PA AKSI BERSAMA KATEGORIAL
Ogen : Lukas 8:1-3
Tema : Nampati Alu Kiniliten
Tujun Gelah Mamre:
1) Nuriken penampat diberu-diberu i bas pelayanen Jesus
2) Mpepulung perbahanen si banci jadi penampat man sekelewetna.
Metode PA : Sharing ras Aksi
Perempuan-perempuan yang melayani Yesus
8:1 Tidak lama sesudah itu Yesus berjalan berkeliling dari kota ke kota dan dari desa ke desa memberitakan Injil Kerajaan Allah. Kedua belas murid-Nya bersama-sama dengan Dia, 8:2 dan juga beberapa orang perempuan yang telah disembuhkan dari roh-roh jahat atau berbagai penyakit, yaitu Maria yang disebut Magdalena, yang telah dibebaskan dari tujuh roh jahat, 8:3 Yohana isteri Khuza bendahara Herodes, Susana dan banyak perempuan lain. Perempuan-perempuan ini melayani rombongan itu dengan kekayaan mereka.
KATA PENARUH
Nampati, e me sada perbahanen si mulia. Adi kataken nampati, la lit i je perkiran untung ntah rugi. Lit penggejapen meriah adi lit kesempaten guna nampati. Jesus jne pe mereken diriNa ras waktuna guna nampati sekelewetna. Si ibahan Jesus e me jadi usihen man banta i bas nampati. Palas nampati e me keleng ate. Rikutken kecibal si genduari, tuhu nge meriah ukurta i bas nampati ? Tuhu nge nampati lanai si nen untung rugi? Alu kai saja kin banci nampati? Mari siperdiateken diberu-diberu si nampati Jesus alu kai si lit i bas ia.
MPEBAGESI PENGANKAN KERNA OGEN
Lukas nuriken ingan tading Jesus e me i kuta Kapernaum. I je nari isiariNa kuta-kuta ras kota daerah Galilea. Tupung Jesus erdalan niari kota ras kuta-kuta, iberitakenNa kerna kinirajan Dibata. Tuhu mesera akap kalak ngantusi berita e erkiteken kinirajan Dibata e terbuni denga. Lit pagi paksana kinirajan Dibata e ipetangkas Jesus i bas diriNa i kayu persilang. Tambah si e Jesus pe ermomo maka ise si tek man baNa ndatken keselamaten si rasa lalap.
Sepuluh dua murid Jesus ikut ras Ia i bas nehken berita si meriah e. Atan pe diberu-diberu si enggo ipepalem Jesus. Diberu-diberu e arih-arih kai si arus ibahanna lako ncukupi keperlun Jesus ras ajar-ajarNa i bas er Berita Si Meriah. Dahin diberu nampati keperlun si teptep wari ikut muat bagin er Berita Si Meriah. Si enda i bahan Lukas lako ngelawan tradisi Jahudi si ncibalken diberu teruken asangken dilaki. Dahin diberu terjeng i rumah ngelai perbulangenna. Lukas ngajari perpulungen Kristen lako ngergaken diberu ras pendahinna. Lukas ngangkatken diberu-diberu jadi saksi kematen ras kekeken Tuhan Jesus.
Igelari Lukas diberu enda sada-persadae me:
1) Maria igelari pe Magdalena. Erkiteken kutana i Magdala nari, kelang-kelang Galilea ras Tiberias. Ia pernah sakit mekelek, iseluki pitu setan. Angka pitu e angka sempurna ertina mesangat kal pinakit ulih perbahanen setan – setan. Maria Magdalena e me si pernah isampati Jesus alu mpelawes setan-setan i bas kulana nari. Ituduhken Maria kinitekenna ras kekelengenna man Jesus alu tetap setia ngikutken Jesus. Seh ku proses penyaliben pe tetap iarak-arakna Jesus. Tupung Jesus keke i bas si mate nari, man Maria me perlebe icidahken Jesus diriNa.
2) Johana ndehara Kusa, bendehara Herodes Antipas. Kusa me si ngaturken ras si jadi pengawas erta pribadi Herodes. I bas ia ngawasi erta benda Herodes, ibereken man bana gaji si sembaba ras pendahinna. Banci kataken Johana e diberu si bayak tading i Tiberias, sada kuta ras Herodes. Gelar Johana pe isingetken radu ras Maria Magdalena tupung ia ndahi ajar-ajar nuriken kerna kekeken Jesus.
