LALAP MERATAH, PAGUH DINGEN ERBUAH
Mazmur 92: 13 – 16
92:12 (92-13) Orang benar akan bertunas seperti pohon korma, akan tumbuh subur seperti pohon aras di Libanon; 92:13 (92-14) mereka yang ditanam di bait TUHAN akan bertunas di pelataran Allah kita. 92:14 (92-15) Pada masa tua pun mereka masih berbuah, menjadi gemuk dan segar, 92:15 (92-16) untuk memberitakan, bahwa TUHAN itu benar, bahwa Ia gunung batuku dan tidak ada kecurangan pada-Nya.
(HUT Saitun)
Ogen : Masmur 92:13-16
Thema : LALAP MERATAH, PAGUH DINGEN ERBUAH
Tujun : Gelah Saitun:
- Meteh maka umur simeganjang, la jadi hambaten guna terus erdahin (Tetap Produktif),
- Sekalak – sekalak nuriken ras nuratken, i bas kai saja ia banci muat bagin bas dahin rumah, Gereja, masyarakat.
I. BENA KATA
Lit sekalak nini enggo metua erdahin i jumana. Mentas sekalak anak perana idahna nini enda nuan durin, emaka iperkuankenna nina: Ngkai maka durin isuanndu nini? Sempat denga kin ipanndu pagi buahna? Langa pe erbuah durin si isuanndu e enggo kam mulih ku taneh. Bayam lah suanndu nini, gelah sempat denga i gulendu.
Ngaloi nini e nina: o kempu, kusuan durin enda labo gelah ateku kupan pagi buahna, tapi kam ras kempu kempungku pagi manca buahna. Enggo pe pagi aku mate lit denga lalap gunana man kalak sideban arah buah durin si kusuan enda. Emaka kam pe kempu ula bandu ngenca ranakenndu i bas kam erdahin, tapi ranaken pe kalak sideban, gelah kam jadi kalak sierguna man sienterem, jadi pasu pasu kam man kalak sideban.
Bujur nini, nina anak perana e, sebab merasa terinspirasi ia arah kata nini e.
Prinsip geluh nini enda me prinsip kalak sierkiniteken man Tuhan. Geluhna bagi batang kayu siturah ideher rumah Tuhan, lalap paguh, dingen erguna man jelma sienterem, bulungna meratah, dingen tetap erbuah anem pe enggo metua.
II. MPEBAGESI OGEN
Masmur enda eme sora pusuh sekalak pemasmur kerna perbahanen Dibata nandangi kalak sibujur. Sukat sukat bujur sini maksud pemasmur labo berarti manusia si la erdosa, tapi si bujur maksudna eme kalak si ngelakoken singena ate Dibata dingen sierkiniteken ras erpengendes man Tuhan.
Geluh kalak bujur desken batang kurma si ertunas, Ertunas ertina kebujurenna isusurkenna ku anak ras kempuna simaba ate kalak malem.
Mehumur perturahna tah pe bagi batang cemara i Libanon, la pernah kerah erkiteken Dibata mpereh embun ras udan sierbanca bulungna tetap meratah. Nandaken pasu pasu Dibata la pernah ngadi maler man bana. Tah pe bagi batang kayu siturah i bas Rumah Tuhan, lalap meratah dingen paguh, aminna pe enggo metua tetap erbuah. Erkiteken enterem sireh ku Rumah Tuhan mereken pupuk sierbahanca mejile perturahna dingen tetap meratah bulungna. Emaka geluhna tetap erguna man kalak sienterem. Bagem iandingken kalak singandalken Tuhan, la pernah aru atena, tapi tetap meriah akapna erkiteken igejapna Dibata simpekena – kenasa.
Kalak bujur lalap merincuh erbahan simehuli, kuga maka lit gunana geluhku man kalak sideban bage bas ukurna. Gia umur enggo meganjang tapi tetap la atena ngadi erbahan simehuli. Kal nge ndia sibanci kuban man teman, gelah erguna geluhku bage atena. Bagem perbahanen Dibata nandangi kalak sibujur dingen erkemalangen man baNa. Geluh kalak si erkiniteken, tetap jadi pasu pasu man kalak sienterem gia umur enggo metua. Umur metua labo menghalangi guna erbahan mehuli. Sebab erbahan mehuli labo lit batasenna.
