Mate Ras Nggeluh I bas Kristus
Roma 6: 5 – 14
6:5 Sebab jika kita telah menjadi satu dengan apa yang sama dengan kematian-Nya, kita juga akan menjadi satu dengan apa yang sama dengan kebangkitan-Nya. 6:6 Karena kita tahu, bahwa manusia lama kita telah turut disalibkan, supaya tubuh dosa kita hilang kuasanya, agar jangan kita menghambakan diri lagi kepada dosa. 6:7 Sebab siapa yang telah mati, ia telah bebas dari dosa. 6:8 Jadi jika kita telah mati dengan Kristus, kita percaya, bahwa kita akan hidup juga dengan Dia. 6:9 Karena kita tahu, bahwa Kristus, sesudah Ia bangkit dari antara orang mati, tidak mati lagi: maut tidak berkuasa lagi atas Dia. 6:10 Sebab kematian-Nya adalah kematian terhadap dosa, satu kali dan untuk selama-lamanya, dan kehidupan-Nya adalah kehidupan bagi Allah. 6:11 Demikianlah hendaknya kamu memandangnya: bahwa kamu telah mati bagi dosa, tetapi kamu hidup bagi Allah dalam Kristus Yesus. 6:12 Sebab itu hendaklah dosa jangan berkuasa lagi di dalam tubuhmu yang fana, supaya kamu jangan lagi menuruti keinginannya. 6:13 Dan janganlah kamu menyerahkan anggota-anggota tubuhmu kepada dosa untuk dipakai sebagai senjata kelaliman, tetapi serahkanlah dirimu kepada Allah sebagai orang-orang, yang dahulu mati, tetapi yang sekarang hidup. Dan serahkanlah anggota-anggota tubuhmu kepada Allah untuk menjadi senjata-senjata kebenaran. 6:14 Sebab kamu tidak akan dikuasai lagi oleh dosa, karena kamu tidak berada di bawah hukum Taurat, tetapi di bawah kasih karunia.
Teks : Roma 6: 5- 14
Tema : Mate Ras Nggeluh I bas Kristus
Tujun : Gelah Mamre:
1) Meteh kerna kuga kin mate ras nggeluh i bas Kristus
2) Ngasup nggeluh bagi Kristus
- KATA PENARUH
Nggeluh enda merupaken kesempaten ras anugerah si arus dalani ras iperjuangken. Kematen labo akhir kegeluhen, tapi sada dalan guna ndatken kegeluhen. Kuga kita berjuang i bas kegeluhen enda guna ndatken kegeluhen arah kematen? Situhuna kekristenen i bas hakekatna e me merupaken sada proses kematen sope denga kita mate, sabap Jesus sendiri alu tegas ngataken maka ise atena ngikutken Ia arus mersan kayu persilang, ertina ngalaken kiniseran. Arah kematen Kristus, kita enggo isalihken i bas “budak dosa” nari jadi “temanNa” (ay 6). Adi ngerana kita kerna kematen, Nina Paulus “tentu enggo ietehndu maka asum kita iperidiken kita ipersada ras Kristus Jesus; ertina Pridiken e’mpersadaken kita ras kematenNa. Erkiteken si e maka kita enggo ikuburken ras Kristus arah lakon Pridiken ku bas kematen (ay. 3-5). ljenda jelas Paulus ngerana kerna karya keselamaten sini lakoken Jesus Kristus, - URAIAN TEKS
I bas bindu 6 enda Paulus menaken kata-kata alu kalimat penungkunen nina; kuga dage ninta genduari? Si usur-usur dage erbahan dosa gelah erbelinna lias ate Dibata? Penungkunen enda jadi erkiteken lit kemungkinen turah pikiren kalak Jahudi i bas ia megi kata Paulus i bas Roma 5:20-21, maka guna ndatken lias ate Dibata si mbelin e me adi reh buena ka ibahan dosa. Paulus alu tegas ngataken tentu lang! Alasen Paulus jelas, sabap kita enggo mate nandangi dosa. Mate nandangi dosa ertina sura-sura dagingta ntah pe “aku”nta si male e enggo ikut isalibken ras mate i kayu persilang erkiten Jesus Kristus si enggo nanggung kerina dosa manusia i uruk Golgota (3-5), kita lanai budak dosa (6), terbebas i bas kuasa dosa (7), lanai dosa ngerajai kulanta (12). Sabap arah perkuah ate Dibata enggo si aloken keselamaten e perban kita enggo mate nandangi dosa. E maka adi i bas Kristus kita enggo mate nandangi dosa, kuga ka kita nggeluh i bas kuasa dosa? Paulus mereken sada ketegasen, maka sebagai kalak si enggo ngaloken perkuah ate i bas Dibata nari, lanai nyaman nggeluh i bas dosa perban kegeluhen sini berekenNa e merupaken status si mbaru e me nggeluh i bas lingkungen kuasa Dibata, erkiteken persadanta ras Jesus Kristus (11).
