ERGAKEN HAK KALAK SI DEBAN
(Isu Diskriminasi)
Ulangen 24: 17 – 18
24:17 Janganlah engkau memperkosa hak orang asing dan anak yatim; juga janganlah engkau mengambil pakaian seorang janda menjadi gadai.
24:18 Haruslah kauingat, bahwa engkaupun dahulu budak di Mesir dan engkau ditebus TUHAN, Allahmu, dari sana; itulah sebabnya aku memerintahkan engkau melakukan hal ini.
A. PERSIKAPEN
B. PERPULUNGEN JABU-JABU
• Rende: KEE No. 185: 1, 3 (Ibabai Jabu Kundulen)
Dibata Bapanta ringan i Surga
Si njaga geluhta i pertibi e
Ernalem man baNa i bas geluhta
Ikutken kataNa suari berngi pe
Di erdua ukur man Tuhanta e
Dungna banci kita sirang rassa pe
Pebulat ukurta ernalem baNa
I je daten cio cilinggementa
• Ertoto ibabai jabu kundulen
• Renungen:
Teks : Ulangen 24: 17-18
Tema : Ergaken Hak Kalak Si Deban
Ercakap kerna topik diskriminasi, situhuna lit jejak sejarahna i bas negaranta. I bas jamanna, diskriminasi pernah ipake kolonial Belanda memecah bangsanta. Konteksta si pelain-lain erbahanca mesunah mpeturah tindaken diskrimintatif si erujung ku bas konflik ras pecah belah. Secara umum lit empat aspek si banci ikategoriken ku bas tindakan diskriminatif e me: pengutamaan, pengecualian, pelarangan ras pembedaan (Komnas HAM 2023). Mengutamakan, mengecualikan, melarang bage pe membedakan sekalak ntah pe sekelompok jelma erkiteken suku, warna kulit, gender, pendidikan orientasi geluh ras si debanna masuk ku bas tindakan-tindakan diskriminatif ntah pe pengabaian hak kalak si deban.
Uga nina Pustaka ras budayanta (kearifan lokal) Karo kerna tindakan-tindakan diskriminatif enda? Ulangen 24: 17-18 ras kearifan lokalta kalak Karo sipake guna ndatken pelajaran si mbaru i bas PJJ-ta enda. Adi megermet kita, Pustaka Si Badia alu tegas nulak kerina perbahanen si diskriminatif nandangi jelma erkiteken gender, suku, ekonomi ras kecibal geluh. Tangkas ituriken, “Ola rampas hak-hak kalak pertandang ras hak-hak anak melumang, bage pe ola buat uis diberu balu-balu jadi jaminen pinjamenna.” Lit telu identitas si ituriken i jenda, kalak pertandang, anak melumang ras diberu balu-balu. Si telu enda me sasaran diskriminasi ras tindak kejahatan i bas dunia kuno. Kalak enda teluna secara sosial bage pe politik paling rentan imanfaatken erkiteken la lit si njamini kegeluhenna.
Kalak pertandang (orang asing atau alien) e me kalak la lit sima-simana, kemungkinen kalak enda korban perang si kelompokna talu i bas paksa si e jenari nggo mampa lanai ertujun. Ia la masuk ku bas anggota komunitas ras ndarami ingan si nggit ngaloken ia. Anak melumang, e me anak si enggo mate nande ras bapana. I bas paksa si e arusna keluarga terdekatna (khususna keluarga bapana) mpekena-kena ia. Tapi i bas erbage kasus, justru keluarga terdekatna merampas taneh ntah pe tading-tadingen bapana ndube. Diberu balu-balu e me kelompok si peteluken si rentan ndatken perlakun diskriminatif. Kematen perbulangen ras anak dilaki kejadin si mengeriken erkiteken seri ras lanai lit jaminen nggeluh.
Alu tegas Pustaka Si Badia mperdiateken kegeluhen kalak enda. Ola rampas hak kalak pertandang, anak melumang ras diberu balu-balu. Secara ekonomi, peraturen agama Jahudi mperdiateken kalak enda. Ula perani anggur ras gandum seh ku duru, enda sikerajangen kalak si telu ndai. Erkiteken banci jadi lanai lit taneh ntah pe juma inganna latih. Si ngelanggarsa ndatken ukumen (Jeremia, Jesaya ras Amos)
“Ola buat uis diberu balu-balu jadi jaminen pinjemenna,” alat pelindung fisik sanga melas ciger wari bage pe mbergeh tengah berngi e me uis (suhu Timur Tengah ekstrem). Mindo uis jadi jaminen pinjamen seri ras gerampas geluhna sabab lanai lit si ngelindungi daging kulana. Perbahanen e si la erprikemanusiaan. Palas moral nulak diskriminasi e me “inget nai kam budak i Mesir.” Pengalamen e mabai ia ngataken bujur jenari ber-empati nandangi kecibal geluh kalak si deban, labo muat hak-hakna sebage manusia.
