NGGELUH I BAS SURA-SURA DIBATA
1 Petrus 1: 13 – 16
1:13 Sebab itu siapkanlah akal budimu, waspadalah dan letakkanlah pengharapanmu seluruhnya atas kasih karunia yang dianugerahkan kepadamu pada waktu penyataan Yesus Kristus.
1:14 Hiduplah sebagai anak-anak yang taat dan jangan turut hawa nafsu yang menguasai kamu pada waktu kebodohanmu,
1:15 tetapi hendaklah kamu menjadi kudus di dalam seluruh hidupmu sama seperti Dia yang kudus, yang telah memanggil kamu,
1:16 sebab ada tertulis: Kuduslah kamu, sebab Aku kudus.
Rende KEE GBKP No. 20: 1-3 (Ibabai Bapa)
https://www.youtube.com/watch?v=NaD9yjB9a_c&pp=ygUGa2VlIDIw
Reh Kam min, reh Kam min!
Dahi Tuhan simbelin.
B’reken baNa ras pujin.
Dahi min, dahi min, dahi min.
Inget min, inget min!
Ngaruh Tuhan bandu kin.
PemereNa la ‘rkerin.
Inget min, inget min, inget min.
Pindo min, pindo min!
Pasu-pasu Tuhan kin.
Sangap kam i bas dahin.
Pindo min, pindo min, pindo min.
Ertoto (Ibabai Bapa)
Renungen
Teks : 1 Petrus 1: 13 – 16 (ibabai Nande)
Tema : NGGELUH I BAS SURA-SURA DIBATA
Surat 1 Petrus enda isehken man kalak Kristen (anak-anak Dibata si enggo ipilih) si merap i daerah Utara Asia kitik. Maksud Surat Petrus enda mpegegehi kiniteken dingen mereken pengarapen man kerina kalak Kristen, sabab kalak Kristen paksa si e ngenanami kiniseran erkiteken kinitekenna man Jesus Kristus. Jenari isingetken Petrus i bas ngalaken percuban e, maka:
1) Jesus jadi Pengarapen si Nggeluh
Dibata enggo encidahken perkuah ateNa si mbelin arah kematen Jesus bage pe enggo ipekeke Dibata i bas si mate nari, jenari reh Jesus e pagi mulihken i bas wari pendungi guna mereken pasu-pasu si mbelin ras keselamaten man kalak si tetap paguh i bas kiniteken.
2) Ermeriah ukur i bas erbage-bage percuban
Percuban si reh e labo tanda la ate Tuhan keleng, tapi kecedan ate erkiteken percuban e kentisik kap, sabab percuban e pe tujunna guna ncidahken ntah kiniteken e tuhu-tuhu entah lang.
Jenari isingetken Petrus gelah kerina encidahken jati diri-na selaku kalak Kristen i bas erbage-bage kiniseran nggeluh ras erbage-bage perbahanen si la mehuli i doni enda. E maka arus nikapken ukur, metenget dingen tetap erpengarapen nandangi pasu-pasu si pagin iberekenNa sanga kerehenNa ku doni enda. Tetap erkemalangen man Dibata ras ula pelepas kegeluhen ibabai sura-sura doni alu erbahan dosa, tapi berelah kegeluhen e ipelimbarui Dibata si enggo pebadiaken kita, alu nggeluh i bas kebadian si teridah arah perukuren ras lagu langkah si mehuli.
Jadi kalak Kristen arus njaga kebadian, sabab Dibata e badia ras enggo pernah ikataken Tuhan i bas Imamat 11: 44 “Aku kap TUHAN, Dibatandu. Arus ijagandu kebadianndu, erkiteken Aku badia”. Badia i bas bahasa Ibrani e me: qadosh si ertina “terpisah/berbeda”. Kita e me bangsa pilihen, si kerajangen ras anak-anak Dibata si ipilih guna meritaken perbahanen-perbahanen Dibata si teridah arah njagai kebadian perukuren ras lagu langkah bagi sura-sura Dibata. Selaku bangsa pilihen maka sada kearusen man banta setia man Dibata alu nuduhken dirinta terteki, banci iandalken bas dahin-dahin pelayanen, ertanggung jawab, nggit nampati (rela berkorban), danci jadi usihen i bas kerina perbahanen si mehuli.
