PERPULUNGEN SI RATUR
Bilangen 2: 1-34
PERSIKAPEN
- Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
- Nikapken ingan persembahen.
- Nungkun ras nuratken topik pertoton sapaat.
- Kune i bas sektor entah jabu kepkepen, perdalanen PJJ ibabai Pertua, Diaken, Pengurus PJJ, bage pe sekalak si enggo iaturken idur pengurus PJJ. Adi kune PJJ ilakoken i bas teptep jabu ngawan perpulungen, maka perdalanen PJJ ibabai bapa, nande, bage pe anak.
- Sope benaken PJJ, banci kita rende alu make ende-enden pop rohani.
- Janah kerina perdalanen PJJ enda banci iubah (imodifikasi) rikutken perluna.
- Erdandanken perpulungen jabu-jabu e me ingan sharing grup/wadah kesaksin e maka mehuli leben pandita, pertua, diaken, entah emeritus nuriken Kata Dibata.
PERPULUNGEN JABU-JABU / PERPULUNGEN JABU
RENDE: KEE NO: 424:1 (IBABAI SIMADA JABU)
Ipuji kami kam Dibata si mbelin, alu ende-enden si meriah
Suari ras berngi kawali kami min, segelah la celus bas percuban
Reff: Sangap kap kalak si ‘rnalem baNdu e
Daten tuah ras kesenangen pe
Sangap kap kalak si ‘rnalem baNdu e
Daten tuah ras kesenangen pe.
ERTOTO (IBABAI SIMADA JABU)
RENUNGEN
Teks : BILANGEN 2:1-34 (IOGEKEN ANAK)
Tema : PERPULUNGEN SI RATUR
Negeluh ratur salah sada ciri kalak si tek man Jesus. Sabap nggeluh ratur e me nggeluh i bas “rambu-rambu”, aturen entah pe tatanen si lit, labo nggeluh rate-ate. Kalak si nggeluh ratur, labo man dirina ngenca i ergaina tapi ikut pe ia ngergai kalak si deban. Umpamana ratur berlalu lintas: ope denga berkat ku bas sada tujun, si pepayo lebe kondisi kendaran si baba, si patuhi rambu-rambu lalu lintas, erdalan alu kecepaten si normal (labo ugal-ugalan), dikune ateta motong (mendahului) kendaraan si deban tupung bas dalan pinter ras sangana kosong, ras seterusna, mejuah-juah me kita seh tujun. Ertina lit aturen ras tatanen berlalu lintas si arus si patuhi gelah ratur perdalanen, kita pe selamat, kalak si deban pe la terganggu.
Bage pe i bas kegeluhen perpulungen gerejanta GBKP enda, lit aturen administrasi bage pe aturen organisasina. Alu sederhana, administrasi banci siertiken sebage tata usaha, lebih luas administrasi e me kegiaten, usaha, cara-cara tertentu i bas sada organisasi guna nehi (mencapai) tujun bersama. Kegiaten administrasi e misalna penusunen ras pencataten data ras informasi si deban ras banci pagi menukah ndatkenca dikune iperluken. Guna si e iperluken kerjasama enterem pihak. Adi ngerana kita kerna administrasi gerejanta GBKP, e erkawiten ras Data Statistik (Moderamen, Klasis ras Runggun) si idealna tiap tahun arus i up date ulang. Sabap lit pertambahen entah pengurangen anggota tiap tahunna, e maka pencatatenna arus akurat. Tambah si e lit ka administrasi keuangen gereja, e me kerina pemasuken ras pengeluaran lengkap icatat bendahara, isertai bukti-bukti kuitansina. Janah tambah ka jilena dikune perdalanen keuangen Runggun (bahkan PJJ/Sektor) tiap akhir bulan ntah awal bulan imomoken man perpulungen. Tujunna gelah perpulungen pe meteh perdalinen keuangen gerejanta/PJJ-Sektor, janah ietehna ka muat bagin nambahisa arah persembahen kolekte bape persembahen pengataken bujurna.
