BIMBINGEN PA SAITUN 10 – 16 Maret 2024

Bangga menjadi Saitun

(Dari Saitun untuk Saitun)

Bangga menjadi Saitun (dari Saitun untuk Saitun)
Ogen: Pilipi 4: 12 – 13
Tema: Malem Ate I bas Kerina Keadan
Tujun: Gelah Saitun:

1. Ngidah uga belinna kengasupen Rasul Paulus ngalaken kerina keadan
2. Ngusih kengasupen Rasul Paulus i bas ngalaken perubahen jadi saitun
3. Mbangun kiniersadan si megegeh sapih-sapih Saitun
   Metode : Diskusi

I. BENA KATA
Sekalak Saitun ngerana man ndeharana, “O Mak kai nindu ndai? Erjabab ndeharana, “La kin begindu Bapak Sayaannggggg. Tiap wari kita erjengil pengelako la erpemegiii… yohhhh. Pake min alat pemegi cupingnduuu sayanggg”.
Bapa, “Lanai kap kubegi ehh, nce lanai kap kuidah ja alat pemegi ku ndaiii “.
Enda ntah sekelumit denga nge keadan Saitun, i ja nai ia nggo biasa bagi perik si dua-dua. Kenca nggo Saitun mbue kel perubahen si man alanken subuk kerna gegeh ntah pe kesehaten daging kula bage pe sidebanna. Banci denga nge si ban meriah ukurta bagi si gel gel? Ntah aminna nggo tading si sada kita jadi sekalak Saitun, uga ngalaken keadan kurang gegeh kulanta? Mari si orati Kata Dibata gelah siugapana pe keadanta, ngasup kita ngalakenca terlebih meriah ukurta sabab Tuhan mpelimbaruisa.

II. MPEBAGESI OGEN
Paulus bas pengogenta tuhu ngenanami kiniseran si mbages kel suina nanamna adi secara perukuren manusia. lja i bas penjara me ia paksana nuratken kerna penggejapenna i bas Tuhan. Penjara si lit bas jamanna e tuhu labo bagi si gundari, bentukna erlubang janah i bas lubang e sekalak ngenca siat, mungkuk ka ia bas lubang penjara e. Tapi si banci jadi kemamangen man banta eme kerna pusuhna bagi kalak bebas, si ermeriah ukur nuratken kerna Dibata si i sembahna. Uga maka banci Pauluse bage? Paulus sendiri ngatakenca, “Kueteh nge kai ertina nggeluh i bas kekurangen, janah kai ertina nggeluh i bas kelebihen. Nggo kudat rahasiana, seh maka i ja gia ntah katawari gia, malem ateku subuk paksa aku besur bage pe paksa melihe, subuk paksa aku kelebihen bage pe paksa kekurangen. Ngasup aku ngalaken
kerina keadan erdandanken kuasa si ibereken Kristus man bangku.
Adi si gargari pusuh Paulus tempa kita pedempak ayo ras ia, uga nge ekspresina bas paksa ia ngerana e? Adi bagi si ikatakenna enda ndai, banci si pastiken, malem kel ateta pe natap ayona, ngkai? Sabab katakenna 1. Nggo ia ndatken pengertin, erti nggeluh i bas kekurangen, bagepe erti nggeluh bas kelebihen. 2. Nggo ku dat rahasiana, adi kerna besur ntah la besur lanai masalah bas ia. Uga maksudna? Eme gelah kita ras-ras ngertiken kerna daging kula enda labo si utama. Jadi kai erti si banci pelebeken gelah dat pengertin enda? Tangkas ijawab Paulus, ngalaken kerina keadaan e erdandanken kuasa si ibereken Kristus, man bana. Eme gegehna. Eme pengarapenna si la pernah peltep janah eme si pentingna bas geluhta enda. Kuasa Kristus me si mereken ukur si mbaru, pengertin si mbages, mulahi kita bas kiniguluten ukur si ngerim-rim kita.

