saudaraku untuk mengambil seorang isteri bagi Ishak, anakku.” 24:5 Lalu berkatalah hambanya itu kepadanya: “Mungkin perempuan itu tidak suka mengikuti aku ke negeri ini; haruskah aku membawa anakmu itu kembali ke negeri dari mana tuanku keluar?” 24:6 Tetapi Abraham berkata kepadanya: “Awas, jangan kaubawa anakku itu kembali ke sana. 24:7 TUHAN, Allah yang empunya langit, yang telah memanggil aku dari rumah ayahku serta dari negeri sanak saudaraku, dan yang telah berfirman kepadaku, serta yang bersumpah kepadaku, demikian: kepada keturunanmulah akan Kuberikan negeri ini–Dialah juga akan mengutus malaikat-Nya berjalan di depanmu, sehingga engkau dapat mengambil seorang isteri dari sana untuk anakku. 24:8 Tetapi jika perempuan itu tidak mau mengikuti engkau, maka lepaslah engkau dari sumpahmu kepadaku ini; hanya saja, janganlah anakku itu kaubawa kembali ke sana.”
24:67 Lalu Ishak membawa Ribka ke dalam kemah Sara, ibunya, dan mengambil dia menjadi isterinya. Ishak mencintainya dan demikian ia dihiburkan setelah ibunya meninggal.
KATA PENARUH
Arah bahan PA-nta enda teridah maka Abraham tuhu-tuhu menghayati erti pendilo Dibata man bana: maka ia harus nadingken nande -bapana, keluargana ras kutana jenari lawes ia ku negeri si ituduhken Dibata man bana. Erjanji Dibata lako engkawali ia. Janah ia pagi jadi bangsa si mbelin, dingen arah keturunenna pagi ipasu-pasu Dibata kerina bangsa-bangsa i doni enda (Kej.12: 1-3). Ipasu-pasu i bas erti iselamatken. Sebab pengertin pasu-pasu/ berkat, e me: ndat kegeluhen si berkelanjuten, bahken seh ku kegeluhen si rasa lalap. Kebalikenna: sumpah/ kutuk: kegeluhen si peltep ntah pe hancur, la erketerusen. Contoh: isumpahi Tuhan Jesus batang ara, la ndekah ia jadi kerah, peltep geluhna (Mat.21: 19-20).
Abraham idilo i bas kutana nari ku negeri si ituduhken Dibata. La kin banci i kutana e saja Abraham ipake/ ipilih Dibata, janah arah kesusurenna pagi jadi bangsa si mbelin? Ertina kepe, ia harus iserapken jadi bangsa si khusus jadi sikerajangen Dibata, i bas ertin Bangsa Si Badia. (Pengertin badia ntah pe kudus, labo berarti la lit cacatna, la lit dosana, la lit kekurangenna, la bage. Tapi kai pe adi enggo iserapken ras ikhususken man Dibata, e me ikataken Badia). Bangsa Israel isemaiken Dibata i Mesir, kenca enggo enterem isuruh Dibata kalak e ibabai Musa ku Taneh Kanaan. Ipenuhi Dibata persyaraten gelah ia jadi sada bangsa: 1). Lit Tanah Airna: Tanah Kanaan. 2). Ibere Dibata Undang-Undangna, e me Taurat i deleng Sinai. 3). Ibere Dibata rakyat, e me kesusuren Abraham enda. 4). Ibere Dibata Pemerintah, pertama (Teokrasi) Hakim-Hakim, kedungenna maka jadi Kerajaan. Bage me bangsa enda iserapken jadi sada bangsa si badia.
URAIAN TEKS
Guna njaga kebadian e, bas zamanna lit 2 (dua) hal si itekanken Abraham man Elieser, janah isumpah pe ia alu namaken tanna ku kelang-kelang paha tuanna Abraham, maka si e harus idalankenna: Sipena, Elieser isumpah gelah ula ibuatna diberu kalak Kanaan jadi ndehara si Isak, tapi ilegina keturunen keluarga Abraham ku kuta asalna ndube. Si peduaken: La banci ibaba Elieser si Isak mulih ku asal kutana ndube, sebab enggo idilo Tuhan ia ras kesusurenna ku Taneh Perjanjin, lako jadi bangsa Dibata pagi. Alu njaga si 2 (dua) enda, la terjadi sinkritisme (percampuren agama), alu bage tetap terjaga maka bangsa e pagi tetap badia.