3) Susana. La melala ituriken kerna ia, ras lanai pernah isingetken gelar Susana i bas Pustaka si Badia.
Teluna diberu enda la seri kecibal kegeluhenna tapi ersada arihna nampati Jesus ras ajar-ajarNa i bas nikapken keperlun pangan si teptep wari. Diberu-diberu e enggo leben nggejapken perbahanen Jesus, pulah i bas sakit pinakit ras perbeben si mberat. Tandana diberu-diberu e enggo ngaloken penampat i bas Jesus nari, isehkenna pengataken bujurna alu muat bagin nampati pelayanen Jesus. Iberekenna waktu ras kiniliten si lit i bas ia, nikapken keperlun pangan Jesus ras ajar-ajarNa teptep wari. Perkuah ate Jesus nampati diberu-diberu e jadi usihen man diberu e lako nampati. Perbahanen diberu-diberu e jadi usihen man perpulungen.
PENGKENAINA
Labo lit si ngasup ersemulih nandangi perbahanen Jesus guna nelamatken kita. Tapi si tuhu-tuhu nggejapken geluhna enggo selamat, la ia biar-biaren nehken pengataken bujur. Erbage dalanna kita ngataken bujur, subuk arah waktu, talenta, kiniliten ras dirinta guna ngelai Tuhan. Nampati teman si lit i bas kesusahen ras perbeben si mberat. Kita nampati labo perban lebih i bas kita, tapi erkiteken enggo leben isampati Tuhan. I bas nampati, ernanam man kalak si deban. Nehken penampat arah talenta ras kiniliten, amin pe kitik banci erguna kal man si ngalokensa.
Moria GBKP ersura-sura ngelitken taman bermain lengkap ras Gedung ingan erlajar, ruang penitipen ras ruang bermain anak, ruang guru ras ruang kepala sekolah, dapur ras kamar mandi man anak-anak PAUD Bintang Moria GBKP. Nuate Gedung enda i kantor klasis Berastagi alamatna i KWK ujung jalan Udara Berastagi. Lit pe taksasi biaya siniperluken:
1) Pekerjaan Persiapan Rp. 10.993-507.00
2) Pekerjaan tanah, pondasi, sloof, kolom dan balok Rp. 178.877.821.05
3) Pekerjaan atap, lantai dan dinding Rp. 553.214.829.80
4) Pekerjaan pengecetan Rp. 42.364.730.40
5) Pekerjaan pintu dan jendela Rp. 85.400.000.00
6) Pekerjaan elektikal Rp. 6.755.000.00
7) Pekerjaan Sanitairy Rp. 13.300.000.00
Total Rp. 890.905.888.25
Guna ngelitken biaya e iarapken partisipasi kerina kategorial GBKP (Saitun, Mamre, Moria ras PERMATA) gelah mpepulung aksi 10.000/kalak teptep kategorial. Enda jadi aksi PA bersama bagi enggo si lakoken teptep tahunna. Enda encidahken kita sada keluarga i bas Tuhan. Sada keluarga oratna sisampat-sampaten. Sibuat baginta arah kinilitennta sekalak-sekalak. Penampat si ibereken kita jadi pengataken bujurta man Tuhan si enggo nelamatken kita. Janah kerina jadi kemulian man Tuhan saja.
SHARING RAS AKSI
1) Tentuna kerina kita enggo pernah nampati subuk arah gegeh, waktu, talenta ras kiniliten man keluarga, teman ras perpulungen. Mari sibagiken pengalamennta, penggejapen si uga nge lit i bas pusuhta kenca kita muat bagin i bas nampati?
2) Aksi: si lakoken geraken 10.000/kalak teptep kategorial guna mbangun taman ras Gedung Paud Bintang Moria GBKP.
USULEN ENDE-ENDEN
1) KEE GBKP No. 3: 1-2
2) KEE GBKP No. 215: 1-2
3) KEE GBKP No. 308: 1-2
4) KEE GBKP No. 272: 1- (Persembahen)
5) KEE GBKP No. 165: 1-2
ULA LUPA SIIKUTI PEKAN DOA GBKP I BAS MINGGU SI REH
Pdt. Nurbety Ginting, M.Th.
HP/WA: 0821 6869 6383