Ogen : Roma 8:26-27
Tema : Kesah Dibata reh Nampati kita.
Tujun : Gelah Saitun:
1) Ngidah Penampat Kesah Sibadia bas kegeluhenna
2)Nggeluh bas sura – sura kesah.
Metode : Diskusi
I. BENA KATA
Pentakosta eme perayan si penting man banta kalak Kristen. Yohanes Calvin (sekalak Teolog) ngataken maka Kesah si Badia jadi alat guna negu – negu manusia gelah meteh si ngena ate Dibata. Maka bage me arusna cara nggeluh kalak si itegu – tegu Kesah teridah i bas kegeluhenna si tep – tep wari. Arah bahan PA-nta wari enda pe ibabai kita guna ngidah ulih pendahin Kesah si Badia si negu- negu kegeluhenta kerina. Bekas penegu – neguNa e me si teridah kualitas kegeluhenta.
II. MPEBAGESI OGEN
Kota Roma eme kota sijadi pusat politik, budaya ras agama si penting kal i bas kekaisaren Romawi. Erkiteken si e, perpulungen si jadi tujun surat enda pe erbage – bage i bas budaya ras asal – usulna. Surat Roma itulisken Rasul Paulus guna mereken pemahamen si payo kerna kegeluhen kalak si erkiniteken. Khusus bas bindu 8, nuriken uga situhuna hubungen manusia ras Kesah si Badia.
Bahan PA-nta, i bas ay. 26, maka Kesah si Badia e erguna guna nampati si kote. Kata nampati ibuat i bas kata synantilambanetai ertina simengambil alih dingen iras – rasken. Bage me pendahin Kesah si Badia si mengambil alih kerina hal si banci erbanca kita kote. Melala kal sibanci erbanca manusia kote, umpamana perbeben si la erngadi – ngadi seh maka tempa lanai lit pengarapen. Bage me ulih pendahin Kesah si Badia si mengambil alih kerina perbeben manusia seh maka turah mulihken pengarapen. Terdauhen pe bas ayat enda ituriken maka salah sada si erbanca lanai kote eme ertoto, erpengendes man Dilbata, janah Kesah si Badia sinampati. I bas Buena perbeben kegeluhen megati ertoto pe lanai ngasup, la terturiken, I bas sie e pe Dibata ngangkasa, sebab lit kap Kesah si Badia si nggeluh bas pusuhta si erbanca amin gia sinik ertoto tapi kerina pingko pingkon manusia iangka Dibata.
Ayat 27 ngerana kerna ulih toto. Arah penampat Kesah si Badia erbanca ngasup meteh sura – sura Dibata sabab Kesah ngenca si meteh kai sura – sura Dibata. Janah alu pengajari Kesah me erbanca manusia reh erpenandaina kerna Dibata. Kesah e itandai Dibata emaka ipindona kai si iperluken anak – anak Dibata. Si ipindo Kesah si Badia labo kai sura – sura, kai selera tapi kai sierguna, kai siiperluken anak – anak Dibata.
III. PENGKENAINA
Arah bahan PA-nta wari enda lit piga-piga hal si banci jadi perenungen man banta eme kap:
- Kalak si er-Pentakosta ertina ngerayaken nusurna Kesah si Badia. Ulih nusurna Kesah si Badia e maka kerina kita nggo ngaloken Kesah e bas kegeluhenta. Emaka lit ngge Kesah e e i bas dirinta kerina. Saja ngenca lit kepeken i bas diri manusia e nggo lit ulihna, lit ka si langa. Kalak si nggo rulih Kesah si Badia e bas dirina, ngembari pusuhna adi lit perbeben. Sebab ulih pendahin Kesah si Badia, kita si kote lanai teridah arah nggo reh ngasupna kote, la kita sisada tapi itemanina i bas kerina perbebenta.
- Ulih pendahin Kesah si Badia erbanca reh beluhna kita ertoto. I bas ertoto kita ngerana ras Dibata. Megati kal ertoto e langa jadi hal siutama ras pertama man banta. Tapi i bas litna Kesah si Badia, erbanca kita lalap mengandalken Dibata i bas kerina dampar kegeluhenta. Kesah si Badia e, nampati kita bas kelsehenta ras si nampati kita bas la ngasup ras beluhta e nuriken kelsehenta man Dibata.
- Ulih pendahin Kesah si Badia pe erbanca kita reh ngasupna meteh kai sura – sura Dibata man banta. Selaku Saitun umpamana melala kal perbebenta, si la bagi ukurta, sierbanca kita tersungkun kai nge sura – sura Dibata. Arah pendahin Kesah si Badia ipengasup kita meteh sura -sura Dibata man banta. Lanai kita lalap rukur negatif tapi arah pendahin Kesah, ngasup kita rukur positif.
IV. PERTOTON
Tuhan ertoto kami kerna kerina anggota Saitun, demilah pusuh kami alu Kesah si Badia gelah la kote i bas kerina perbeben si ngekenai kami tapi kami tetap megegeh. KesahNdu si Badia pe singajari kami gelah reh bagesna penandai kami kerna Kam. Alu bage tambah kemalemen ate kami i bas ndalani kegeluhen enda. I bas Jesus kami ertoto man baNdu. Amin.
V. DISKUSI
- Rikutken ogenta maka ulih pendahin Kesah si Badia erbanca lanai kita kote. Turiken dage pengalamenndu kerna ulih pendahin Kesah si Badia si erbanca lanai kam kote.
- Kai ka deba ulih pendahin Kesah si Badia si nggo mpelimbarui geluhndu subuk i bas cara nandai Dibata bage pe ertoto. Turikenlah.
VI. USULAN LAGU
- KEE No. 118: 1-2
- KEE No. 187: 1-3
- KEE No. 245:1-2
Pdt. Jefri Alexander Keliat M.F
Erdalan-dalan ku Tigabinanga
Singgah kentisik i kuta Pertumbuken
Mejuah-juah man banta Saitun kerina
I bas Ulang Tahunta si pe siwahken