Ogen : Keluaren 23: 6-8
Tema : Milih Pemimpin si Pentar
Tujun : Gelah Mamre:
- Ngeteh kerna tempas pemimpin si mehuli ras si la mehuli.
- Sedar maka kepentaren milih pemimpin nentuken kiniulin dirina, keluarga, gereja, bangsa ras negara
6 Janganlah engkau memperkosa hak orang miskin di antaramu dalam perkaranya.
7 Haruslah kaujauhkan dirimu dari perkara dusta. Orang yang tidak bersalah dan orang yang benar tidak boleh kaubunuh, sebab Aku tidak akan membenarkan orang yang bersalah.
8 Suap janganlah kauterima, sebab suap membuat buta mata orang-orang yang melihat dan memutarbalikkan perkara orang-orang yang benar.
I. KATA PENARUH
Kemajun sada bangsa mbelin kal ngaruh pemimpinna. umpamana ibas kinitekenna man Tuhan karakterna (mehuli, meteruk ukur, ngukurken rakyat, ngena atena kebenaren, keadilan ras sidebana) Pemimpin si bage arus iperjuangken sabab adi la kita si mperjuangkenca, ise? Adi pemimpinna mehuli, maka rakyatna pe sikap. Janah sebalikna adi pemimpina jahat maka rakyatna jadi korbanna (ngenanami kiniseran). Tahun 2024, negaranta erbahan pesta demokrasi, pemilihen Presiden ras anggota Legislatif subuk tingkat Nasional, Provinsi bage pe Kabupaten
Kesuksesen Pesta Demokrasi enda mbelin kal pengaruhna ku bas peran aktifta, ketutusen ateta, ras uga kita ertanggungjabab man Dibata ibas mereken soranta. Kesuksessen si imaksud eme kap erdalan pesta e alu mehuli, tertib, adil ras ulihna pe mehuli (terpilih pemimpin si mehuli). Guna si enda, mari kita erlajar arah pengalamen kegeluhen bangsa lsrael ibas masa sulit bena-benana ia tading i taneh perpadanen.
II. URAIAN TEKS
Pemimpin si mehuli eme pemimpin si ‘ukurna (berpihak) man masyarakat’ perjuangan ras sura-surana guna kiniulin kalak sienterem.
a. Ayat 6 nina: Kalak Musil ndatken keadilen adi lit perkarana i pengadilen, ertina kalak musil
arus iperdiateken, aminna pe labo lit si man arapenken i bas ia nari, tapi la banci ia itadingken, isisihken entah pe iterlantarken. I bas situasi sigenduari banci ikataken enterem masyarakat si musil iI bas kesehaten, pendidiken, perditen, pendahin, ketreampilen, pengalamen, bage pe ibas keadilen. Kalak musil arus ndatken pembelaan erdandanken kerinasituasi enda, posisi strategis si banci mperjuangkenca e me pemimpin
b. Ayat 7 nuriken alu tegas kerna Dibata si erkeleng ate (berpihak, membela) kalak musil, nina
‘ula bahan-bahan kesalahenna, ola munuh kalak si la ersalah,’ Kata ula bahan-bahan kesalahenna ertina perdiateken, angkai kerna kecibal kalak musil alu payo, ula perbahan ia musil maka idarami kesalahen ras kelemahenna, sierbahanca la lit kesempaten man bana guna ndatken keadilen, kebebasen ras kesempaten bage pe ola bunuh kalak si la ersalah, ertina lit hak kalak si la ersalah e me hak guna nggeluh, mengembangken diri sue ras talenta si ibereken Dibata. Arah talenta si lit bas tep-tep kalak banci jadi dalanna guna ngenanami ulina doni si itepa Dibata, alu la lit tekanen ras penindasen. Man kalak si la ndalanken kebujuren, la erdiate, la engkelengi kalak musil, munuh entah pe ngambati kebebasen temanna manusia kalak si bage kalak jahat, kalak si ndatken ukumen ibas Dibata nari.
c. Ayat 8 nuriken kerna prinsip geluh kalak si tek, e me “la ngaloken uang sogok”, Bahaya
‘sogok’ e me nutupi kebenaren, si la ersalah isalahken janah si salah ibenarken. Kerina enda erbahanca doni enda sontar, ceda. La it ketenengen ras kedamen, la lit keteraturen. Kedungenna kegeluhen jadi erbana-bana. Sierkusa rate-ate makeken kuasana guna kepentingenna, kalak beyak reh bayakna, kalak musil reh musilna. Ibas Pustaka siBadia lit 20 kali ikataken kerna sogok. Bagem pentingna maka isuratken ernolih-nolih gelah ula ilakoken.