III. PENGKENAINA
Selaku Saitun, cubaken dage si ukuri kerna belinna pemere Tuhan man banta. Si hitung saja piga umurta, kaliken warina, ma lanai terbeligai? Bageka adi kita erkesah, nggo piga tahun? Adi kita rukur ka, nggo piga tumba si pan nakan? Nggo piga galon lau masuk ku dagingta? Lanai teritung. Bujur si kataken man Tuhan Dibata simeganjangna sebab nggo bage buena pemereNa man banta. Paulus nuratken kata si mehuli, si dem kiniteken man perpulungen Pilipi. Suratkenna kerna keriahen ukur nggeluh i bas Tuhan janah e jadi berita si ipesehna man kerina perpulungen i Pilipi. Adi kerna kita, berita kai nge sibanci ipeseh kita man kalak sideban kerna perbahanen Dibata i bas geluhta? Banci nge idah kalak sideban, maka kita enda sekalak Saitun si tetap ermeriah ukur i bas keadan sikugapana pe? Pengarapen si la pernah peltep man Dibata, tentu mpengasup kita encidahken dirita selaku Saitun si ngasup ngataken bujur man Tuhan amin kai gia kecibal geluhta. Emaka ula susahi banta, ingetlah kerna pemere Tuhan si nggo mbelin ialoken kita janah tetap setia natap kempak la gelah kegeluhenta dem alu keriahen ukur

IV. PERTOTON
Tuhan Bapa kami sini Surga, arah kataNdu mabai kami gelah meriah ukur bas kiniseran, baik kerna jadi Saitun, si dem perbeben kerna ngadapi keadan daging kula si lanai nukah erban kai pe. Lanai kami banci rate – ate kerna perdalan kami, lanai kami rate – ate kerna ngawatken awak kami. Bas Kam kami mindo ngasup ngataken bujur bas kidekah geluh kami, sebab nggo pernah kami sehat, nggo pernah kami makeken daging kula enda guna erdahin guna ermeriah ukur, Emaka bas masa Saitun enda, kula si nggo lanai megegeh eme kini hagan kami bas Tuhan, erdalan bas Tuhan arah kiniteken kite – kite maba kami jore bas kataNdu, padanNdu, sura-suraNdu. Terpujilah gelarNdu sebab malem ate kami bas kerina keadan adi ras Kam Tuhan. Amin.

V. DISKUSI

1. Uga keadaan Paulus bas penjara? Meriah nge akapna kerna keadanna e? Mari si turiken janah si jadiken teladan man banta.
2. Kai tekadta kenca si eteh uga Tuhan make Paulus nehken keriahen bas Tuhan?
3. Mari Saitun ndaftarken kemalemen ate bas umur, keluarga bagepe perpulungen sebab Tuhan nggo nehken pasu-pasu Na.
4. Banci banndu bas cara erpantun. gelah ngasup Saitun mbangun kiniersadan si megegeh sapih – sapih Saitun.

Pantun: Buah nangka seh kel tebuna
I baba nande i juma nari
Kata Dibata seh kel perluna
Mari si dalanken genduari nari
(Ciptaan Nd Marina Ginting Rg. GBKP TUGU Jakarta Banten)

VI. USULAN LAGU
Nese di las Wari
Erlebuh aku o Tuhan i bas pertotonku
Carangku nggeluh lenga bo payo bagi ajarndu
Bagi remang erpagi2 nesei di las wari
Bage me aku Minterkel ndabuh adi reh perbebenku
Dage kai ndia kubahan nina ukurku
Endeskenlah kerina geluhndu man Dibata
Ula ter pagi-pagi, Dahikenlah gundari
Gelah tembe me pagi di reh wari pendungi
https://youtu.be/15dbrY-X5a8?si=-RonV_Ktjc]QZdh-

Pdt Julia P Tarigan, M. Si.

Saat ku tak melihat jalanMu, saat ku tak mengerti rencanaMu
Namun tetap ku pegang janji, Mu pengharapan ku hanya pada Mu
Hatiku percaya, Hatiku percaya..
Hatiku percaya, s’ lalu ‘ku percaya

Lord I will trust in You …

Lord I wiil trust in You.

Lord I will trust in You, My heart will trust in You