BIMBINGEN PA MAMRE 1 – 7 OKTOBER 2023

Nggeluh Ras Kristus

Filipi 2: 1 – 4
Nasihat supaya bersatu dan merendahkan diri seperti Kristus

2:1 Jadi karena dalam Kristus ada nasihat, ada penghiburan kasih, ada persekutuan Roh, ada kasih mesra dan belas kasihan,
2:2 karena itu sempurnakanlah sukacitaku dengan ini: hendaklah kamu sehati sepikir, dalam satu kasih, satu jiwa, satu tujuan,
2:3 dengan tidak mencari kepentingan sendiri atau puji-pujian yang sia-sia. Sebaliknya hendaklah dengan rendah hati yang seorang menganggap yang lain lebih utama dari pada dirinya sendiri;
2:4 dan janganlah tiap-tiap orang hanya memperhatikan kepentingannya sendiri, tetapi kepentingan orang lain juga.

Jesus Kristus jadi usihen

2:1 Kegeluhenndu i bas Kristus erbahanca kam megegeh. Ma kin keleng ateNa e ngapuli kam? Ma rembak kin kam ras Kesah Dibata? Ma kin sikeleng-kelengen kam dingen mekuah atendu sekalak nandangi si debanna?
2:2 Gelah tuhu-tuhu malem ateku, kupindoken man bandu: Ersada min arihndu, sikeleng-kelengen min kam, ersada min geluhndu dingen ersada ukurndu.
2:3 Ola ibahanndu kai pe erpalasken kerangapen, ntah si erpalasken ukur meganjang. Tapi peteruklah ukurndu sekalak nandangi si debanna. Ola kal iakapndu ulin kam asangken kalak si deban.
2:4 Ola keperlunndu saja ngenca iperdiatekenndu tapi perdiateken pe keperlun kalak si deban.

Nats : Pilipi 2:1-4
Tema : Nggeluh Ras Kristus
Tujun : Gelah Mamre:

• Meteh ulih nggeluh ras Kristus e me megegeh
• Ertekad tetap mpeteguhi kiniersadan ras kalak si deban

I. KATA PENARUH

Erdahin ras kalak si deban i bas sada dampar erkiteken lit temannta e maka tambah semangat ras gegehnta guna ndahiken dahin e ulihna banci mehuli. Tapi i bas dampar si deban adi la siangkan sapih-sapih kita kedungenna dahin e banci lolo entah pe adi sidahiken sue ras sura-surana e maka ulihna labo ‘maksimal’ si datken. Erdandanken si e seh kal perluna kita ‘berkolaborasi’ i bas dahiken sada-sada dahin gelah banci sada visi (tujuan) ras banci ndatken ulih si mehulina. Kolaborasi e me sada proses kerjasama i bas gagasan entah pe ide, jenari ras-ras ndalankenca sue ras visi si enggo itetapken. Alu kolaborasi enda maka melala ide ras kreatifitas turah janah la lit masalah rumit si la terdungi. Si tuhuna man banta kalak si enggo ngaloken Kristus labo lit alasen maka kita la banci berkolaborasi sabap i bas Pustaka Si Badia kolaborasi e banci igambarken desken sada kula ija melala ring-ring anggotana. Ring-ring enggo ipersada i bas kula e jana erdahin rikutken fungsina tapi sada tujunna e me uga maka kula e banci tetap ipajekken ras ulihna karya si teridah.

II. URAIAN TEKS/TAFSIRAN

Aminna Paulus sangana i bas penjara erkiteken pebelangken Berita Si Meriah tapi ia tetap produktif guna mpegegehi ras mpersingeti perpulungen si enggo ngaloken Berita Si Meriah. Paulus me simajeken perpulungen Pilipi, perpulungen si pemena i wilayah Eropah, i Makedonia (Propinsi Roma). Perpulungen enda berlatar belakang Jahudi ras non Jahudi e maka perlu terus ipersingeti gelah perbedan si lit i bas perpulungen ula e jadi si ngambati maka la banci ersada. Guna mpersadaken perpulungen si erbage-bage latar belakang e maka isingetken Paulus palas persadan e me “Kristus”. Adi perpulungen enggo ersada i bas Kristus maka perpulungen e jadi megegeh subuk i bas ngalaken perbeben si reh i bas darat nari (eksternal) bage pe semangat guna ras-ras pebelangken Berita Si Meriah banci erbelangna (internal). Adi perpulungen e enggo ersada i bas Kristus maka perukuren ras perbahanenna enggo lanai ngikutken sura-surana tapi enggo ngusih perukuren Kristus (bdk. Pil. 2: 5-11).