I bas ayat 6, adi siperdiateken bahasa Indonesia lit dua istilah sini pake desus e me; si pemena: “manusia lama”, istilah enda nuduh kempak kegeluhen manusia si lenga ipelimbarui, keadan manusia sebelumna e me kegeluhen i bas dosa. Si enda me si ipakuken ku kayu persilang (ibunuh) ras Kristus gelah karina kalak si tek banci ngaloken kegeluhen si mbaru i bas Kristus ras dungna jadi manusia baru. Ertina lanai “aku”nta si male e si nggeluh, tapi Kristus me si nggeluh i bas dirinta (bd. Gal. 2: 20). Si peduaken e me, “tubuh I bas dosa”; istilah enda nuduh kempak tubuh manusia si ikuasai sura-sura daging si erdosa, janah si enda enggo iruntuhken seh maka kita lanai budak dosa (bd. 2 Kor. 5: 17; Ef. 4: 22; Kol.3: 9-10). E maka selaku kalak si enggo ersada ras Kristus lanai banci si pediat cara geluh si ndekah ngkuasai kulanta. Paulus megati ngerana kerna kegeluhen si ndekah i bas dosa ras kegeluhen si mbaru i bas Kristus. Ertina maka setiap kalak si enggo iperidiken ras tek man Jesus Kristus, kegeluhen si ndekah i bas dosa enggo ikut mate ras Jesus i kayu persilang. Janah kalak si enggo mate ras Kristus ikut ka pe ipekeke guna ngaloken geluh si mbaru, ertina ngaloken kegeluhen situhu-tuhu si la erkeri-kerin. Aminna pe Kristus la erdosa, inanamiNa erbage-bage kiniseran, ihina, igombang-gombangi erkiteken dosa-dosanta (2 Kor. 5: 21). I bas kematenNa, la mate nandangi pengaruh dosa; jenari arah kekekenNa, maka Ia enggo naluken kuasa kematen. Bage me pe kalak si enggo ersada ras Kristus i bas kematenNa enggo bebas i bas kuasa dosa guna nggeluh i bas kegeluhen si mbaru (ay. 4.5, 10)
Ay 8; adi kita mate ras Kristus, maka kita pe nggeluh ka ras IA. Nggeluh ras Kristus labo saja pagi kenca IA reh mulihken si aloken geluh si mbaru e, tapi genduari pe enggo si aloken geluh si mbaru i bas kulanta secara manusia. Adi Kesah Dibata si enggo mpekeke Jesus i bas si mate nari ringan ibas kita, maka Dibata si enggo mpekeke Kristus i bas si mate nari e la banci lang mereken geluh si mbaru man kulanta si arus mate e, arah kesahNa si ringan i bas kita e (bd. Roma 8: 11). Jaminen kegeluhen si mbaru ibenaken genduari nari ras terus berlangsung seh kerehenNa mulihken.
Ay 9; Paulus alu tangkas nuriken maka kenca Jesus enggo keke, maka IA lanai mate janah kematen lanai erkuasa nandangi IA. Berbeda ras kematen Lazarus. la ipekeke Jesus kenca 4 wari mate. Tapi kekeken Lazarus sifatna kentisik ngenca, sabap kedungenna mate ka nge ia. Sedangken Jesus, kenca IA mate ras keke i bas wari pe teluken, kematen lanai erkuasa nandangi IA, janah IA tetap nggeluh (bd. Ket. 1: 18)
Ay 10; ijenda Paulus mereken sada kesimpulen maka kematenNa e terjadi sekali saja ngenca seh rasa lalap janah kematenNa e nadingken kuasa dosa jenari kegeluhenNa e me kegeluhen ija Dibata si erkuasa.