III. PENGKENAINA
Pemilihen pemimpin i negaranta subuk Kepala Daerah bage pe anggota legislatif ilakoken me bas waktu si lanai ndekah (tahun si reh). Selaku kalak si erkiteken kita ertanggungjabab guna mensuksesken dahin enda. I bas sada dampar kita selaku pemlilih, ibas sideban banci ka nge kita selaku kalak si ipepilihken (calon pemimpin). Selaku kalak si ipepilihken tuhu-tuhu mehuli kal sura-suranta e. Sabab e jadi bukti kita mereken diri guna mpekena-kena dingen erdahin, guna maba kiniulin gelah rakyat si rulo enda banci reh sikapna, reh ulina. Teridah dingen tergejab keadilen ras kebujuren bage pe kesejahteran banci ternanami ibas mperjuangken sura-sura enda. ula lakoken sogok.
Bage pe selaku pemilih arus i inget maka pilihenta nentuken kemajun 5 tahun entah lebih ku lebe enda. Emaka ula salah pilih, perdiateken alu pusuhta (hati nurani) ise si man pilihen, umpamana si la mereken sogok, sierkiniteken ras malang man Tuhan, ertanggungjabab, tek kita maka keleng atena rakyatna, tek kita maka ngasup ia nehken keadilen, bahanna kebujuren, mempunyai hati nurani, pentar, mehuli nggeluh ibas keberbagaian (suku, agama, Bahasa, adat budaya ras sidebanna), la mata duiten, la ngukurken dirina saja, lit pengalamen kepemimpinenna, ngasup ngalaken tantangen ras sidebanna.
Selaku pemilih kita ras seisi jabunta bage pe kalak si lit sekelewetta iajuk gelah alu ngaloken sogok. Ula dayaken soranta alu Rp 50.000,- entah Rp 100.000,- Rp 200.000,- ras seterusna. Duit si bagenda labo lit ertina adi bandingken ras pemimpin si mehuli. Sabab pemimpin si mehuli ertanggungjabab ras rutang pusuhna mpekena-kenana rakyatna. Perbahanenna e la banci ikira alu duit.
Persadaan Mamre lit i bas doni enda labo kebetulen, tapi lit sura-sura Dibata si mehuli ibas Mamre nari, salah sada eme mpekena-kena doni enda ras kerina isina. Cara ndalankenca eme mereken diri jadi pemimpin si ertanggunjabab ras milih pemimpin si banci mereken keadilen ras kebujuren.
Jadilah pemilih si pentar, cerdas, kepentaren milih pemimpin nentuken kiniulin dirinta, keluarga, gereja, bangsa ras negara. Adi la kita milih pemimpin alu pentar, kita pe enggo ikut encedai bangsanta, kuta inganta tading ras doni enda
IV. DISKUSI
- Erpalasken bahan PA-nta enda, turikenlah uga tanda-tanda sada bangsa ras negara si mehuli subuk pemimpinna ras rakyatna.
- Banci nge Mamre ikut muat bagin mensuksesken pemilihen tahun 2024 enda alu mpersada arih i bas keluarga bage pe ibas persadan Mamre guna masa depan kutanta? Lakokenlahl
V. USULEN ENDE-ENDEN
- KEE GBKP No 192: 1-3
- KEE GBKP No 301: 1-3
- KEE GBKP No 286: 1-2
- KEE GBKP No 424: 1-2
- KEE GBKP No 257: 1, 3
Penulis Pdt Jennie Elliyani Keliat S.Th
WA 081375523001