Perbahanen simehuli e rikutken gegeh si lit i bas sekalak-sekalak jelma. Singggo lanjut usiana tentu labo bali ras kalak singuda si produktif denga, tapi rikutken gegeh si lit denga. Perbahanen simehuli kalak si metua, man tatap – tatapen saja pe enggo nambahi semangat man kalak singuda. Apai denga ilakoken orangtua e simehuli alu cirem, kerina e mpeturah semangat simbaru man kalak singuda.
III. PENGKENAINA
Tep- tep manusia reh tuana daging ibaba, gegehna erurakna, pengidah erkaburna, cuping erpasekna, selera man pe erkurangna, pertunduh pe lanai badeh, medak tengah berngi banci asa terang lanai tertunduhken. Raduken ras sie penakit pe rusur lit, tentu biaya pertambar pe erbuena. Perdalan pe enggo terbatas tah ibatasi, lanai banci rate – ate kuja ate.
Adi secara alami pasti kerina e ngkurangi kemalemen ate. Tapi labo tertutup kemungkinen kune kita nggeluh i bas Tuhan ertuana daging ibaba reh megedangna ateta nggeluh. Sabab metua eme perkuah ate Tuhan, sabab labo kerina kalak nggeluh seh metua.
Ngataken bujurlah kita lalap, kita enggo seh ku usia Saitun. Ula kal kita mela metua, ula mela reh ku PA Saitun. Sebab lit piga piga teman umurna enggo umur Saitun, tapi la ia nggit ku PA Saitun alu alasen megegeh denga aku nina. Gia kita enggo Saitun tetap megegeh denga, kataken bujur man Tuhan sebab e pemereNa kap, Ulin nge megegeh denga kita ku Saitun gelah banci ka sitegu Saitun lanai megegeh. Ma ulin nge kita negu asa itegu?.
I bas kita enggo Saitun ula kal kita menganggap lanai lit gunana i bas jabu, gereja tah i bas masyarakat, gia umurta lanai usia produktif. Kita meherga kal ilebe – lebe Dibata, meherga ilebe – lebe kalak sienterem. Janah mate pe kita meherga ilebe lebe Dibata (Masmur 116:15).
Ula min bas kita nari erbahanca kita la meherga. Kai arus sibahan gelah erguna geluhta, mari silakoken. Adi la arah gegehta arah pengerananta lah gia. Gia daging kula enggo reh burukna tapi kinitekenta banci reh paguhna. Emaka i bas dahin Gereja ras masyarakat labo berarti lanai banci kita ikut muat bagin, silang-langna mpersingeti silupa teman, tah pe ngajarken kalak sisalah gelah robah, ntah pe jadi pendoa syafaat.
Sitotoken Gerejanta, kutanta, kenakalen remaja i bas kutanta, sitotoken serayan Tuhan, sitotoken negara ras bangsanta rikut ras pimpinenta rsdna. Ertoto eme dahin siergegeh guna kemajun Gereja. Nina Martin Luter ertoto e berarti 50% dahin enggo dung. Emaka tetap ras tutuslah ertoto.
IV. PERTOTON
Bujur Tuhan i bas umur kami enggo meganjang, ola kal kami itadingkenNdu gelah ngasup kami ermomo kerna perbahanenNdu simbelin. Layasi ukur kami gelah malem ate kami i bas kinituan kami, dingen jadi pasu pasu man jelma sienterem. Amin.
V. SHARING/ EVALUASI KEGIATEN TEPTEP WARI.
- Sikapken selembar kertas tulisken kai enggo ibahanndu selama 24 jam i bas sada wari enda.
- I bas lembaren timbal balikna evaluasi kai sienggo ilakoken simehuli, kai silamehuli. Jenari tulisken ka kai atendu si ilakokenndu ku lebe enda.
- Totoken gelah ngasup kam ngelakokenca.
- Gejapken uga riahna dingen malemna, kune kam jadi pasu -pasu man kalak sideban.
VI. USULAN LAGU
- KEE No. 182:1-3
- KEE No. 303:1-3
- KEE No. 369:1-3
Pdt. Diman Ginting/ 08126350496
Tiga jumpa ku Sukadame..
Merga Ginting ilebuh mburak…
Seh gelah geluhta jumpa dame..
Pedauh biak anceng, cian cekurak… (Teger)