ERBERITA, ERKINITEKEN RAS KEKELENGEN
2 Timotius 1: 11 – 14
1:11 Untuk Injil inilah aku telah ditetapkan sebagai pemberita, sebagai rasul dan sebagai guru.
1:12 Itulah sebabnya aku menderita semuanya ini, tetapi aku tidak malu; karena aku tahu kepada siapa aku percaya dan aku yakin bahwa Dia berkuasa memeliharakan apa yang telah dipercayakan-Nya kepadaku hingga pada hari Tuhan.
1:13 Peganglah segala sesuatu yang telah engkau dengar dari padaku sebagai contoh ajaran yang sehat dan lakukanlah itu dalam iman dan kasih dalam Kristus Yesus.
1:14 Peliharalah harta yang indah, yang telah dipercayakan-Nya kepada kita, oleh Roh Kudus yang diam di dalam kita.1:11 Aku enggo iangkat Dibata jadi rasul dingen guru guna pembarken Berita Si Meriah.
1:12 Janah erkiteken si me maka aku ngenanami kiniseran-kiniseran. Tapi tetap aku tek, sabap kutandai nge ise penalemenku. Janah tek aku IA ngasup ngkawali aku ras si enggo iendeskenNa man bangku seh ku Wari pendungi e.
1:13 Tagangilah alu nteguh kata si kuajarken man bandu, jadi usihen si man ikutenkenndu. Janah tetaplah kam i bas kiniteken ras kekelengen si idat kita erkiteken persadanta ras Kristus Jesus.
1:14 Jagalah erta-erta si mehuli si enggo iendesken Dibata man bandu arah Kuasa Kesah Si Badia si ringan i bas kita.
ERBERITA, ERKINITEKEN RAS KEKELENGEN
2 Timotius 1: 11-14
(Menyongsong Sasaran Pelayanan GBKP Tahun 2024)
A. PERSIKAPEN
• Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
• Nikapken ingan persembahen.
• Nungkun ras nuratken topik pertoton sapaat.
• Kune i bas sektor entah jabu kepkepen, perdalanen PJJ ibabai Pertua, Diaken, Pengurus PJJ, bage pe sekalak si enggo iaturken idur pengurus PJJ. Adi kune PJJ ilakoken i bas teptep jabu ngawan perpulungen, maka perdalanen PJJ ibabai bapa, nande, bage pe anak.
• Sope benaken PJJ, banci kita rende alu make ende-enden pop rohani.
• Janah kerina perdalanen PJJ enda banci iubah (imodifikasi) rikutken perluna.
• Erdandanken perpulungen jabu-jabu e me ingan sharing grup/wadah kesaksin e maka mehuli leben pandita, pertua, diaken, entah emeritus nuriken Kata Dibata.
B. PERPULUNGEN JABU-JABU/ PERPULUNGEN JABU
- RENDE: KEE NO. 254: 1-2 (IBABAI SIMADA JABU)
Reff: Isuruh Dibata sikeleng-kelengen
Si sampat-sampaten asa kengasupen
Mbue me kap tuhu si man bahanenta
Radu ras kerina kita ndahikenca
Palasta nampati em ate mekuah
Ngusih Tuhan Jesus enggo kap nampati
Meriah ukurta adi teman pulah
Masap kebiaren je dat ate jadi
Reff:..
Kalak si ngikutken kata Tuhan Jesus
Terangina doni ras k’rina isina
Tegulah temanta gelah ola celus
Si tuduhken dalin gelah ola mampa
Reff: …
- ERTOTO (IBABAI ANAK ITENGAH-TENGAH JABU)
- RENUNGEN:
Teks: 2 Timotius 1:11-14
Tema: Erberita, rkiniteken Ras Kekelengen
Renungen wari enda e me sada bagin isi surat Rasul Paulus situjuken man anak rohanina Timotius. Tujunna e me mpegegehi ras mpeteguhi kiniteken Timotius ras kerina singogesa, termasuk man banta i bas paksa enda. Isina e me kap nuriken ketetapen ukur i bas erkiniteken man Jesus Kristus. Si pemena, Rasul Paulus nuriken uga ia nteguh ncikep kinitekenna, amin gia melala kal kiniseran arus ialakenna, termasuk paksa si e kalak si ngeraguken pengajarenna. Kuncina e me kap sitandai ku ise kita erkiniteken. La banci lang adi enggo tangkas penandaita kerna Dibata Bapa, kerna Jesus Kristus, kerna Kesah Si Badia, si kugapana pe perbeben geluh si idalani kita lanai bo e banci erbahanca kita mbiar ntah celus. Si peduaken, erkawiten ras tanggungjabab selaku pengikut Kristus. Kita arus njagai gelah erta si meherga e me kuasa Dibata si ringan i bas kita arah Kesah Si Badia la pernah bene ntah pe erleka ras kita. Rasul Paulus nuriken kerna njagai kuasa Dibata arah keaktifenta mereken usihen si mehuli, nehken kekelengen janah adi kita jadi usihen sebage bukti arah kegeluhenta banci ibegi, igejab ntah iidah kalak Berita Si Meriah. Berita Si Meriah e me berita si maba keselamaten man kalak megisa ntah ngidahsa janah ipujina Tuhan ras tek ia man Tuhan.
“Erberita, Erkiniteken Ras Kekelengen, tema enda njemba kita gelah nggit ersaksi ntah pe erberita man si enterem selaku warga si aktif (jemaat sebagai subyek pelayanan), bagi sasaren pelayanen GBKP Tahun 2023 enda. Selaku subyek aktif pelayanen i tengah-tengah gerejanta i bas konteks bernegara bage pe lingkungen si sangat “majemuk”, kita ituntut ncidahken uga gelah kegeluhenta tergejab ras ernanam man kalak I enterem, sabap kita kerina enda desken sira ras terang. I bas jaman gundari media sosial pe banci si pake jadi sarana erBerita Si Meriah (FB, Youtube, Instagram, Twitter, ras si debanna).
