MAKE SUKAT-SUKAT SI MEHULI
(Sasaran Pelayanan GBKP Tahun 2024)
Lukas 6: 37 – 38
Hal menghakimi
6:37 “Janganlah kamu menghakimi, maka kamupun tidak akan dihakimi. Dan janganlah kamu menghukum, maka kamupun tidak akan dihukum; ampunilah dan kamu akan diampuni.
6:38 Berilah dan kamu akan diberi: suatu takaran yang baik, yang dipadatkan, yang digoncang dan yang tumpah ke luar akan dicurahkan ke dalam ribaanmu. Sebab ukuran yang kamu pakai untuk mengukur, akan diukurkan kepadamu.”
A. PERSIKAPEN
B. PERPULUNGEN JABU-JABU
- Rende: KEE No. 424:1 (ibabai tuan/nyonya rumah)
Ipuji kami Kam Dibata si mbelin
Alu ende-enden si meriah
Suari ras berngi Kam si’ngkawal kami
E maka la celus bas percuban
Reff: Sangap kap kalak si ‘rnalem baNdu e
Daten tuah ras kesenangen pe
Sangap kap kalak si ‘rnalem baNdu e
Daten tuah ras kesenangen e - Ertoto ibabai tuan/nyonya rumah
- Ngoge Kata Dibata: Lukas 6: 37-38 (ibabai tuan/nyonya rumah)
Renungen
Tema: Make Sukat-sukat Si Mehuli
Sasaren pelayanen GBKP tahun 2024 e me ‘berkarya dan berguna untuk orang lain’. Arah sasaren pelayanen enda nuate gelahna kerina anggota GBKP muat bagin encidahken orat geluh si erguna nandangi kalak si deban. Sasaren enda banci tersehi kune i bas teptep ngawan perpulungen GBKP enggo lit pengangkan maka kita kerina tinepa Dibata si irakut i bas kiniersadan. I bas pengerakut kiniersadan e teridah min orat geluh si erdiate, si sampat-sampaten bage pe erdahin ras-ras (kerjasama). Kerjasama labo terjeng sapih-sapih kalak Kristen, tapi rasa kerina kalak guna mpetirah kegeluhen si terulin. - Arah renungen PJJ sekali enda tole isehken man banta kerna kai-kai si arus ilakoken selaku kalak si erkiniteken, e me kap:
- > Ola isalahkenndu kalak si deban, maka kam pe pagi la isalahken Dibata
Selaku kalak Kristen iarapken maka i bas njagai kiniersadan ras kalak si deban ola min ibelinken ngenehen kesalahenna, sabap teptep jelma labo lit si serta. Kinata kegeluhen megati denga manusia ngenehen kalak si deba alu dua erbage, e me kap positif ras negatif. Kalak Kristen arus ngidah kalak si deban alu positif. Adi lit biakta ngenehen kesalahen entah kekurangen kalak si deban maka mahan bana lanai teridah si mehuli si lit i bas kalak si deban. Kedungenna banci mpeturah perubaten. Dibata pe itandaina kal manusia tinepaNa si dem salu kekurangen e maka tetap nge ikelengi ras isampatiNa.
> Ola ukum kalak si deban, maka kam pe pagi la iukum Dibata
I bas nalahken kalak si deban maka kedungenna isehken me ukumman bana. Adi ibelinken kesalahen ras ukumen, tentuna lanai lit i je kekelengen. Perlu si eteh maka ndauh kal belinen keleng ate Dibata asangken pernembeh ateNa. Jadi selaku kalak Kristen pe arus ngusih perbahanen Dibata.
> Alemilah kalak si deban, maka kam pe ialemi Dibata
Biak ngalemi enda perlu ilumbaken kalak Kristen. Sabab Dibata pe tetap ngalemi kalak si nggit ngakuken dosa-dosana, jera dingen robah. Tetap ibereken kesempaten man kalak si deban guna mpelimbarui geluhna.
