Ngkelengi Ndehara
Kejadian 2: 23 – 24
2:23 Lalu berkatalah manusia itu: “Inilah dia, tulang dari tulangku dan daging dari dagingku. Ia akan dinamai perempuan, sebab ia diambil dari laki-laki.”
2:24 Sebab itu seorang laki-laki akan meninggalkan ayahnya dan ibunya dan bersatu dengan isterinya, sehingga keduanya menjadi satu daging.2:23 Nina manusia e, “Enda nge maka enggo payo; Tulanna i bas tulanku nari, janah jukutna i bas jukutku nari. ‘Diberu’ gelarna perbahan ia ibuat i bas dilaki nari.”
2:24 Em sabapna dilaki nadingken nande bapana, gelah ersada ia ras ndeharana, maka duana enggo jadi sada.
Ogen : Kejadin 2:23-24
Tema : Ngkelengi Ndehara
Tujun : Gelah Mamre:
- Meteh erti ndehara sebage pasangen si cocok man perbulangen.
- Ngkelengi ndeharana alu totalitas (perukuren,pengerana ras perbahanen)
I. KATA PENARUH
Umumna, waktu nggeluh i bas ibas perjabun dekahen asangken sisada, rata-ratana 60% – 70% asa umurta nggeluh doni enda. Emaka perlu kal erdiate kerna jabu, jabu jadi salah sada prioritas geluh, uga maka mehuli, dame, ersada arih, sihamaten, sikelengen, situmpak-tumpaken sada ras sidebanna. Kerina enda mbelin kal ngaruh orangtua (nande ras Bapa), mpekena-kena jabu alu ersada ukur, jadi usihen man anak-anak.
Kengasupen nande/bapa jadi usihen, ngasup mpersada ukur, ibenaken tupung duana melasken padan pengakun ras sura-surana man Dibata kerna kiniersadanna nggeluh ibas perjabun (melasken padan perjabun), padan e iinget ras ipertanggungjababken man Dibata. Dibata kap si mpersadakenca gelah jadi sada. E ertina maka si dilaki ras si diberu tek, kemalemen ate tuhu-tuhu lit bas ia duana sabab Dibata si mpersadaken ras lit ibas jabuna ras jadi KEPALA.
II. URAIAN TEKS
Kenca itepa Dibata manusia (Adam), itatapNa, niNa: “La mehuli manusia e nggeluh sisada-sisada”, emaka tupung manusia e tunduh ibuatna tulan rangrangna, itutupna alu jukut, ijadikenNa diberu guna jadi teman Adam. Arah enda teridah maka Dibata kap si erbahan perjabun, janah nentuken si jadi pasangen geluh tep-tep kalak sabab labo isungkunNa, labo lA arih-arih ras Adam Tapi tupung tunduh ijadikenNa.\
Tupung i idah Adam si Hawa, Nina, “Enda nge maka enggo payo, tulanna ibas tulanku nari, janah jukutna ibas jukutku nari”, Diberu gelarna perbahan ia ibuat ibas dilaki nari” (ayat 23). Arah pengakun Adam teridah maka:
- Setuju, meriah ukur Adam ngaloken si ibereken Dibata man bana, tandana nina ‘enda nge maka enggo payo’.
- Kai si ibahan Dibata, memang tuhu-tuhu mehuli, perjodohan (perjabun) Adam ras Hawa la lit kurangna, la lit siman pandangen.
- Perjabun e me kebijaken sepihak, e me kap pihak Dibata, la lit campur tan manusia, labo erdandanken pemindon entah pe rencana manusia. Tapi erdandanken perjabun e mpeturah keriahen ukur manusia.
- Perjabun e me kebijaken, rancangen Dibata, sierbahanca maka IA pe erkuasa dingen erdahin ibas pusuh kalak si ipersadaNa ibas perjabun e, maka ieteh Adam ngakukenca tulanna ibas tulanku nari, jukutna ibas jukutku nari’. letehna proses uga Dibata mpersadasa sabab Tuhan si ngerana ku pusuhna. Emaka ibahanna gelarna ‘Diberu’, ertina ibuat ibas dilaki nari. Maka, kalak si enggo ipersadaken Dibata ibas perjabun, lit hubungen si tuhu-tuhu ndeher ibas ia duana, sabab lit bagin kula (tulan ras jukut) si dilaki i bas si diberu. Enda ngatakenca la lit hubungen si lebih ndeher ibas kegeluhen manusia seakatan hubungen perbulangen ras ndeharana. Emaka, adi ibas perjabun lit hubungen si terdeheren asangken hubungen perbulangen ras ndeharana, umpamana kalak sideban, erta, hoby, dilaki entah diberu sideban, orang tua ras sidebanna, maka i bas perjabun e lit masalah si arus ipekena.