Piga-piga hal isingetken Paulus i bas teks PA mamrenta palas ersada i bas Kristus teridah arah cara nggeluhnta banci berkolaborasi ras kalak si deban e me:

1. Sikeleng-kelengen ertina kai si lit i bas kita si bagiken man kalak si deban, janah kita pe meriah ka ukurta ngaloken uga litna temannta.
2. La ngukuri dirinta jine. Kalak si ngukuri dirina jine pe turah kerangapen kedungenna sabap keperlunna ngenca iperdiatekenna. I bas kita ngukuri keperlun kalak si deban ije me kita ngasup lanai kepentingennta saja si pelebeken (lanai egois).
3. Mpeteruk ukur. Adi kita erdahin ras kalak si deban kita harus ngasup ngaloken kalak si deban e jadi partnerta/kawan sekerja (sada aron). Adi lit denga si erpengakap maka kita si beluhna entah pe si hebatna i je teridah kita kurang ngergaken temannta alu si peganjangken banta ras si peteruk temanta. Adi kita nggit mpeteruk ukurta maka ije me potensi si lit i bas temanta banci teridah.

Kai si isingetken Paulus man perpulungen Pilipi tujunna gelah Berita Si Meriah banci erbelangna. Adi perpulungen banci nggeluh i bas kiniersadan maka perpulungen e reh gegehna ras erbuah sabap melala kengasupen si lit i bas ia banci ipakeken guna dahin Tuhan. Tapi sebalikna adi perpulungen la banci ersada maka la banci lang pasti berdampak ku bas perkembangen perpulungen.

III. APLIKASI

Si tuhuna jumlah SDM GBKP secara kuantitas (lk 317.000 jiwa) ras kualitas sangat potesial, melala dahin gereja si enggo si dahiken mulai i bas Runggun, Klasis terus ku Sinodal. Si perlu si renungken i bas kita ndahiken dahin e enggo nge teridah ije kolaborasi kerina ngawan GBKP?
Adi enggo lit kolaborasi tentu kerina ngawan perpulungen enggo bengket muat bagin. Tapi kinatana keterlibaten (partisipasi) ngawan perpulungen GBKPI bas dahin-dahin gereja lebih kurang 40% denga. Bage pe kerna program si idahiken seh ija nge dampakna ras keberlangsungenna subuk i bas Runggun, Klasis bage pe Sinodal? Banci saja dahin e enggo si dalanken tapi lenga denga mereken dampak si mbelin (signifikan) erkiteken lenga lit kolaborasi ije. Masing-masing sama-sama kerja tapi lenga kerjasama. Adi masing masing kerja banci saja program si idahiken lenga ku bas tujun si seri (menurut selera masing-masing). Adi masing-masing kerja maka la si datken ulih maksimal sabap gegeh ras potensinta la ipersada. Adi masing-masing kerja maka programnta tumpang tindih ras la lit keberlangsungenna. Adi ateta ndatken ulih si maksimal kerina potensi si lit i bas perpulungen banci teridah ras berkembang, la banci lang kolaborasi i bas kerina SDMnta arus silakoken.

IV. DISKUSI

1. Engkai maka Paulus perlu ningetken perpulungen Pilipi maka palas kiniersadan i bas perpulungen e me Kristus?
2. Kai nge ulihna adi silakoken kolaborasi i bas dahiken dahin pelayanen gerejanta?
3. Kai si arus si lakoken gelah erteguhna persadannta ras kalak si deban?

V. USULEN ENDE-ENDEN

1. KEE GBKP No. 264: 1,2
2. KEE GBKP No. 255:1,3
3. KEE GBKP No. 316: 1- (Persembahen)
4. KEE GBKP No. 209: 1, 4, 5
5. KEE GBKP No. 182:1,2

Pdt. Rehpelita Ginting, S.Th, M.Min
GBKP Budi Luhur
HP. 08129391004