Engkelengi Ras Erteman
Matius 5: 46 – 48
5:46 Apabila kamu mengasihi orang yang mengasihi kamu, apakah upahmu? Bukankah pemungut cukai juga berbuat demikian?
5:47 Dan apabila kamu hanya memberi salam kepada saudara-saudaramu saja, apakah lebihnya dari pada perbuatan orang lain? Bukankah orang yang tidak mengenal Allahpun berbuat demikian?
5:48 Karena itu haruslah kamu sempurna, sama seperti Bapamu yang di sorga adalah sempurna.”5:46 Sabap adi si ngkelengi kam saja ngenca ikelengindu, man kade Dibata mbalas perbahanenndu e? La kin kalak si muat cuke pe bage ka nge perbahanenna?
5:47 Janah kai kin lainna kam ras kalak si deban adi ras temanndu saja ngenca kam siperkuanen? Kalak si la nandai Tuhan pe bage nge perbahanenna.
5:48 E maka kam arus serta bagi Bapandu si ni Surga pe serta.”
Ogen : Matius 5: 46 – 48
Tema: Engkelengi Ras Erteman
Tujun : Gelah Saitun:
- Ngangkai pengajaren Jesus kerna engkelengi ras erteman
- Ngasup engkelengi ras erteman gelah erguna man ise pe (teman ras imbang)
Metode : Meditasi
I. BENA KATA
Ngerana kerna engkelengi nuduhken kita jadi pelaku (subyek) sinehken kekelengen e, labo ikelengi (objek) singaloken kekelengen. Sienda ngatakenca maka kita kalak si erkiniteken iarapken jadi “siengkelengi” kalak sideban, labo singarap-ngarapken kekelengen i bas kalak sideban nari. Engkelengi termasuk kata kerja i bas bahasa Indonesia, e maka engkelengi banci ikataken sada dahin, si erbahanca kalak si engkelengi eme pelaku aktif guna nehken kekelengen. Sementara erteman eme kalak si ngasup nggeluh bersosial ras kalak sideban. Erteman pe iperluken ber “jiwa besar” i bas kita, gelah ngasup ka kita erteman ras kerina kalak termasuk pe la bagi ukurta. Kuga enda barnci sidalanken? Enda me si jadi renungenta i bas bahan PA-nta wari enda.
II. MPEBAGESI PENGANGKAN KERNA OGEN
Bahan PA-nta wari enda termasuk ku bas “pengajaren Jesus idatas uruk”. Sieteh maka khotbah Jesus i datas uruk eme khotbah si igelari “luar biasa ras erlawanen ras kebiasan umum”, ertina arah kotbahNa Jesus ngajari pengikutNa la terjeng ndalanken kebiasaan paksa si e. Tapi lebih asa si e umpamana: khotbah kerna ketuahen kalak si nggejap maka labo kai pe ertina ilebe-lebe Dibata (Maz.5: 3). Padahal sedekah enda niakap kalak Jahudi maka ia me kalak si mehagana ilebe-lebe Dibata janah kalak sibage me si ngena ate Dibata. Ertina kai sipahami kalak Jahudi tupung si e langa payo iakap Jesus. Salah sada pengajaren/ kotbah Jesus sierlawanen ras kebiasan jelma sinterem eme inti bahan PA-nta wari enda eme “ngkelengi imbang”. Imbang i bas jaman si e eme musuh, siperkuanen pe labo, jumpa pe la ia ersura apaika engkelengi. La pedah ras imbang, kinata kalak Jahudi ras kalak siiakapna la seri ras ia ras ia pe la ia nggit erteman, apaika ras imbang, Guna ngobah cara rukur si bage me Jesus kotbah man ajar-ajarNa bagepe kalak si ndube ngikutken la gelah beda carana rukur. Nina Jesus: “Adi siengkelengi kam saja ngenca ikelengindu, man kade Dibata mbalas perbahanenndu e? Kai kin bedana kam ras kalak sideban adi ras temanndu saja ngenca kam siperkuanen? (ay.46). Bagenda me gambaren kegeluhen si normal tupung sie, ija pemungut cuke ras kalak perdosa si la nandai Dibata pe bagenda perbahanenna. Sura-sura Jesus gelah ajar-ajarNa encidahken kegeluhen si lebih asa si e eme erteman ras engkelengi imbang. Adi iukuri alu mbages tentu selaku ajar-ajar Jesus arusna kegeluhenna beda i bas sisi positif ras kegeluhen si biasa. Adi seri nge ajar-ajar Jesus ras kalak sideban maka labo lit alasen Dibata mbalas perbahanen si biasa-biasa enda. Malah lebih tegas ikataken Jesus: man kade Dibata mbalassa!
