Ogen : Mazmur 128: 1 -6
Tema : Jabu Si Malang Man Tuhan
Tujun : Gelah MAMRE:
1) Nuriken ulu kemalemen ate e me i bas Dibata nari
2) Naksiken tanda-tanda kemalenen ate arah perukuren, pengerana ras perbahanen
Berkat atas rumah tangga128:1 Nyanyian ziarah. Berbahagialah setiap orang yang takut akan TUHAN, yang hidup menurut jalan yang ditunjukkan-Nya! 128:2 Apabila engkau memakan hasil jerih payah tanganmu, berbahagialah engkau dan baiklah keadaanmu! 128:3 Isterimu akan menjadi seperti pohon anggur yang subur di dalam rumahmu; anak-anakmu seperti tunas pohon zaitun sekeliling mejamu! 128:4 Sesungguhnya demikianlah akan diberkati orang laki-laki yang takut akan TUHAN. 128:5 Kiranya TUHAN memberkati engkau dari Sion, supaya engkau melihat kebahagiaan Yerusalem seumur hidupmu, 128:6 dan melihat anak-anak dari anak-anakmu! Damai sejahtera atas Israel
KATA PENARUH
Teptep jabu tentuna ersura-sura kuga gelah malem ate (sangap nggeluh) i bas tengah-tengah jabu. Gia kinatana labo kerina jabu ermalem ate. Tapi kemalemen ate tetap jadi perayaken kerina jabu. E maka erbage-bage usaha si ilakoken isi jabu si akapna banci nehi sura-surana e. I bas dampar sideban melala ka erbagena si mpengaruhi maka la idatken kemalemen ate e sabab megati si akap kemalem ate e banci si datken arah gegeh ras pemetehta.
Janah enggo pe ndekah erjabu lit nge labo ietehna kekurangen ntah kelebihen pasangenna bage pe nandangi anak-anak. Penandai si kurang erbahanca la kita seh ku bas kemalemen ate seh maka la siakap sangap erjabu. E maka perlu kal kita terus erlajar gelah Si eteh ija kin uluna kemalemen ate e, jenari ternanami kita kemalemen ate e seh maka sangap si akap kita nggeluh.
URAIAN TEKS
Mazmur 128 enda megati pe igelari sebagai Mazmur keluarga. Isina ngerana kerna kemalemen ate (sangap) kalak si erkemalangen man Tuhan. Janah arah bahan ogenta enda tangkas man banta maka ulu kemalemen ate e i bas Tuhan nari. Guna ndatken kemalemen ate e alu erkemalangen man Tuhan, mehamat man Dibata ras ndalanken kerina perentah-perentahNa si teridah arah kecibal geluh kerina anggota jabu:
1) Bapa, malem atena sabap ipanna ulibna latih, sangap nggeluh, mehuli si kerajangenna. I bas konteks Timur secara umum bapa e me si ndarami serpi (nafkah) erdahin ku juma. E maka selaku kalak perjuma ikataken sangap adi juma si idahikenna rani, la lit musuh sinuan-sinuan, la legon ras pe ibuat tuan taneh (tengkulak) ulih juma e. Dingen inanamina ulihna erdahin ras anak jabuna. “Ipanna ulihna latih” la bo terjeng ipan tapi alu nggejapken ras ngataken bujur asa si lit i bas ia. Ternikmatisa ulihna latih (la bagi ende-enden Karo: Tersempul nakan mbergeh).
2) Nande,kecibal nande iandingken bagi batang anggur si meramis buahna. Sangap kalak si nuan anggur adi melala buahna. I bas kalak Israel anggur e merupaken lambang keriahen ras kesangapen. Anggur tetap ipake i bas kerina acara pesta subuk meriah ntah pe ceda ate. Bage me jabu kalak si erkemalangen man Tuhan, teridah i je nande si jadi keriahen, kesenangen ras kehagan man perbulangen ras anak-anakna i bas kerina paksa.
3) Anak-anak, bagi tunas batang saitun. Sada kesangapen man kalak si nuan saitun adi melala tunas batang saitun e dingen arah tunasna e jadi buah. Bage me igambarken jabu si erkemalangen man Tuhan, anak-anak rikutken i bas perbelinna desken tunas si mbaru, si maba kemalemen Ate man bapa ras nande selaku sinursur kalak si malang man bana.
Kesangapen i bas pendahin, i bas jabu, kesehaten ras umur, bage pe kesangapen i bas kesusuren rehna i Sion nari. Sion e me deleng Dibata, ingan Si Badia. I je nari me kesangapen si idatken kalak si erkemalangen man Tuhan. Sabap tutus ia ersembah man Dibata.