> Berelah kalak si deban, maka kam pe pagi ibere Dibata I bas kegeluhen enda arus ilumbaken nggeluh si sampat-sampaten sabab labo sada lit manusia si serta. Kiniliten si lit i bas kita e me pemere Dibata. Sura-sura Dibata segelah pemereNa e si pakeken guna mere man kalak si deban.
> Sukat-sukat si ipakekendu e ka nge isukatken man bandu
Ngerana kerna sukat-sukat sinimaksudken e me kerna kai-kai sinibahan kita man kalak si deban e ka me pepagin sialoken i bas Dibata nari. Perbahanenta nandangi kalak si deban, encidahken perbahanenta man Dibata. Tangkas kal sukat-sukat si arus ipakeken selaku kalak Kristen e ola nalahken, ola ngukum, nggit ngalemi ras nggit mere. Enda me sukat-sukat sui mehuli si man pekeken I bas kegeluhen.
- > Ola isalahkenndu kalak si deban, maka kam pe pagi la isalahken Dibata
- Pengajaren Tuhan Jesus enda me si pakeken i bas kegeluhenta. Tuhu metahat guna ndalankenca, tapi ulihna tuhu-tuhu maba kiniulin man kerinana. Kiniersadan i tengah-tengah jabu, sangkep nggeluh, perpulungen (gereja) ras I tengah-tengah masyarakat tuhu-tuhu encidahken kegeluhen si sempabu. Kalak Karo i bas manteki perkade-kaden ras kalak si deban pe tuhu tangkas kal teridah, maka perkade-kaden e irakut alu telu dalan e me: perkade-kaden arah perjabun ras perkade-kade arah teman meriah. Banci ikataken maka kerinana si kade-kaden.
Mari dage si pakeken sukat-sukat si mehuli i bas kegeluhenta, segelah itandai jelma si nterem kita selaku kalak si erkiniteken man sekelewetta. Sasaren pelayanen GBKP tahun 2024 mabai kita lanai rukur kerna dirinta saja tapi ernanam ras erguna man kalak si deban. Alu bage ku lebe enda mari si peteguhi kiniersadanta ras kalak si deban (gereja-gereja tah agama si deban) guna kerjasama i bas program-program si maba kiniulin man kerinana. Umpamana: njagai keamanen lingkungen ingan tading (jaga malam), aksi kebersihen (gotong royong), penanggulangen bencana, mberantas judi ras NARKOBA, MIRAS, prostitusi ras debanna. GBKP bekerjasama ras gereja ntah agama-agama si deban guna nehken masuken man pemerentah (suara kenabian) kerna persoalen-persoalen si lit i tengah-tengah masyarakat. Segelah kerinana teridah ersada ras paguh guna njadike kegeluhen si terulin. - Ngawan ni Perpulungen nuriken penggejapen
- Diskusi
- Turiken kai-kai saja sukat-sukat si mehuli erpalasken Lukas 6:37-38!
- Turiken kai-kai saja ulihna adi si pakeke sukat-sukat si mehuli i bas geluhta!
Kesimpulen ibabai Pandita/Pertua/Diaken
Nehken Persembahen
Rende: KEE No. 296:1,3
Man baNdu Jesus Tuhanku, kuendesken geluhku
Ukur ras perbahanenku, geluhku Kam si mada
Kempak Jesus kerinana, geluhku Kam si mada
Menaken ku tare Jesus, kutadingken dosangku
Man baNa aku ernalem, IA Jurus’lamatku
Kempak Jesus kerinana, IA Jurus’lamatku
- Pertoton Persembahen (ibabai sekalak mamre)
- Momo
- Pertoton sapaat idungi alu pertoton Tuhan, ibabai Pandita/ Pertua/ Diaken.
• Kerna si mada jabu ras si turah I bas perpulungen
• Notoken sasaren pelayanen GBKP tahun 2024 ‘berkarya dan berguna untuk orang lain’.
• Gelah kegeluhen i tengah-tengah keluarga, perpulungen (gereja) ras masyarakat lit I bas dame. - Kenca dung PJJ, Snack (Adi lit)
Pdt. DR Kalvinsius Jawak
HP/WA : 081361419249