Ermegah Ukur Erkiteken Tetap Erguna
(Teologi Berkarya)
Galatia 6: 4 – 5
6:4 Baiklah tiap-tiap orang menguji pekerjaannya sendiri; maka ia boleh bermegah melihat keadaannya sendiri dan bukan melihat keadaan orang lain. 6:5 Sebab tiap-tiap orang akan memikul tanggungannya sendiri.
6:4 Sekalak-sekalak arus nguji lagu langkahna jine. Alu bage banci megah akapna kerna dirina jine alu la mbanding-mbandingken dirina ras kalak si deban.
6:5 Sabap sekalak-sekalak simaba babanna nge.
Ogen : Galatia 6:4-5
Tema : Ermegah Ukur Erkiteken Tetap Erguna
Tujun : Gelah Saitun:
- Meherga denga iakapna bana arah kal si banci ilakokenna sebab erguna man kalak si deban
- Ngasup ngataken bujur i bas kecibalna sigenduari alu la perlu banding -bandingken ku kalak si deban entah pe masa laluna
Metode : Study kasus
I. BENA KATA
Salah sada kebutuhen manusia i bas geluh enda eme adi kalak si deban nggit ngergaken ia. Erbage bage cara ilakoken manusia gelah banci iergaken kalak, misalna arah status sosial, ekonomi, jabaten entah pe kekuasan. Adi sigejaplah maka kai si lit i bas kita e sebagai alat gelah banci melala silakoken maka sie sada hal si mbelin kal gunana. Tapi bicara mejile pe status sosial, ekonomi, jabaten entah pe kekuasan bas ia, adi labo banci si e erban ia ernanam entah pe erguna man kalak si deban maka kedungenna kurang nge iergaken kalak ia. Tuhu banci saja i cidah – cidahkenna kai si lit i bas ia gelah mehaga tapi adi terjeng man bana ngenca si ngenanamisa itipuna kap bana. Sebab kai si lit i bas ia la lit ertina man sidebanna.
II. MPEBAGESI OGEN
Kehadiren anak-anak Dibata arusna erguna man temanna entah pe kalak si deban. Kalak si tek la banci nggeluh guna dirina jine tapi uga maka ia banci erguna man kalak si deban. Kita banci erguna man kalak si deban lit kap Kesah Sibadia si erdahin i bas kegeluhennta si mereken kengasupen ras ukur ersuruh guna ermediate nandangi temannta. Paulus ningetken man perpulungen si berlatar belakang Yahudi ras non Yahudi gelah ula erpengakap ia me si mehulina, si paling benar (Superioritas) asangken kalak si deban erkiteken statusna tapi kai pe labo lit ibanna. Perpulungen iergaken labo erkiteken mpeteruk kalak si deban, tapi erkiteken nggit ngangkatken kalak si deban
Paulus ningetken perpulungen gelah banci min ia mpenahangi baban geluh temanna. Carana eme alu nggit sisampat-sampaten. Tupung teman mberat baban geluhna ula ka muat kesempaten ras keuntungen guna dirina jine. Paulus pe ningetken maka i bas perpulungen enggo nampati teman, labo ka perlu ibanding-bandingken ku kalak si deban. Kerina kalak iarapken banci erguna nandangi temanna rikutken kengasupen ras kesempaten si lit i bas ia. Alu la mbanding-bandingken maka la lit i je turah keganjangen rukur ras kitik iakapna bana
Labo perlu menilai perbahanen teman gelah teridah tempa ulin ia asangken temanna. Kerina si ilakoken perpulungen situhuna ia sendiri pe banci ngujisa apakah enggo payo bagi singena ate Tuhan, enggo erguna man kalak si deban entah lang. Tuhu banci saja ipindo masuken i bas kalak si deban nari gelah kai si ilakokenna banci tuhu-tuhu erguna ras ernanam. Kerina si ilakoken perpulungen tangkas man Dibata emaka labo banci ibuni-buniken. Kerina perpulungen mpertanggungjawabken kai si ilakokenna i bas kegeluhenna, apakah ia nggeluh guna dirina jine ntah enggo erguna man sekelewetna.