Sura-sura Jesus lebih mbages ikatakenna i bas ayat 48 eme “kam arus serta bagi Bapandu sini surga pe serta”. Ayat enda encidahkenca maka Jesus ngarapken maka kegeluhen ajar-ajar arusna ngusih biak Dibata. Dibata si tetap ngalemi kalak si erdosa man baNa, dingen tetap encidahken keleng atena man kerina manusia; subuk perdosa bagepe kalak si tek. Misalna; udan, las matawari, rejeki, bagepe kesah tetap iberekenNa man kerina manusia alu la erndobahen.
III. PENGKENAINA
Pengajaren Jesus i bas wari enda tuhu-tuhu jadi persinget kal man banta kerina. Sebab banci jadi kerina nge kita ngalami sibagenda rupana; la kal gia musuh, kalak si la bagi ukurta enggo pasti lit. Banci jadi sedekah enda mesera kal siakap erteman ras “imbangta” sabab si inget lalap kuga ia nokohi
kita, erbahan ceda tah mesui ateta. Mesera kal siakap ngelupaken perbahanen kalak si la mehuli man banta, e maka terkuan turah “akar pahit” i bas pusuhta. Mari kita rukur mbages, kai kin nilai positifna lit imbangta? Perlu siinget maka kalak si ndeher ras kita nge biasana maka banci jadi “sikitiken ukur” ras kita. E maka si biasa la siperkuanen eme: eda ras beru, ersenina-turang, er-orangtua, er-permen, er-anak beru, er-kalimbubu, sebalengen, ras sidebanna. Janah kitik ukur ipeturut rurat bas pusuh banci jadi la siperkuanen berkembang ku perasaan “imbang entah musuh” La kal ngena ate Dibata biak sibagenda, emaka selaku kalak si erkiniteken iajukna kita gelah nggeluh engkelengi ras erteman ras kerina jelma aminna pe la bagi ukurta. Adi lit lah kekelengen i bas pusuhta tentu ngasup kita ngaloken kalak sideban kuga ia lit na. Bali ras Jesus ngasup ngaloken kita kalak perdosa erkiteken la sampur i bas kekelengenNa.
IV. PERTOTON
O.. Tuhan, ngaku kami maka megati kal kami la ngasup ngalemi kalak si encedai pusuh kami. Mesera akap kami ngelupaken perbahanenna si la mehuli si ilakoken kalak sideban man kami. Erlajar kami ngalemi salah kalak man kami Tuhan, pegegehi kami kerina, amin.
V. MEDITASI
Asa bancina lit pemimpin PA si bani mabai meditasi enda dingen banci iiringi musik.
- Mari dage sirenungken, kuga nge sedekah enda perasanta adi lit anak jabunta erbahan ateta mesui? Mari situriken man Tuhan…
- Siinget-inget mulihi: ise saja si seh asa genduari si la terlupaken kita pengerana tah perbahanenna perban suina pusuhta ibahanna? Sebutken gelarna man Tuhan ibas pusuhta.
- Kataken man Tuhan kerina si igejapken kita man Tuhan… Jenari rusaha guna ngalemisa sebab e kal sura-sura Tuhan Jesus i bas wari enda.
- Itutup meditasi enda alu pertoton siipimpin serayan.
Pdt. Liza Selvina Br Tarigan