Ula Buniken Si Macik
1 Yohanes 1: 8 – 9
1:8 Jika kita berkata, bahwa kita tidak berdosa, maka kita menipu diri kita sendiri dan kebenaran tidak ada di dalam kita.
1:9 Jika kita mengaku dosa kita, maka Ia adalah setia dan adil, sehingga Ia akan mengampuni segala dosa kita dan menyucikan kita dari segala kejahatan.1:8 Adi ninta maka la lit dosanta, sitipu kap dirinta, janah Kata si tuhu-tuhu i bas Dibata nari la lit i bas kita.
1:9 Tapi adi siakuken dosanta man Dibata, isehkenNa me padanNa, ilakokenNa kai si bujur, ialemiNa dosa-dosanta, janah ibersihkenNa kita i bas kerina perbahanenta si la payo.
Ogen : 1 Johanes 1: 8 – 9
Tema : Ula Buniken Si Macik
Tujuan : Gelah Saitun
- Meteh maka muniken dosa mpeturah pinakit e maka harus iakuken
- Ngasup ngalemi kesalahen kalak ras ngakuken kasalahenna man kalak si deban
- Erbahan pur-pur sage man keluarga, perpulungen si la periahen gelah jadi perdamen
I. BENA KATA
I bas Kejadin 3 i turiken maka manusia la patuh nandangi perentah Tuhan, erkiteken si e manusia ndabuh ku bas dosa ras i hukum Dibata. Dosa enggo engkenai kerina manusia i bas doni enda arah sekalak manusia [Adam, bnd roma 5: 12], ras kerina manusia enggo erdosa janah enggo ndauh sirang ras sura-sura Dibata si mejile [Roma 3:23]. Arah piga-piga nats Alkitab enda nuriken alu tangkas man banta maka kerina manusia erdosa ras lalit si la erdosa.
II. MPEBAGESI OGEN
Ayat 8: Johanes alu tegas ngataken maka kalak si ngakuken maka lalit dosana,kalak si bage perbual ras itipuna dirina janah kata si tuhu-tuhu i bas Dibata nari lalit I bas ia. Kalak singataken maka la ia nggo erdosa, kalak si bage nuduh Dibata perbual. Sabap Dibata kap ngataken maka kerina manusia erdosa. Lalit si benar ras bujur sada pe lang.
Ayat 9: Johanes ngataken maka Dibata e perkeleng, ngalemi, keleng ateNa ndauh belinen asangken rawaNa. Uga belinna pe kesalahen ras dosa manusia adi alu meteruk ukur ras erkadiola ngaku ia karna dosa ras kesalahenna maka Dibata ngalemi dosa-dosana. sebab Dibata la ateNa ngena adi manusia mate bas dosa-dosana.
III. PENGKENAINA
Selaku Saitun tentuna enggo gedang dalan si dalani ras enggo melala pengalamen geluh i mentasi. Lit si bage ukur ras lit ka sila bagi ukur.ras megati kita erbahan kesalahen ras ndabuh ku bas dosa. Maun ceda si ban ukur temanta ras maun ceda ka ukurta ban temanta .Enda kerina nuduhken maka uga gia bujurna ras ulina manusia tetap nge lit kelemahen na.i bas kita ndabuh ku bas dosa alu dem meteruk ukur ras erkadiola minterlah si pindo pengalemi dosa i bas Dibata nari,sebab lalit si terbuni i lebe lebe Dibata. [bnd masmur 51 pertoton mindo pengalemi dosa] adi ceda si ban ukur temanta, keluarga nta alu meteruk ukur nggit kita mindo maaf man bana ,la kita er elem-elem, la buniken si macik.Sebab elem-elem ntah buniken si macik si mbau ngenca reh ras banci pe peturah nipe-nipe si nggorogoti kesehatenta, si engrahken tulan. Elem-elem ntah pe buniken si macik la mbaba untung man banta, tapi erdame, memaafkan enda kap singena ate Dibata ras pe reh pasu pasu man banta. Kelengilah imbang-imbang ndu, mehuli lah perbahanen ndu man kalak si nembeh ate nandangi kam, pasu pasu kalak si numpahi kam, janah totoken lah kalak si la mehuli man bandu [lukas 6:27-28] enda me perentah Tuhan Yesus. Mari si pindo gegeh mana Tuhan gelah ngasup kita ndalanken kataNa
IV. PERTOTON
O Tuhan Dibata, ngaku kami, kami manusia perdosa, mekuah min ateNdu kami. Merincuh kal kami nggeluh erdame ras diri kami bagepe ras turang/senina; anak-anak; permain ras kela: bagepe ras kempu-kempu kami. PengasupNdu kami jadi benang penjarumi i bas persoalan bas keluarga kami
V. DISKUSI
- Kai nge erbanca maka mberat si akap ngakuken salah dosanta man Dibata bage pe teman manusia?
- Rikutken kesaksin pengalamen geluh,apai nge sikapen erdame ras imbang-imbang ntah elem-elem nandangi imbang?
Pdt. Basni Ginting S,Th. MPSi
Ibaba segal ku juma Salit
Segal ibaba pake kereta
La man pelajaren nggeluh murbit
Terlebih kita enggo ndekah ku gereja