Teks : Epesus 6:1-4
Tema : Bapa Jadi ldola Anak
Tujun : Gelah Mamre:
- Ngidah kerna hubungen orang tua (Bapa) ras anak-anakna rikutken teks
- Ngelumbaken jadi idola anak-anakna i bas cara rukur, ngerana ras perbahanenna
Metode : Diskusi
Taat dan kasih
6:1 Hai anak-anak, taatilah orang tuamu di dalam Tuhan, karena haruslah demikian. 6:2 Hormatilah ayahmu dan ibumu–ini adalah suatu perintah yang penting, seperti yang nyata dari janji ini: 6:3 supaya kamu berbahagia dan panjang umurmu di bumi. 6:4 Dan kamu, bapa-bapa, janganlah bangkitkan amarah di dalam hati anak-anakmu, tetapi didiklah mereka di dalam ajaran dan nasihat Tuhan.
- KATA PENARUH
I bas tahun 2022 si lewat, lit sada film keluarga si cukup menarik perhatian i bas paksa sie si judulna eme “Ngeri-ngeri Sedap“. Film enda nuriken kerna kegeluhen sada keluarga ija anak-anakna si dilaki merantau kerina, tading sekalak anakna si diberu ras orangtuana. Situasi si bage labo kepe jadi sada keberhasilen man sekalak bapa kune anakna la nggit mulih ku kuta aminna pe anak-anak e ikategoriken berhasil secara pendahin. Janah enda mpeturah konflik i bas jabu seh maka kerina anak-anakna ras ndeharana nadingken bapa ndai sekalak i kuta. I bas erbebena perbapan ndai, ijumpaina nandena nuriken isi pusuhna. Janah lit sada ungkapen si ibelasken nandena nina: “Jikalau kau menyekolahkan anakmu untuk berkembang, maka kau pun harus juga ikut berkembang”. Alu sederhana tujun kata enda eme kap maka orang tua arus nge ngikuti perkembangen anak-anakna segelah anak-anak e banci ngidah orang tua (secara khusus bapa) banci jadi teman ntah pe idola bas tengah-tengah geluhna.
- PELIKASI (Uraian) Teks
Epesus merupaken salah sada kota si megati igelari kalak “Kota kalak Kafir” sabap cukup melala je tading kalak si nembah berhala (bnd. Perb. 19: 21-40). Tentu enda salah sada tantangen si mberat man kalak Kristen i bas paksa sie sebab lit nge tanggungjabab man bana lako meritaken Berita si Meriah e gelahna kalak si ndube nembah berhala banci kedungenna nembah man Dibata. Guna mewujudken sie Paulus mindo man perpulungen i Epesus gelahna banci min jadi gambaren Dibata (be imitators of God/bnd Ep. 5: 1-2). Carana tentu alu ngusih perbahanen Kristus dingen nggeluh bagi siniajarken Kristus. E maka lit 3 teladan siipindoken Paulus man kalak Kristen i Epesus eme: Nggeluh ibas keleng ate Dibata; nggeluh i bas terang Kristus ras nggeluh iteruh pimpinen Kesah si Badia. Tentu enda jadi tantangen tersendiri man Paulus sabap kegeluhen kalak sienggo ngaloken Kristus i Epesus lenga banci ersada erkiteken litna perbedaan latar belakang kegeluhenna e me Jahudi ras non Jahudi. Si kin arusna i bas Kristus perbedaan latar belakang e lanai jadi persoalen. Sabap Kristus enggo mperdameken ras mpersadaken kerina anak-anakNa si berbeda latar belakang dingen irakut i bas sada rumah sebage anggota keluarga Kristus
Kerna si enda me maka Paulus nehken orat geluh jabu kalak Kristen. Si arusna teridah pe i bas hubungen si mehuli itengah-tengah jabu, subuk i bas bapa ras nande, bagepe i bas hubungen orangtua ras anak-anak. Pesan sipemena isehken man anak-anak kalak si erkiniteken, maka arus ia nuduhken sada kepatuhen nandangi orangtuana (bapa ras nandena). Ketaaten nandangi orangtua merupaken ulih sebage anak-anak Dibata. Janah kepatuhenna labo erpalasken sada kebiaren bagi kebiaren sekalak budak nandangi tuanna. Sabap orangtua e labo jadi tuan nandangi anak-anakna. Tapi ketaaten e teridah alu cara nuduhken kehamaten nandangi orangtua. Janah tole pe isingetken Paulus maka kinipatuhen nandangi orangtua e ngikutken kai si enggo iperentahken Dibata e me mpehaga nande-bapana (Bnd. Ep. 62). Ertina maka lit kap tuntuten Dibata nandangi kalak si erkiniteken maka anak-anak arus nge ipehaga ras ihamatina orangtuana.