PENGKENAINA
Jabu si ipasu-pasu Tuhan teridah arah kese mpabun (harmonis) bapa, nande ras anak-anak si ermalem ate. Bagi nina sada kuan-kuan; “kebahagian itu tidak turun dari langit”. Bage pe gambaren keluarga si sempabu labo berarti la lit perbeben ras kiniseran, tapi kalak si erkemalangen man Tuhan pentar ngalakenca. Kalak si malang man Tuhan ngidah maka pasu-pasu e labo terjeng kinibayaken, pendahin si sikap, perbulangenna bagi ukurna, anak-anak terajarken, la lit kiniseran. Tapi i bas keterbatasen ras perbebenta ngasup kita ngidah kesangapen idur Dibata nari sabap IA mperlengkapi kita guna kiniulinta (bd. Roma 8: 28).
Perlu pe sisadari maka teptep jelma lit nge kelebihenna kekurangenna. Janah guna ndatken kemalemen ate i bas jabu ngasup kita mujilken ras ngergai setiap anggota jabunta. Ngasup pe ngaloken ras pang kita nuriken kekurangenna alu ate keleng gelah banci ia robah. Perubahen e labo banci minter kuh, perlu lit kesabaren ras kiniteken maka Tuhan si nampati ia guna merubah dirina. Banci jadi lit ka nge biak si mesera ngubahkenca tapi tetap si idah e jadi proses guna ngelakoken si mehuli.
Lit sada pertoton si menarik jadi perenungen man banta, nina: “Tuhan berilah aku ketenangan untuk menerima hal-hal yang tidak dapat aku ubah, keberanian untuk mengubah hal-hal yang bisa diubah dan hikmat untuk membedakan keduanya. I bas Si enda tetap dame pusuhta ngaloken si la banci mobah, pang kita maba perubahen nandangi si baci iubah. Dingen sipake kepentaren guna mbedaken apai banci iubah ras si la banci iubah gelah ula kita menukah monce. Janah perlu nge si tandai ras si eteh kelebihen ras kekurangen masing-masing anggota jabu alu palas erkemalangen man Tuhan. Sabap kalak si erkemalangen man Tuhan ngasup ngaloken kerina anggota jabu alu keleng ate, janah labo terjeng nuntut bagi sini suraken. E maka tetaplah ertoto guna si e.
√ Study Kasus
I bas sada kuta tading me ije sada keluarga e me Bp Bagekin. Jabu enda gelgel nari kin enggo jadi kalak Kristen. Bapa itengah jabu pendahinna sekalak guru, ras nande lit usahana kede kelontong, anak itengah jabu lit sada dilaki gelarna Bagekin, ia enggo SMA. Keluarga e maka agak kurang kal keaktifenna i bas dahin-dahin perpulungen, tapi adi adangen ntah iuren si lit i bas perpulungen labo ia tading. Bapa itengah jabu ersura-sura gelah anak e pagi banci nerusken pendahinna sebage guru, e maka teptep lit kesempaten ercakap ras anakna tetap iajukna gelah ia pagi jadi pendidik. Nande itengah jabu ersura-sura gelah anakna e pagi banci nerusken usaha si lit, e maka ia pe teptep ercakap ras anak ngajuk ia gelah erlajar i bas bidang usaha. Bage ka pe mamana selaku sekalak Si erdahin sebagai anggota polisi, janah mamana e pe ersura-sura gelah beberena jadi Polisi. E maka ia pe rusur mpersingeti beberena e gelah masuk jadi polisi terlebih si Bagekin enggo kelas IX (Kls 3 SMA). Si Bagekin la nggit nogan orang tuana bage pe ras mamana. E maka seh me paksa ujian akhir sekolah. I bas paksa ujian enda cukup sibuk i bas pendahinna, sini ingetna e me kai nina bapa, nande ras mamana. Adi nina bapa jadi guru, nina nande jadi pengusaha janah nina mama jadi polisi. Taren-taren ngukuri uga nina bapa, nande ras mamana maka soal-soal ujian lanai terjababsa, piah dungna la ia lulus i bas sekolahna. Bage me jadina adi mehuli gia sura-sura bapa, nande ras mamana adi la arih-arih itengah jabu dingen la erkemalangen man Tuhan maka labo tersehi bagi sura-sura. Piah dungna anak itengah jabu maba beratna.
DISKUSI
1) Kai-kai saja si banci ilakoken itengah jabuta rikut ulihna si banci ialoken sue bahan ogenta?
2) Cuba turikenndu kai nge jadi pelajaren si i bas jabu Bp Bagekin arah study kasus enda ras kai ka akibatna?
USULEN ENDE-ENDEN
1) KEE GBKP No. 202: 1,2
2) KEE GBKP No. 182: 1-3 Radu mbiring adi siageng-agengen
3) KEE GBKP No. 199: 1-3 Entebu nanamna adi cimpa gulame
4) KEE GBKP No. 323: 1,2 Adi bas jabu radu sikeleng-kelengen
5) KEE GBKP No. 198: 1,2 Jumpa ate malem senang ras dame
Pdt. Kasir Purba, S.Th.
HP/WA. 0813 6107 3551