Bage pe tentuna erkawiten ras organisasi GBKP. Gerejanta secara organisasi erpalas ku bas Pustaka Si Badia ras ngikutken aliren Calvinis (Johanes Calvin), ertina cara gerejanta ncidahken dirina sue ras ajaren Calvinis si nekanken Gloria Dei, Soli Deo Gloria (kemuliaan hanya bagi Tuhan). Enda teridah i bas Eklesiologi GBKP, Tata Gereja, Garis-Garis Besar Pelayanen gereja (GBP), liturgi, Buku Ende-Enden, jabaten gereja, peran anggota gereja ras si debanna. Sistem gerejanta Presbyterial Sinodal ertina kerina Majelis Runggun (Pdt, Pt, Dk, Pt. Emeritus, Dk Emeritus) ras-ras erdalan, kerjasama, sepengodak sepengole i bas arih-arih ras ndalanken ulih arih-arih (hasil Majelis Runggun). La lit siganjang teruken, si mbedakenca e me peran, fungsina ngenca. E maka kerina Majelis Runggun arus si ergan ras saling ngkuhi sada ras si debanna guna ngelai perpulungen ni Tuhan. Jenari teptep keputusen arus erpalasken Sidang (Runggu) Majelis entah BPMR/Klasis/Moderamen sue ras wilayahna.
Uga pentingna kiniraturen i bas perpulungen e banci tangkas si idah i bas bahan PJJ-ta sekali enda. Lit 603.550 kalak Israel iaturken inganna erkemah sue ras terpukna, lit 4 terpuk. Lit erkemah arah Timur, arah Selatan, arah Barat, ras arah Utara. Jelas idata gelar sukuna, gelar pemimpinna, ras piga beliganna (jumlahna). Adi i bas gerejanta, jumlah anggota perpulungen si akurat e me i bas data SIAJ (Sistem Informasi Anggota Jemaat). I bas perdalanen pe iatur, dua terpuk erdalan arah lebe, kelang-kelangna e erdalan kalak Lewi, i pudi kalak Lewi erdalan ka dua terpuk nari. Teptep perpulungen arus erdalan rikutken uruten inganna erkemah janah sada-sada perpulungen erdalan iteruh benderana (ay. 17). Mehuli kal pengaturenna. Alu bage tangkas ietehna ia terpuk si apai, identitasna jelas sabap “bendera” si ikutina pe jelas.
Tahun 2023 Sasaren Pelayanen GBKP: Jemaat MenjadiPelaku Aktif Pelayanen”. Penting kal peran serta perpulungen i bas erbage-bage kegiaten pelayanen gerejanta. Tugas pelayanen e lanai “berpusat” entah ngadi i bas Serayan Tuhan, tapi uga Serayan Tuhan melibatsertakan peran aktif anggota sue ras talentana. E maka penting kal pendatan ras pencatatan potensi ras pendahin anggotanta guna nehi tema gerejanta enda. larapken gelah Majelis Runggun ngataturken pendatan ras pencataten data enda alu teratur ras akurat. Tentu dikune enggo seh ka tenah man banta ngawan perpulungen guna ngisi data-data si ipindo runggunta, mis ka kita aktif muat bagin.
NURIKEN PENGGEJAPEN
Bapa
Nande
Anak
DISKUSI/SHARING/AKSI
Oge mulihi ayat 34. Point penting kai si idatndu arah ayat enda guna kiniulin administrasi ras organisasi gerejanta GBKP?
Tiap jelma lit talenta (potensi) si lit bas ia. Talenta e pemere Dibata. Sue ras talentandu, i bas bidang si apai nge perlu si pesikap pelayanen gerejanta GBKP enda gelah ikut kam muat bagin pekenasa?
PERSEMBAHEN: RENDE KEE No.385:1 (ibabai anak)
Babalah persembahen si merimna, ku adep-adepen Dibatanta
Babalah korban pujin si mehaga, ku lebe-lebe Na si Badia
G’lah tetap b’rena pasu-pasuNa, man k’rina manusia
G’lah tetap b’reNa pasu-pasuNa, terpuji gelar Tuhan.
PERTOTON SAPAAT
- Notoken Perpulungen gelah tetap ndalanken aturen-aturen gereja secara organisasi bage pe adminitrasi
- Notoken persembahen, jabu ingan kundulen ras ingan pulung si reh
- Si turah i bas perpulungen
RENDE: KEE No. 209: 5
Kerina daten pemere, dat pasu-pasu pe
Mejingkat k’rina min dage, ndahiken dahine
Meteruk ukur K’rinalah, em pedah Tuhan e
Em jadi man ikutenlah, I bas kelengNa e.
PERTOTON TUHAN (si mabaisa Bapa/Nande)
MOMO
JEDA RAS PENUTUP
Pdt. Jekson Barus, M.Th.
HP/WA: 081370273729