Anak si Mehamat man orangtuana ialokenna me pemere i bas Dibata nari emekap: mejuah-juah ras ndekah nggeluh idoni enda. I bas bukuna Abineno mengutip pendapat Barth si ngataken nina: “Erkiteken ia mehamat nandangi orang tuana, igejapkenna maka ia nggeluh i bas lias ras perkuah ate Dibata”. Melala kal igejapkenna pemere Dibata arah orangtuana, subuk pangan, uis ras kerina kebutuhen siniperlukenna bas geluhna Sie kerina gambaren pemere Dibata si mbelin kempak kegeluhen anak-anak Dibata. Janah labo terjeng kebutuhen secara fisik saja ngenca ialokenna, kemalemen ate ras umur si nggedang pe banci jadi bagin kegeluhenna. Au bage, teridah me ulih sinialokenna Dibata nari.
Jenari gelah teridah kiniersadan jabu e i bas Kristus, maka Paulus pe ningetken sada tanggungjabab si mbelin si arus ilakoken orangtua nandangi anak-anakna Salah sada hal si penting nina Paulus eme “ola mpesega-sega anak-anakndu”. Persinget enda isehken Paulus gelah orangtua meteh kalak si pusuhna ikuasai nembeh ate, banci mpesirang ia ras kiniersadanna ras Dibata. Janah nembeh ate e banci mabai sekalak jelma ngelawan kerina si erkawiten ras atena nembeh man orangtuana. Seh maka banci ka pe ia kari ngelawan Dibata erkiteken nembeh atena e. E maka perlu kal orangtua mperdiateken dingen njagai kiniteken anakna gelah la ia celus dingen ndabuh ku bas atena nembeh. Erkiteken sie maka siarus ilakoken orangtua eme mpebelin-belin ia dingen ngajari ia bagi si ngena ate Dibata.
- APLIKASI
Pertumbuhen ras perkembangen cara rukur anak tentu la terlepas arah peran orangtua secara khusus bapa (Mamre) i tengah-tengah jabu. Bapa si sedar maka lit tanggungjababna i bas mpebelin-belin anakna, pasti ituduhkenna pe pengajaren ras perbahanen si mehuli guna kegeluhen anak e. Tentu ije me peran orangtua banci jadi idola man anak-anak. Bapa banci jadi idola adina kin perbahanen sinilakokenna sentudu ras sura-sura Dibata. Janah anak-anakna pe nggejap maka perbahanen bapana e mpeturah kemalemen ate man bana, E maka adi bapa enggo jadi idola man anak-anak, tentu reh nukahna me man bana nehken pengajaren si mehuli man anak-anakna e. Kai pe kari si man alankenna i bas geluhna, tetap ingetna pengajaren bapana si jadi asamna ndalani kegeluhen enda.
- DISKUSI
- Turikeniah kai ulih si banci ialoken sekalak anak menurut Paulus i bas ogenta ndai adina ia patuh nandangi orangtuana?
- Biak kepeminpinen si kuga nge siniperluken anak-anak gelah banci sekalak bapa jadi idolai bas geluhna? Turikenlah!
- USULEN ENDE-ENDEN:
- KEE GBKP No 124: 2.3
- KEE GBKP No. 181: 1,4
- KEE GBKP No. 315: 1
- KEE GBKP No. 30: 1,2
Pdt. Dicky A. Bangun, M.Th
HP/WA 081263231231