MEDIATE ERKADE-KADE
Jop 42:11
Kemudian datanglah kepadanya semua saudaranya laki-laki dan perempuan dan semua kenalannya yang lama, dan makan bersama-sama dengan dia di rumahnya. Mereka menyatakan turut berdukacita dan menghibur dia oleh karena segala malapetaka yang telah ditimpakan TUHAN kepadanya, dan mereka masing-masing memberi dia uang satu kesita dan sebuah cincin emas.
A. PERSIKAPEN
• Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
• Nikapken ingan persembahen.
• Nungkun ras nuratken topik pertoton sapaat.
• Kune i bas sektor entah jabu kepkepen, perdalanen PJJ ibabai Pertua, Diaken, Pengurus PJJ, bage pe sekalak si enggo iaturken idur pengurus PJJ. Adi kune PJJ ilakoken i bas teptep jabu ngawan perpulungen, maka perdalanen PJJ ibabai bapa, nande, bage pe anak.
• Sope benaken PJJ, banci kita rende alu make ende-enden pop rohani.
• Janah kerina perdalanen PJJ enda banci iubah (imodifikasi) rikutken perluna.
• Erdandanken perpulungen jabu-jabu e me ingan sharing grup/wadah kesaksin e maka mehuli leben pandita, pertua, diaken, entah emeritus nuriken Kata Dibata.
B. PERPULUNGEN JABU-JABU/ PERPULUNGEN JABU
- RENDE: Kasih Dari Surga (ibabai Nande)
Kasih dari Surga memenuhi tempat ini
Kasih dari Bapa Surgawi
Kasih dari Yesus mengalir di hatiku
Membuat damai di hidupku
Mengalir kasih dari tempat tinggi
Mengalir kasih dari tahta Allah Bapa
Mengalir, mengalir, mengalir dan mengalir
Mengalir memenuhi hidupku - ERTOTO (ibabai Bapa)
- RENDE KEE No. 244: 1
Nusur min o Kesah Tuhan, bengket ku pusuh e
Maka Kata si ni suan, turah ras erbuah pe
Kam i bas Dibata nari, kepkeplah ukur ku min
Pasu-pasu pendahin, maka aku genduari,
Ndaram tuah si tetap, alu ate si telap - RENUNGEN
Teks : Jop 42: 11 (iogeken anak)
Tema : Mediate Erkade-kade
I bas paksa genduari enda, enggo enterem kalak lanai ermediate nandangi kade-kade erkiteken fokus kegeluhenna ngukuri keperlun-keperlun dirina saja. Kata “keleng” megati ibelasken, tapi labo teridah arah perbahanen, adi terjeng ibelasken ngenca tapi la idalanken kita erbual, janah e la lebih asangken gung si erbulnang ntah pe penganak si erdeping (bdk. 1 Kor 13:1). Engkai maka kita arus ermediate nandangi kade-kade? Erkiteken kita kalak Kristen ras kalak Karo si erbudaya. Budaya ngajari kita gelah metenget ersenina, mehamat erkalimbubu ras metami eranak beru, inti rakut si telu e keleng ate. Bage pe selaku kita kalak Kristen, Tuhan enggo mereken perentah gelah engkelengi temanta manusia, bagi kita engkelengi dirita (bdk. Mat. 22:39).
I bas Jop 42:11 enda ituriken man banta kerna Jop si enggo “lulus” i bas pengujin kiniteken. lijinken Dibata Jop ngalaken pinakit si mberat, kebenen erta bage pe keluarga, aminna mberat perbeben si man alankenna tapi kinitekenna labo urak man Tuhan. Erkiteken si e, ibahan Tuhan senang ka mulihken kegeluhenna alu mereken kebayaken dua kali lipat. Jenari senina-senina Jop ras turangna, bage pe teman-temanna si mbarenda ermediate nandangi Jop:
• Reh ia ndahi Jop ras man-man ia i rumahna.
• lapuli/ipegegehina Jop, maka ikatakenna ia pe ikut erceda ate i bas kiniseran si enggo ibereken Tuhan man bana.
• Kade-kade ras teman-teman Jop melumbar mere, sabap iberekenna duit ras sada cincin emas man Jop, adi I duitken pemerena e tuhu-tuhu mbelin beliganna.