I bas Minggu Pertama (I) Juni 2024 enda ilakoken pemilihen Pertua-Diaken i bas kebaktin Minggu. Selaku ngawan ni perpulungen bage pe selaku anak-anak Tuhan ersikap kita guna muat bagin i bas pemilihen e. Jenari si enggo ipilih jadi calon Pertua-Diaken rehlah i bas pemilihen e. Kerina serayan si terpilih arus nggejapken maka e bekas pemasu-masun Tuhan kap e. Janah sura-sura Tuhan gelah arah kita ipilihNa danci kita setia i bas ngelai IA alu meritaken Berita Si Meriah man kerina jelma, gelah kerina si megiken Berita Si Meriah e nggeluh bagi sura-sura Dibata. Man Calon Pertua-Diaken si la terpilih pe, kita pe i pasu-pasu Dibata nge alu ngerancang kita muat bagin i bas pelayanen si deban i tengah-tengah gerejanta. E maka i bas pemilihen Pertua-Diaken silakoken kita Minggu enda tetap nikapken ukur, metenget dingen erpengarapen man Dibata gelah ola ibabai sura-sura dosa kita arah pemilihen Pertua-Diaken enda, tapi tetap jaga kebadian bagi sura-sura Dibata.
Ngawan ni perpulungen nuriken penggejapen (Moria, Mamre, Permata, Saitun)
Rende: KEE No. 381: 1, 3
https://www.youtube.com/watch?v=PXegIPBQnCU&pp=ygUHa2VlIDM4MQ%3D%3D
Sura-sura Jesus bangku ernalsal tetap.
Nggeluh bujur ras mehuli si ngena ateNa
Reff: Ersinalsal terang, em sinisuraken Jesus
Ersinalsal terang, ku tetap ersinalsal
Kupindo Jesus nampati njaga pusuhku e
Gelah ngasup ersinalsal ngikutken Tuhan e.
Reff: Ersinalsal terang, em sinisuraken Jesus
Ersinalsal terang, ku tetap ersinalsal
Diskusi
1) Turikenlah kai saja si perlu silakoken guna njaga kebadian geluhta ras kai tandana si teridah.
2) Turikenlah komitmenta selaku ngawan ni perpulungen bage pe selaku calon Pertua-Diaken i bas pemilihen Pertua-Diaken Minggu Enda
Kesimpulen ibabai pandita/ pertua/ diaken
Nehken Persembahen
Rende KEE No. 108: 1 (2x iendeken)
https://youtu.be/diN1HarQxy0
Mbelang me kap man peranin
Tapina kurang si ranisa pe
O, Tuhan iahken Kam gelah min
KawanNdu ku bas peraninNdu e
O, Tuhan iahken Kam gelah min
KawanNdu ku bas peraninNdu e
Pertoton Persembahen
Rende: KEE NO. 396: 1-2
https://www.youtube.com/watch?v=dduRwJPFQAk&pp=ygUHa2VlIDM5Ng%3D%3D
Kita enggo dat pendilo Dibatanta,
‘Lah ngelai bagi si enggo ibahanNa.
Tangkas enggo sura-sura Dibatanta,
Gelah kita pe tutus jadi serayanNa.
Ola erlatih-latih janah tetap ukur pe,
Erdahin ‘bas peken anggur Tuhan e.
Gegeh ras kuasa ijujurkenNa pe,
Dibata si masu-masu k’rina dahin e.
Sada arih ras sada ukur min kita,
Sisampat-sampaten bas ndahiken dahin e
Amin gia mbelang si man peranin e,
Tetap m’riah ukur ras dahinta pe tembe.
Amin mbue perbeben si ngampangi dalinta,
Kuasa Tuhan kap arapen geluhta.
Petetap pusuhta ola ndele ate,
Dibata sing’layasi kerina dahin e.
Momo
Pertoton sapaat idungi pertoton Tuhan
Kenca dung PJJ, Snack (Adi lit)
Pdt. Elieser Tarigan, S.Th
HP/WA: 082277364488