Erlajar e me Orat Nggeluh
Ulangan 31: 11 – 13
31:11 apabila seluruh orang Israel datang menghadap hadirat TUHAN, Allahmu, di tempat yang akan dipilih-Nya, maka haruslah engkau membacakan hukum Taurat ini di depan seluruh orang Israel.
31:12 Seluruh bangsa itu berkumpul, laki-laki, perempuan dan anak-anak, dan orang asing yang diam di dalam tempatmu, supaya mereka mendengarnya dan belajar takut akan TUHAN, Allahmu, dan mereka melakukan dengan setia segala perkataan hukum Taurat ini,
31:13 dan supaya anak-anak mereka, yang tidak mengetahuinya, dapat mendengarnya dan belajar takut akan TUHAN, Allahmu, –selama kamu hidup di tanah, ke mana kamu pergi, menyeberangi sungai Yordan untuk mendudukinya.”
(Pendidikan)
Ogen : Ulangen 31:11-13
Tema : Erlajar e me Orat Nggeluh
Tujun : Gelah Saitun:
- Ngidah maka erlajar kidekah nggeluh e me orat nggeluh bangsa Dibata.
- Ergiah-giah njemba anak singuda gelah terus erlajar (formal ras non formal)
Metode: Diskusi
I. BENA KATA
Kinatana, la lit manusia beluh i bas kerina dampar, emaka lit rusur ibegi “tidak ada manusia yang sempurna”. Kalak si tek man Tuhan idilo ngelumbaken kesempurnan e i bas geluhta (menuju kesempurnan Kristus). Erlajar, e me salah sada dalanna, erlajar rukur, ngerana ras nehken perbahanen si mehuli dingen erguna gelah jadi kebiaken nggeluh. Adi ipergermetken i bas kegeluhen enda tentu melala kal si man pelajaren janah melala ka pengajar-pengajar. Erdandanken si e perlu kal palas si tepat i bas erlajar.
II. MPEBAGESI OGEN
Bahan PA-nta Minggu enda, nuriken kerna orat ras kearusen nggeluh bangsa Israel, e me erlajar. Erpalasken Ulangen 31:11-13 ituriken maka:
- Ogeken undang-undang sanga bangsa e reh ersembah, ertina aturen ersembah e me ngogeken undang-undang (la banci lang).
- Pepulung kerina dilaki ras diberu bage pe anak-anak gelah megiken undang-undang ras erlajar mehamat man Tuhan dingen ngikutken pengajaren Tuhan alu tutus. I jenda teridah maka bangsa Israel idilo gelah kerina dilaki ras diberu bage pe anak-anak (ertina kerina bangsa enda la lit si tading) arus megiken undang-undang, mpelajarisa janah ngikutken pengajaren e alu tutus.
- Tujunna e me, gelah kerina megi dingen mpelajarisa, ngikutken Tuhan kidekah geluhna i negeri si nandangi iingani i kepar Lau Jordan. Ertina palas nggeluh e me undang-undang Tuhan, emaka arus ipelajari dingen iikutken. Undang-undang e jadi palas i bas kegeluhen.
Arah kerina siituriken i datas teridah maka lit kata sipenting e me kap ogeken, pepulung, megiken, erlajar, mehamat ras ngikutken pengajaren. Kerina enda kata kerja (guna ilakoken) alu tujun gelah bangsa e mehamat man Tuhan dingen ngikutken pengajaren Tuhan alu tutus, sabab e me sipentingna man bangsa e. Mehamat man Dibata e me kearusen nggeluh, janah e ibahan jadi kebiaken (biak) nggeluh. Enda me jadi orat geluh bangsa Israel.
III. PENGKENAINA
Erpalasken Kitab 2 Samuel 7:23, ituriken maka la lit sada bangsa sideban i babo doni enda si seri ras Israel, enggo ibebasken i bas perbudaken nari, jadi bangsa Dibata, jadi bangsa si mbelin ras mbisa. Kecibal bangsa Israel sibagenda rupana erdandanken orat geluhna eme erlajar ras ngikutken alu tutus undang-undang dingen mehamat man Tuhan.
Kita kerina bangsa Dibata, itamakenNa nggeluh i doni enda jadi perkakasNa guna ncidahken kemulian ras keleng ateNa. Geluhta arus erguna man kalak sideban (bagi nina i bas sasaran pelayanen GBKP 2024). Gelah banci erguna tentu arus melala erlajar gelah sieteh kai si arus ibahan, gelah kreatif i bas ncibalken geluh, arah rukur ngerana ras perbahanen.
I bas umur si enggo gedang, arus tetap erlajar, sabab e me orat nggeluh kalak si tek. Rikutken situasinta banci kita tetap erlajar kerna Kata Dibata, ngoge Pustaka. Erlajar ngaloken kecibal geluh si lit, umpamana gegeh nggo reh urakna, perduiten lanai bagi sigel-gel, tiwen mekatep mesui, anak-anak ndauh i bas kita nari, melungun, erlajar kita gelah ngasup ngaloken kerina keadan enda dingen ngataken bujur. Janah si pentingna i bas sie, palasta erlajar eme kap Kata Dibata, pengalamen geluh, ercakap ras teman-teman si sada kiniteken.
Alu pentar dingen saber, iajarken, ipersingeti ka pe anak-anak singuda gelah ergiah-giah erlajar kerna Kata Dibata dingen ndalankenca, erlajar ersangkep nggeluh, erlajar kerna uga erteman ras sidebanna.
Adi lit anak singuda si paksana sekolah SD, SMP, SMA ntah kuliah, arus i jemba gelah tutus erlajar dingen makeken kesempaten si lit, gelah rulih i bas paksana. Kerina e ilakoken alu saber dingen la erleja-leja, alu bage maka anak singuda la matah kata, i bas kita nari selaku orangtua kerina megiken megiken kata ajar si mehuli. Kata ajar siisehken e, pasti erbuah bicara la gia genduari, i bas waktuna pagi erbuah dingen rulih.
Emaka mari sipakeken kesempaten si lit guna tetap erlajar dingen mereken pengangkan man anak singuda gelah tetap tutus erlajar sabab pemeteh (pendidiken) banci maba ku kegeluhen si mehuli.
IV. PERTOTON
O Tuhan sijadi ulu kepentaren, ajari aku gelah tetap nggit erlajar gelah aku reh pentarna, janah bere kengasupen man bangku guna njemba anak-anak singuda, si lit isekelewetku gelah tetap nggit erlajar kerna undang-undangNdu bage pe kearusen nggeluh. I bas Jesus kami ertoto. Amin.
V. DISKUSI
- Rikutken bahan ogenta, engkai maka kita arus tetap erlajar. Turikenlah.
- Lit anak-anak singuda kurang semal i bas geluhna erlajar, cuba diskusiken kai si arus ibahan gelah nggit dingen tutus ia erlajar.
- Pergermetken anak-anak singuda si lit isekelewetndu, emaka lakokenlah man bana jabab no 2 ndai.
VI. USULAN LAGU:
- KEE No. 198:1-3
- KEE No. 286:1,2
- KEE No. 249:1, 2
Pdt. Jennie br Keliat