Erdandanken kiniersadan sibage deherna maka tole ikataken: “Em sababna dilaki nadingken nande bapana, gelah ersada ia ras ndeharana, maka duana enggo jadi sada” (ayat 24) Arah kata enda ngingetken maka lit kearusen perjabun eme njaga kiniersadan gelah tetap nteguh ibas perbulangen ras ndehar. Dilaki nadingken nande bapana ngataken, bage pentingna kiniersadan perbulangen ras ndehara, ngelebihi kiniersadan ras ise pe. Termasuk ras orangtua si mupus lanai jadi keluarga inti, la jadi bagian ibas kiniersadan perbulangen ras ndehara (Matius 19:5).
III. PENGKENAINA
Palas kegeluhen perjabun eme kap Kata Dibata, perdalanen perjabun arus rikutken sura-suraNa sabab Dibata kap si ngerencanaken ras erbahan perjabun, emaka la bias adi sekalak dilaki ras sekalak diberu nggeluh ibas perjabun ngenca, tapi jabu arus nggeluh sue ras sura-sura Dibata.
Rikutken kai siituriken idatas, maka lit 3 hal siperlu iperdiateken ibas perjabun, eme:
- Pasangen jadi prioritas.
Teman si enggo jadi sada ibas perjabun arus tetap iutamaken, ibahan jadi hal si pentingna, bagi nina ibas ayat 24, itadingkenna nande bapana, labo ertina orangtua e la ikelengi, la ihamati, tapi kiniersadan perbulangen ndeharana arus siutama, termasuk nandangi anak pe. Emaka ibas jabu e tuhu-tuhu lit kemalemen ate sabab Dibata simpersadaken - Mpersada Kegeluhen.
Kata ‘duana enggo jadi sada’ banci iandingken bagi lau ras sira, aminna pe ia dua, enggo ‘melebur jadi sada, lanai banci ipeserap apai lau apai sira. Ertina kalak sienggo ipersada ibas perjabun, lanai banci ipesirang, ipeserap-serap. Duana enggo jadi sada, eme sada kiniteken, sada tujun, sada pengidah ras sada pengodak ras pengole. Kerina enda arus iperjuangken. - Ngaloken kekurangen ras kelebihen. Tupung ipersada sekalak dilaki ras sekalak diberu, tentu kegeluhenna pekepar langa bo sempurna, banci saja 50 entah 60 denga pontenna. lbas sienda perlu penampat, adi ponten ndehara 50, perbulangen si nambahisa 50 nari, Entah pe ponten ndehara 60, perbulangen mperjuangkenca gelah banci 100. Pebelin budaya keterbukaan ibas jabu, emaka ibas kelemahen ras kelebihen si lit, banci teraloken, Emaka adi la lit rahasia, la lit si ibuniken sehat me perjabun e.
Ibas ulang tahun Moria GBKP si pe 66-ken enda Mamre GBKP idilo jadi IMAM, Mamre si melias man Ndeharana, bijak ibas ngerana, membimbing Moria ku perukuren, perbahanen ras pengerana si mehuli. Amin lit gia si lepak ibas Moria i tengah jabu, alu pentar, alu kekelengen, alu kesabaren Mamre ngalakenca, sabab tep-tep Moria ibas jabu eme teman si cocok man perbulangen. Emaka lit hak kerina ndehara ndatken kekelengen ibas perbulangenna nari.
IV. DISKUSI
- Cuba turiken pengertinndu kerna perbulangen ras ndehara rikutken bahan PA-nta Minggu enda.
- Sungkun pusuhndu, enggo nge kam jadi sekalak perbulangen si erkeleng ate man ndeharandu? Turikenlah!
V. USULAN ENDE-ENDEN
- KEE GBKP No. 424: 1 – 2
- KEE GBKP No. 177: 1 – 2
- KEE GBKP No. 124: 1 – 2
- KEE GBKP No. 307: 1 – 2
- KEE GBKP No. 249: 1 – 3
Pdt Jennie Elliyani Keliat S.Th.
(WA 081375523001)