TALITAKUMI
Markus 5: 41 – 42
5:41 Lalu dipegang-Nya tangan anak itu, kata-Nya: “Talita kum,” yang berarti: “Hai anak, Aku berkata kepadamu, bangunlah!” 5:42 Seketika itu juga anak itu bangkit berdiri dan berjalan, sebab umurnya sudah dua belas tahun. Semua orang yang hadir sangat takjub.
(HUT KAKR)
Ogen : Markus 5: 41 – 42
Tema : TALITAKUMI
Tujun : Gelah Saitun:
- Ngusih Perbahanen Jesus “njemak tan anak-anak”
- Ngukurken kai nari sibanci ibereken man KAKR (kempu) i bas orat nggeluh (budaya, etika/tata cara, rsd).
- Ndarami ras nampati anak perpulungenta si man sampaten
Metode: Diskusi dan Aksi
I. BENA KATA
Ngerana kerna kempu, tentu la lit ngadi – ngadina i bas kegeluhen nini bulang. Kempu eme sada keriahen kal man orangtua (Saitun), emaka secara umum metedeh kal nge ateta kerna kerehen kempunta. Enda ka me siisuratken Pemasmur, eme sada kesangapen kal adi siidah kempu – kemputa. I bas bahan PA-nta Minggu enda kita ibabai rukur kerna kempunta (secara organisasi) eme KAKR (Anak Sekolah Minggu). Khususna Minggu enda siperingeti ulang Tahun KAKR pe 134 tahun ken. Tuhu enggo metua ia secara organisasi tapi nguda denga ia secara daging kula ras perukuren. Emaka selaku orangtua (Saitun) arus sisampati kempunta gelah banci min rukur mehuli dingen seh sura – surana bagepe sura -sura Dibata arah la. Sebab selaku nini bulang, pasti meriah kal ukurta adi anak kempunta banci sukses geluhna dingen mehuli sikerajangenna. Lit rusur sibegi perkatan nina: adi anakta ras nini bulangna pasti reh gutulna! Tentu labo meriah ukurta megisa perkataan si bagenda. Kuga dage siban maka reh ulina kemputa ras kita? Enda me ateta sipebagesi arah bahan PA-nta wari enda.
II. MPEBAGESI OGEN
Bahanta enda eme nuriken kerna Jesus mpekeke anak Jairus i bas simate nari. Tupung Jesus seh i rumah Jairus, enggo mate anakna sidiberu e janah kalak si lit ije tangis ras serko. Adi situasi enda siterjemahken ku kegeluhenta; kata “mate” e banci iertiken lanai meteh mehuli, lanai terkataken, enggo sirang ukurna ras orangtuana. Tentu adi lit kempunta bagenda, tangis ka kal nge pusuh orangtuana (anakta) ngidah anakna e. Dikune lit situasi kempunta bagenda, kai dage si bahan selaku nini bulangna? Adi siperdiateken bahanta i bas wari enda lit pengajaren si mehuli ras mbages siibereken na man banta.
• ljemak Jesus tan anak ndai; enda hal sibanci silakoken nandangi kempunta. Njemak tan, encidahken maka kita nggit denga erteman dekat ras ia, aminna pe mawen enggo nge mekisat orangtuana ndeher ras ia. Secara psikologi, sentuhen eme cara paling jitu guna ngerembakken diri ras kalak sideban sierbahanca turah rasa nyaman. Selaku nini bulang perlu kal kita mereken rasa nyaman man kempunta guna nuriken ukurna gelah banci salang entah mawen melala permasalahenna. Alu bage banci keke ukur kempunta guna ngelakoken siterulin i bas geluhna. Ertina sentuhenta mereken semangat simbaru i bas dirina.
• Ikatakenna man anak e: talitakumi si ertina “0 beru..ku kataken man bandu, kekeken! Arah sienda banci ka kita erlajar, maka perkatan sindarat i bas babahta nari oratna min banci mpekeke ukur anak – kempunta. Jesus la ngidah anak enda mate, tapi ipeserina ras tunduh. Pandangen sibagenda perlu kal nandangi kita orangtua (Saitun) nandangi anak kempunta. Ula siakap ia “mate” entah pe lanai lit pengarapenta ia reh ulina; bage nge ngenca dorak ateta. Pikiren sibagenda salah, mari sigejapken maka pasti lit denga simehuli banci turah arah anak kemputa simehuli aminna pe genduari tempa lanai meteh mehuli. Alu bagenda nge kita banci mpekeke ukurna arah perkatan motivasi siibereken kita!
• Minter keke anak ndai dingen erdalan; enda me respon anak siipekeke Jesus ndai. La terjeng keke ngenca tapi pe erdalan. Bagenda me jadina adi anak – kempunta keke ukurna arah sentuhen ras pengerananta, banci jadi lebih asangken sibayangken kita banci ilakokenna.
III. PENGKENAINA
Tema-nta wari enda eme: TALITAKUMI si ertina: O Beru, Kukataken man bandu, kekekenlah! Enda me perkatan Jesus guna mpekeke anak Jairus sidiberu si mate e. Ula kita lupa selaku Saitun pe perkatan sibagenda rusur lah min ndarat i bas babahta nari, sibanci mpekeke ukur anak kempunta. Aminna gia genduari langa bo ibahanna si bagi ukurta, tapi erpengarapen kita maka i bas wari-wari si reh enda banci keke ukurna guna ngelakoken simhuli.
IV. PERTOTON
O Tuhan.. kami selaku orangtua, metedeh kal ate kami gelah anak ras kempu kami banci min nggeluh alu mehuli dingen ngelakoken perbahanen simehuli. Ajarilah kami gelah ngasup kami mereken pengajaren simehuli man bana arah kata ras perbahanen kami. Alu bage banci kami jadi teman man anak ras kempu kami, amin.
V. DISKUSI RAS AKSI
- Kuga nge sedekah enda hubungenta ras anak kempunta?
- Kai sibanci ilakoken Saitun i bas mendukung KAKR i bas Runggunta?
VI. USULEN LAGU
- KEE No 124: 3
- KEE No 249: 1
- KEE No 204: 1
Pdt. Lisa Selvina br Tarigan, M.Th
Itengah juma ku suan galuh
Tuhu megatel adi kena katadu
Gia melala perbeben geluh
Keleng ate Tuhan la mundu-undu