Ay 11; dasar pikiren utama i bas ayat enda e me kiniersadan kalak si tek ras Krsitus Jesus i bas kematen ras kegeluhenNa. Erkiteken Si e, kerina kalak si tek enggo mate nandangi dosa ilebe-lebe Dibata, dingen iberekenNa kuasa guna ngelawan dosa ras nulak dosa jenari nggeluh guna Kristus.
Ay 12; erkiteken dosa enggo italuken, e maka kalak si enggo tek arus erjuang gelah dosa lanai erkuasa mulihken. Sabap dosa rusur ngerimrim arah sura-sura daging, e maka arus ilawan arah kiniteken man Tuhan. Enda banci ilakoken arah nulak kerincuhen kula, lanai ipakai ringringta guna ndalanken si jahat, ras jadi “budak” Dibata guna ndalanken si mehuli (ay. 18). Sabap kita lanai nggeluh i teruh Undang-undang, tapi i teruh lias ate Dibata (ay.14) - PENGKENAINA
Karya Kristus, e me kematen ras kekekenNa erkaiten ras geluh kekristenenta, i bas persadanta ras Jesus Kristus, ibenaken arah mate nandangi dosa ras iterusken ku bas kegeluhen guna ngelai Tuhan. Akunta si male e enggo berakhir arah kematen Kristus, kegeluhen si mbaru enggo ibenaken arah kekekenNa. Kematen Kristus e me kematen janah kegeluhenNa e pe kegeluhenta (Temanta: Mate ras Nggeluh I bas Krsitus). Adi kematen Kristus e me kematen nandangi dosa, tentuna kita pe enggo mate nandangi dosa, janah adi kegeluhenNa i bas kuasa Dibata, tentuna kegeluhenta pe arusna i bas ngena ate Dibata.
Adi kita enggo mate nandangi dosa ertina kita genduari enggo nggeluh i bas Kristus. Kita labo saja berjuang guna ngelawan dosa tapi arus ncidahken kegeluhen si erguna man Dibata. Lanai ngikutken kerincuhen daging kula, lanai ngendesken kulanta ipake dosa guna ndalanken si jahat, tapi ngendesken dirinta guna ipake Dibata ndalanken si mehuli, sabap e me persembahen si nggeluh rikutken si ngena ateNa (Roma 12: 1b).
Kai-kai saja kin si perlu iendesken man Dibata?
• Pikiren : Ngukuri kerna si mehuli e me si bujur, mulia, benar, bersih, mejile ras kerna si patut ipuji (Gal.4:8).
• Mata: Pengaruh mata cukup mbelin nandangi kula, e maka sipakelah matanta guna ngidah si mehuli
• Cuping: tetaplah kita ertedeh ate guna megi hal-hal si mehuli terlebih megi sora Dibata
• Dilah: dilah e tuhu kitik tapi mbelin pengaruna (Jak. 3: 5) dilah e bali ras api dingen ulu kejahaten (Jak. 3: 6a), e maka si endesken man Dibata gelah banci si pake guna ngataken bujur man baNa janah melasken kata-kata guna membangun kiniersadan i bas kegeluhenta si tep-tep wari.
• Tan ras nahe: tan ras nahenta e me si nentuken kai si ilakoken kita ras kuja kita erdalan.
Bage me pe ras kulanta enda si erbage-bage ring-ring rikut ras fungsina si itepa Dibata alu mehuli. Sipenting e me kuga kita mpergunakenca ku bas hal-hal si mehuli. Sipakekenlah kerina ring-ringta guna kemulian gelar Dibata si mada kegeluhenta. E maka dahinta genduari e me mpertahanken kemenangen e alu ngendesken geluhta gelah ipakeNa guna mpemaler keleng ateNa, alu bage kita enggo berkarya ras erguna man kalak si deban, sabap kita “mate ras nggeluh i bas Kristus”. - DISKUSI
1) Turikenlah pengertinta kai ertina “mate ras nggeluh i bas Kristus?
2) Kai-kai saja si perlu si lakoken gelah kita ngasup nggeluh bagi Kristus - USUL ENDE-ENDEN
1) KEE GBKP No. 323: 1,2
2) KEE GBKP No. 350: 1,2 Lembu menggali naik kereta
3) KEE GBKP No. 182; 1- Menahang akapna sibar nitatap
4) KEE GBKP No. 202: 1, 2 Enggo pe tersurat gelarta i gereja
5) KEE GBKP No, 295: 1- Tutus nge kepe maka siakap terakap
Pdt. Kasir Purba, S.Th.
HP/WA: 0813 6107 3551