Lit kesangsin Elieser, sipemena, uga kari ia banci jumpa ras diberu e ras nandaisa, peduaken, adi enggo pe kari ia jumpa ras diberu e, tah la kari ia nggit berkat adi la ia ras Isak ngelegisa. Tapi bas si e, ipetetap Abraham ukur si Elieser, maka Dibata kari nampatisa bas si e. Janah adi ban si e nge kari maka diberu e la nggit berkat, Elieser enggo pulah i bas sumpah janjina nari. Janah si jadi penekanen, Isak la banci mulih ku negeri asalna.
I bas kesetian Abraham i bas pendilo Tuhan, rikut ras kedisiplinenna njaga kebadian geluhna ras isi jabuna bage pe kesusurenna, i je tangkas teridah penampati Dibata. Kerina perentah ras tugas si iberekenna man kawanna pe erdalan alu mehuli. Subuk Ribka, bage pe orangtuana, menahang ukurna guna nehken sura-sura Abraham, kerna perjabun anakna enda. Anak e pe singenan ia duana, malem atena ras terapul pe Isak, amin pe mbaru denga si Sara nandena ngadap ku Dibata. Tergejap pe maka ertendi iakap mulihi bas jabu e bas kehadiren si Ribka bas paksa e.
APLIKASI
Kita pe bas geluh si genduari salah sada si harus sicidahken sebagai kalak si erkiniteken (bangsa pilihen Tuhan) e me ndalanken perjabun si payo ras mehuli. Jabu-jabu kalak Kristen harus tutus I bas kiniteken, i bas erti: ula sembelah ngenca tutus, sebab adi bage termasuk sinkritisme (percampuren agama) bagi si ibiarken Abraham ndai. Apai ka adi duana la tutus, e enggo tuhu-tuhu salih kerina. Janah adi bage enggo mulihken ku bas kegeluhen si ndekah.
Bage pe bas proses ndalanken perjabun, mulai bas erteman-teman nari tah ijodohken, harus mehuli perdalanenna. Proses perjabun e harus icakapken bas peradaten, ibenai alu maba belo selambar ras muduni; berikutna ipasu-pasu bas gereja, nganting manuk ras terus ku mata kerja, enda uruten si mehuli. Janah i bas proses enda pe tentu iperdiateken ngenda kelayaken perjabun enda dari segi pertuturen i bas kalak Karo, gelah ula jadi perjabun si sumbang ntah pe la arus.
Memang labo maka harus rimpal kita maka kita banci erjabu, sebab lit nge batasen antara perjabun si sumbang ras perjabun si banci iranaken. E maka jenis Kerja (Pesta) Perjabun bas Kalak Karo, lit nge 3 (telu) erbage, janah apai pe banci idalanken dingen sah. 1). Kerja Erdemu Bayu: enda Kerja Perjabun kalak si jumpa impal. 2). Kerja Ngeranaken: Kerja Perjabun kalak si situhuna la arus, umpamana: buatna turang impalna, mamina, tah sipemeren ia tah la gia ndehersa; banci ia erjabu tapi irananken lebe. 3). Kerja Petuturken: kalak si erjabu lenga sitandan sebelumna, tentu banci ia erjabu, ertutur lebe kerina sebab lenga sitandan rikut ras sangkep nggeluh kerina.
Jadi, maka lit pe perjabun si sumbang, e me perjabun si semerga, ntah pe la arus rikutken peraturen adat bas kita Kalak Karo. Selain semerga, pe umpamana kalak si sepemeren, tah turang impal, janah sada dareh denga, e sumbang. Adi si bage biasana jadi erkiteken si erdalan e maba ukurna saja, ntah pe kawin lari, lawes ia ku ingan si la ia itandai kalak, je ibenakenna perjabunna, alu la isahken adat ntah pe ipasu-pasu gereja. E maka labo lit ipedalan utang adat man kalimbubu erkelang-kelangken pemerintah (la lit pedalan emas arah raja), la icampuri agama, tentu pemerintah pe labo iakuina, janah la icatatken ku cataten sipil pe. Bage me manjar-anjar iikutina kegiaten masyarakat enda alu nampilken bana, tentu kedungenna dat beligan ka nge ia i bas jelma si nterem. Amin pe labo banci lang lit nge rusur kesuliten sitik-sitik bas kegeluhen. Si enda banci jadi e me erkiteken orang tua la mperdiateken pergaulen anakna, bage pe sangkep nggeluh rikut pe ras masyarakat lanai mediate nandangi kegeluhen ras pergaulen anak-anakta bas geluh siteptep wari, maka banci sibage banci terjadi. Je me penting kita mamre berperan i ban mendidik ras mperdiateken kegeluhen anak-anakta.