Bage me pe kita selaku kalak Kristen ras selaku kalak si erbudaya, arus ngusih kade-kade Jop enda. Medahi kita adi lit keluargata si erkerja, acara meriah ukur bage pe i bas lit perbebenna umpamana: sakit, erceda ate, kebenen, rsd. Kerehenta arus maba kiniulin ras keriahen bage pe jadi pengapul/pergegeh nandangi kade-kadeta si sangana lit perbeben, sabap arus kin kita si sampat-sampaten maba baban geluh enda (bdk. Gal 6:2a). Jenari ula kita degil erkade-kade, sabap adi kalak degil ertambah-tambah kemusilenna, tapi kalak melumbar mere ertambah-tambah kebayakenna (bdk. Kuan. 11:24).
Adi sinen i bas jaman genduari la kin enggo er urakna sikap ermediate nandangi kade-kade? Sabap enterem si idah i bas jabu lanai si periahen erkiteken cakap, erta tading-tadingen. Adi lit kin sedekah enda perubaten i bas jabu entah pe i bas keluarga si alem-alemenlah kita, melias-mesayanglah sapih-sapih kita keluarga ras kalak si deban (bdk. Ep. 4:32). Bage pe i bas acara ceda ate, ngapuli, sakit, kerja-kerja entah enggo erkurangna kalak si ndahisa? Amin bage gia sibenakenlah arah dirita nari ermediate man kade-kade, janah adi lit si idah temanta kurang ermediate tugasta mpersingetisa. Banci jadi pengaruh modernisasi, melala si mehuli, tapi lit ka dampak kurang mehuli sabap nuntut mbue keperlun-keperlun si arus si cukupi, jadi alasen sibuk ras la lit waktu, megati erbahanca la ermediate, ngukuri dirina jine (individualis). Uga sekali kecibal kegeluhenta, selaku kalak Kristen ras selaku kalak Karo si erbudaya arus ermediate nandangi kade-kade e me medahi, nggit mereken pengapul/pergegeh ras melumbar mere kalak si kekurangen, bahanlah man kalak si deban bagi ngena atendu ibahanna man bandu (bdk. Mat. 7:12). - NURIKEN PENGGEJAPEN
• Bapa
• Nande
• Anak - DISKUSI RAS AKSI
- Enggo nge kita banci jadi usihen man jelma si enterem i bas ermediate nandangi kade-kade, umpamana: medahi, mereken kata pergegeh, melumbar mere? Turikenlah!
- Kenca si orati renungen PJJ ta wari si sendah, kai dage tugas ras tanggungjababta selaku kalak Kristen ras selaku kalak Karo si erbudaya?
- AKSI
Adi lit temanta si la kita periahen, i bas minggu enda si usahaken erdame ras ia jenari turiken ulihna i bas PJJ Minggu si reh enda.
- RENDE: KEE No. 281:1-2 (ibabai anak)
Kek’lengen Jesus kempak manusia
Desken Dibata engkelengi IA
KekelengenNa maler kap man banta
Adi sipakelah pedahNa
Reff: Min si keleng-kelengen kita k’rina
Bagi pedahken Jesus bas Pustaka
Sabapna kai sipindo bas gelarNa
Ib’re Dibata man banta
Ngasamken kesah nggit me kepe IA
Gelah terkelin kita manusia
Dage dalanken si ni pedahken Na
Kempak temanta ise gia Reff: … - PERTOTON SAPAAT
• Notoken gelah perpulungen ngasup ermediate nandangi kade-kade bage pe gelah si rubat sedekah enda banci ia erdame (ibabai nande).
• Notoken Persembahen, jabu ingan kundulen wari si sendah ras jabu kundulen minggu si reh enda (ibabai bapa).
• Si turah i bas perpulungen (lbabai Diaken) - RENDE: KEE No. 296: 1-4 (ibabai bapa/nande)
Man baNdu Jesus Tuhanku, Kuendesken geluhku
Nggeluh sikeleng-kelengen, nggit sisampat-sampaten
Reff: Erbuah kata ni suan, bas kita anak Tuhan
Erbuah kata ni suan, bas kita anak Tuhan
Mediate ras mesayang, si m’uli ula sungsang
Tetap siajar-ajaren, la sitogan-toganen Reff: .. - PERTOTON TUHAN (Ibabai Serayan)
- MOMO
C. JEDA RAS PENUTUP
Pdt. Elieser Tarigan Tambun, S.Th.
HP/WA: 082277364488