Erkiniteken e me ngelakoken sura-sura Dibata, sabap arah ngelakoken kata Dibata kita ras kalak si deban pe nggejabken Tuhan i tengah-tengahta. Kekelengen, e me biak Dibata si enggo ersada ras biakta selaku anakNa. Jadi, kekelengen e me biakta, E maka la banci lang arah erberita ras erkiniteken teridah tetap kekelengen man kerina jelma bage pe man kerina tinepa Dibata. Enda me dalanna maka Rasul Paulus mpersingeti Timotius bage pe kita gelah tetap ncikep nteguh erta si meherga si enggo ibereken Dibata man banta katawari paksa pe.
I bas tahun 2024 si reh enda, bengket ka me kita ku sasaren pelayanen “Berkarya Dan Berguna Untuk Orang Lain”. Enda lanjuten sasaren pelayanen GBKP tahun 2023, I ja kita kerina enggo jadi pelaku aktif (subyek) pelayanen si nehken kekelengen ku si enterem selaku aron Dibata guna jadi pasu-pasu man isi doni enda. Subyek aktif labo ngeranai saja, tapi pe berkarya ertina erbahan “kreatifitas” i bas pelayanen. Kreatifitas ningen e e me tole ngasup ngidah peluang si banci imanfaatken guna seh ku bas tujun. Tujunta e me gelah kita selaku warga GBKP banci tergejab ras enanam man si enterem. Si enda banci silakoken alu tutus erdahin, disiplin, melumbar mere, mediate ras kepate man kerina jelma. Jabu-jabunta ertekad mbuktiken jadi subyek aktif pelayanan GBKP, e maka la ia biar-biaren nehken kebenaren man si enterem.
I bas situasi si mberat pe, Dibata tetap ras kita sue ras janjiNa. ItemaniNa kita i bas kiniseranta. Ipulahina kita i bas kita la ngasup ras iapulina kita i bas paksa kekoten ras aru ateta. Erkarya ras erguna man kalak si deban, sasaren pelayanen tahun 2024, mari kita ersikap ngalo-ngalosa ras pe nikapken si iperluken guna ensukseskenca.
Ateta min i bas 2024 enda pagi, PJJ-nta enggo banci ncidahken maka gereja hadir jadi solusi nandangi kalak si ngenanami perbeben mberat. Umpamana marakna pinakit sosial bagi narkoba, enggo si eteh kuja ingan rehabilitasi GBKP. Kerna perjudian, adi kita erdahin selaku aparat keamanan, kepala daerah ntah kepala desa, I bas wilayahta lah gia pang kita memberantassa. Soal sulitna ngurus kepemiliken lahan (ngurus sertifikat), dokumen sipil (KTP KK), adi kita erdahin i bas bidang si e lanai si persulit kalak si ngurussa. Em tandana kalak si deban nggejabken kita desken sira ras terang. Tuhan si masu-masu kita kerina.
- NURIKEN PENGGEJAPEN
‒ Bapa
‒ Nande
‒ Anak
- DISKUSI / SHARING / CERAMAH / AKSI
‒ Diskusi:
• Uga caranta erBerita Si Meriah i bas situasi si gundari?
• Engkai maka megati kalak mbiar nuriken ras ndalanken kebenaren?
‒ Aksi
• Erbahan surat ku pemerintah melalui runggun i bas inganta tading, guna pehuliken kuta ntah inganta gelah bebas i bas hal-hal si la mehuli, umpamana dugaan korupsi, perjudian, premanisme, radikalisme, bage pe si menyangkut perjuangan hak: hak atas tanah, hak politik, hak berbicara, hak berorganisasi. bage pe situasi si ncidahken kinilaadilen kune lit i bas PJJnta si enggo jadi korban.
- PERSEMBAHEN: RENDE: KEE No. 445 (ibabai anak)
Si pepulung me persembahenta
Si endesken dage man Dibata
Tanda m’riah ukur, ban pasu-pasuNa
Si simpar b’reNa man banta
Reff: Asa si nggo isikapken, asa si nggo itotoken
Em pengataken bujurta, kempak Dibata
Tuhu simpar pemere Dibata, man perjuma ras si erbinaga
K’rina si erdahin, si ngarap man baNa
Ituahi pasu-pasuNa
Reff: …
- Pertoton Sapaat (Pandita/Pertua/Diaken/Emeritus)
‒ Gelah kerina ngawan ni perpulungen nggejabken kekelengen Jesus Kristus
‒ Gelah kerina jabu-jabu GBKP aktif nuriken ras mpertahanken kebenaren
‒ Gelah kerina jabu-jabu mediate ras kepate man kerina jelma si iseklewetna
- RENDE: KEE No. 322: 1 – 2
Sipembarken B’rita Si Meriah, sitertaban banci pulah
Si pentang jadi erpengidah, rakatlah min ersembah
Rakatlah min ersembah
Reff: Perban lias ate Tuhanku, gegeh dosa enggo talu
Kuasa Kristus tangkas t’ridah, rasa lalap pujilah
Sipembarken B’rita Si Meriah, kuasa iblis talukenlah
Si metangkang min jadi robah, ngasamken kuasa pedah
Ngasamken kuasa pedah
Reff: …
- PERTOTON TUHAN (IBABAI ANAK)
- MOMO
C. JEDA RAS PENUTUP (ISIKAPKEN SI MADA JABU)
Pdt. Yusuf Tarigan, S.Si., MA
HP/WA: 081370979737