Kita selaku mamre perlu kal ngajari anak-anakta kerna litna merga/ beru si ibaba ras aturen pertuturen e bas kita:
a. Sistem kekerabaten i bas kita, e me sangkep si telu bas kegeluhen:
1) Bas merganta/ egonta igelari Sukut, sembuyak ras senina: kita si sada merga, sipemeren, siparibanen, sepengalon ras sendalanen. Enda bas jabunta.
2) Kalimbubu: enda kerina keluarga arah nande, mulai datas nari, bas nininta nari ku teruh. Keluarga nande/ si mupus nini bulangta igelari kalimbubu tua; keluarga arah nande si mupus bapanta, igelari kalimbubu bena-bena, keluarga nandenta igelari kalimbubu si ngalo ulu emas/ si mada dareh, keluarga ndeharanta tah ndehara anakta, igelari kalimbubu si erkimbang, bage ras seterusna bas kita masing-masing.
3) Bage pe anak beru, enda arah anak si diberu bas keluarganta, mulai ka datas nari kuteruh; turang empongta, turang bulangta, turang bapanta, turangta, anakta si diberu, man merga siapai pe ia erjabu, kerina e anak berunta, enda berlaku man banta kerina.
b. Lit 8 (waluh) erbage dareh si mengalir i bas kita, 4 (empat) arah bapa, 4 (emapt) arah nande, e me:
1) Arah bapa: a. Merga bapa; b. Bebere bapa (binuang); c. Kempu kai bapa (entah/ kalimbubu bena-bena) ras d. Bebere bulang (binuang/ kalimbubu tua jabu).
2) Arah nande: a. beru nande, bebere e kita; b. bebere nandenta, kempu si e kita; c. kempu kai nandenta e solerta aras d. bebere kai bulangta arah nande, e entahta.
Alu si ajarken si enda tentu anakta e pe enggo ietehna njagasa bas bena-bena pertemanenna nari gelah ula sempat terjadi i perjabun si sumbang.
c. Lit si semerga tapi banci ia erjabu.
I bas 5 (lima) merga kalak Karo: Karo-Karo, Ginting, Sembiring, Perangin-angin ras Tarigan; bas si e lit memang si semerga pe ia, banci ia situkuren (erjabu). Umpamana: Sembiring bage Sebayang ras Perangin-angin, ia banci deba erdemu bas perjabun. I bas awalna, merga Sembiring si la ia nggit situkuren ras Sembiring si deban: Kembaren, Keloko, Simulaki ras Sinupayung. Tapi belakangen enda pe enggo deba sibuaten. Bage pe Merga Sebayang, la ia nggit sibuaten ras Pinem. Tapi bas daerah tertentu lit enggo berlakukenna maka la irungguina kalak adi kalak si erjabu sada merga.
d. Sikap Gereja Nandangi Perjabun Si Sumbang:
Gereja labo mpejabuken (mengawinkan) manusia, tapi masu-masu perjabun si enggo ersada arihna, subuk si erjabu, keluarga kerina, gereja, termasuk bas pemerintah pe la lit rongketna, bage pe kalak si deban pe la keberaten, erkiteken umpamana lit denga tembe-tembena ras diberu si deban si lenga erkedungen. Adi enda kerina enggo mejile, e maka imomoken ras ipasu-pasu. Adi enda kerina enggo ratur, tentu bas soal sumbang tah la arus pe enggo lulus kerina.
Guna menjaga si enda nge maka ipindo surat Pridiken/ ngawan, surat pemerintah tanda ia berhak erjabu ras imomoken selama 2 (dua) minggu, tah mawen lit kalak si keberaten. Tentu adi la ia arus/ kawin sumbang tah pe semarga, tentu jadi soal bas keluarga ras tokoh adat, tentu gereja pe la ipasu-pasuna, bagi ikataken bas Tata Gereja GBKP Tahun 2015 – 2025 BAB XI pasal 42 point 6.
DISKUSI
1) Cuba situriken pendapatta kerna perjabun si la tutus erkiniteken, umpamana sembelahen ngenca rusur aktif, tah duana ia la aktif. Padahal kita enda sebagai jabu bangsa pilihen Tuhan, si ateNa kita jadi saksiNa nandangi kerina jelma, rikut bahan oratenta.
2) Kai nge si perlu silakoken nandangi anak-anakta selaku orangtua, bage pe bas gereja gelah ula min anakta e terjerumus ku bas perjabun si sumbang?
USULEN ENDE-ENDEN
1) KEE GBKP 124: 1, 2
2) KEE GBKP 200: 1, 2
3) KEE GBKP 247: 1, 3
4) KEE GBKP 204: 4, 5
5) KEE GBKP 303: 1- Persembahan
Pdt. Kongsi Kaban.
HP/WA: 0813-6083-7276