III. PENGKENAINA
Lakoken kai si banci si lakoken i bas geluh enda sebage tanda maka enggo sialoken pemere Dibata i bas geluhta enda. Adi lit temannta si terdat ersalah maka labo perlu sipemela -melaken ia, ntah pe arah si e si upayaken gelah kita ipujiken lebih ulin asangen ia maka si pembarken kesalahenna man kalak si deban. Arusna kalak si erkiniteken justru negu-negu ia si salah ndai gelah mulihken ku dalan si mehuli, labo sipedauh i bas persadanta nari.
Kita la perlu mindo pujin entah pe pengergan i bas kalak si deban sebab si e reh sendiri erkiteken kalak si deban nggejapken kerehenta erguna ras ernanam. Kalak si deban ngergaken kita labo erkiteken mejile rupanta, mbue ertanta ntah pe meganjang pangkatta, tapi erkiteken perbahanen ras biak geluhta si tergejap man sekelewetta. E maka labo perlu mbue ngerana tapi mbue ngelakoken si mehuli. Megahlah siakap tupung banci denga kta erguna man kalak si deban. Megah siakap erkiteken tersampati, terpulahi ras banci sikelengi kalak sideban.
IV. PERTOTON
O Tuhan Dibata sampatindulah kami gelah i bas kerina kecibal geluh kami banci kami erguna man jabu kami, sangkep geluh, Gereja ras sekelewet kami. Bicara la ipujiken ras kurang iergaken kalak kami tapi tek kami maka kai si ilakoken kami la sia – sia sebab Dibata simasu – masu kerinana si iban kami. Amin
V. DISKUSI
Studi Kasus
Pa Sukses mbaru denga naik pangkat i bas pendahinna, emaka mbue ia ndatken fasilitas arah kantorna nari. Salah sada eme mobil inova si terbaru. Situasi enda erbanca terjadi perubahen sikap ras cara nggeluh I bas keluarga Pa Sukses. Turah keganjangen ukur ras lanai ia nggit bergaul ras tetanggana. I bas sada paksa lit tetanggana sakit janah perlu ibaba ku rumah sakit. Erdandanken wari enggo gelap janah lanai lit angkuten emaka reh me tetanggana ndai ku rumah Pa Sukses. Mindo penampat gelah banci itaruhken ku rumah sakit. Ndehara Pa Sukses ngalo ngalo tetanggana ndai ilebe-lebe rumahna. Ndehara Pa Sukses alu sinis ngaloi ranan tetanggana simindo penampat ndai, nina Ndehara Pa Sukses maka perbulangenna edenga mulih kantor nari, latih denga akapna janah sangana istirahat la banci iganggu, mobilna pe la banci I pake. Bagenda me kegeluhen keluarga Pa sukses kenca naik jabatenna janah tambah kinibayakenna lanai banci ideheri, lanai nggit nampati, janah lanai ermediate nandangi tetanggana. Erkiteken pengelakona enda maka keluarga Pa Sukses lanai lit temanna meriah ras si nggit ndeherisa.
- Engkai maka Pa Sukses lanai ermediate nandangi tetanggana siman sampaten kenca ia ersuksesna ras erbayakna?
- Biak kai nge siidah kita i bas temanta, seh maka si ergai kal ia.
VI. USULEN LAGU
- KEE GBKP No. 292: 2,3
- KEE GBKP No. 281: 1-
- KEE GBKP No. 254: 1,3
Enda menipes si kulit pia
Kutukur ndube i Tigabinanga
Adi nggo Saitun e me lanjut usia
Ermegah ukur erkiteken tetap erguna
Pdt. Rehpelita Ginting