Suku Karo e me suku si terbuka, si cukup adil, la rayo ayo erkiteken suku, agama, gender ras seterusna. Enda tersuan i bas budayanta kalak Karo, khususna budaya ertutur ras tradisi ngelegi merga ntah pe beru. Si dua enda banci nampati kita ngidah kearifan lokal kalak Karo si labo diskriminatif. Salah sada dalan masuk ku bas komunitas Karo e me ertutur. Proses ertutur ibenaken alu nungkun merga ntah beru sebage penanda identitas sekaligus level relasi antar personal. Adi megermet kita maka i bas nentuken level relasi antar personal i bas kalak Karo labo terjeng merga tapi pe bere-bere, seh ku bas bere-bere nande bapa bage pe nini-ninina. Enda nuriken maka situhuna budaya Karo pe sangat adil gender. Kalak Karo ngergai dilaki bage pe diberu. La lit situhuna diskriminasi nandangi diberu i bas budaya Karo.
Penyebaran kalak Karo si enggo mbelang ras komplek pe erbahan kalak Karo arus ngakui kecibalna, suku ras bangsa si deban i sekitarna. Maka i bas konsep rakut si telu, tutur siwaluh, perkade-kaden si sepuluh dua dungna itambahi sada nari e me teman meriah. Teman meriah mereken ingan man suku si deban si la kalak Karo masuk ku bas komunitas kalak Karo. Proses enda pe reh ulina arah tindakan inklusi kalak Karo e me tradisi ngelegi marga ntah pe beru. Kalak i darat suku Karo nari pe banci jadi kalak Karo (i Karoken). Enda tanda bukti maka i bas kalak Karo situhuna la lit orang asing, tapi kerina banci jadi keluarga, kerina banci jadi kade-kade. La lit diskriminasi nandangi kalak si deban. fi geluh kalak Karo si adil ras ngergai kerina jelma arusna
Arah si dua enda ndai teks Ulangen 24: 17-18 bage pe filosofi geluh kalak Karo si adil ras ngergai kerina jelma arusna mendewasaken perpulungen GBKP guna ngergai ras ngaloken kerina jelma tanpa diskriminasi. Sebage kalak Kristen sekaligus si nggelem nilai-nilai budaya Karo, di kune la si gejap la seri pengerganta bage pe perbahanenta nandangi sekalak jelma erkiteken suku, gender, bahasa, buaten lit ras si debanna si inget maka situhuna nggo ndauh kita lalar i bas kata Dibata nari bage pe identitasta sebagai kalak Karo. Pustaka Si Badia negasken maka seri kerina jelma i adep-adepen Dibata bage pe budayanta selaku kalak Karo nampati kita ngergai kerina jelma alu la erayo-ayo.
• Nuriken Kata Dibata (Pdt ntah Pt/Dk)
• Rende KEE No. 192
Meriah kita ras krina, si puji Dibatanta
Perban lias ateNa e, isehkenNa man banta pe
Nggo pulung kita k’rina pe, i bas ingan enda
I bas ingan enda
• Penggejaben
‒ KAKR, Permata, Moria, Mamre, Saitun (pegancihen)
‒ Irakut serayaan (Pdt, Pt/Dk)
• Diskusi (Ipandu pengurus PJJ)
- Lit nge pengalamenndu ngaloken tindakan diskriminatif (diperlakukan berbeda) erkiteken kam beda suku agama, gender (jenis kelamin), bangsa, ekonomi, pendidikan ras si debanna? Turiken! Uga perasaanndu adi iperlakuken bage?
- Kai pelajaren si mbaru idatndu arah teks Ulangen 24: 17-18 bage pe budaya Karo i bas renungenta? Bagiken man temanndu.
• Persembahen, rende KEE No. 445: 1
Si pepulung me persembahenta
Si endesken dage man Dibata
Tanda m’riah ukur ban pasu-pasuNa
Si simpar b’reNa man banta
Asa si nggo isikapken, asa si nggo itotoken
Em pengataken bujurta, kempak Dibata
• Pertoton Sapaat
a. Persembahen
b. Bangsa ras negara
c. Kalak si ngenanami perlakuan diskriminatif subuk erkiteken suku, bangsa, etnis, warna kulit, gender, pendidikan, ekonomi ras si debanna
d. Si mada jabu ras si turah bas perpulungen
e. Pertoton Tuhan
• Momo
• Jeda ras penutup
Pdt. Raharja Sembiring, M.Th.
HP/WA: 085370897175