ERTANGGUNG JABAB NGURUS PERALATEN RUMAH PERTOTON
Bahan PJJ 17 – 23 September 2023
ERTANGGUNG JABAB NGURUS PERALATEN RUMAH
PERTOTON
Bilangen 3: 27 – 31
(GBP GBKP: Tim Peralatan)
Bilangen 3: 27 – 31
3:27 Puak Kehat terdiri dari kaum Amram, kaum Yizhar, kaum Hebron dan kaum Uziel; itulah kaum-kaum Kehat.
3:28 Jumlah pencatatan mereka ketika semua laki-laki yang berumur satu bulan ke atas dicatat ada delapan ribu enam ratus orang, yakni mereka yang memelihara barang-barang kudus.
3:29 Kaum-kaum bani Kehat ini berkemah pada sisi Kemah Suci sebelah selatan.
3:30 Pemimpin puak Kehat dan kaum-kaumnya ialah Elisafan bin Uziel.
3:31 Yang harus dipelihara mereka ialah tabut, meja, kandil, mezbah-mezbah, perkakas tempat kudus yang dipakai untuk menyelenggarakan ibadah, juga tirai, termasuk segala pekerjaan yang berhubungan dengan semuanya itu.3:27 Si bengket ku bas terpuk Kohat e me kap keluarga-keluarga Amram, Isar, Hebron ras Usiel.
3:28 Teremna dilaki si umurna sada bulan ntah pe lebih si isuratken e me 8.600 kalak.
3:29 Terpuk si enda erkemah arah bagin Selatan Kemah e,
3:30 janah si jadi kepala terpukna e me kap Elisapan anak Usiel.
3:31 Terpuk enda ertanggung jawab kerna Peti Perpadanen, meja, nahe lampu, batar-batar, perkakas si ipake imam-imam i bas Ingan si Badia, ras kire-kire si i bas dalan bengket ku bas Ingan si Badiana kal. Kalak enda ertanggung jawab ngurus kerina dahin si lit hubungenna ras barang-barang enda.
A. PERSIKAPEN
• Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
• Nikapken ingan persembahen.
• Nungkun ras nuratken topik pertoton sapaat.
• Kune i bas sektor entah jabu kepkepen, perdalanen PJJ ibabai Pertua, Diaken, Pengurus PJJ, bage pe sekalak si enggo iaturken idur pengurus PJJ. Adi kune PJJ ilakoken i bas teptep jabu ngawan perpulungen, maka perdalanen PJJ ibabai bapa, nande, bage pe anak.
• Sope benaken PJJ, banci kita rende alu make ende-enden pop rohani.
• Janah kerina perdalanen PJJ enda banci iubah (imodifikasi) rikutken perluna.
• Erdandanken perpulungen jabu-jabu e me ingan sharing grup/wadah kesaksin e maka mehuli leben pandita, pertua, diaken, entah emeritus nuriken Kata Dibata.
B. PERPULUNGEN JABU-JABU / PERPULUNGEN JABU
- Rende KEE No. 368:1 (ibabai sekalak anak)
Sipuji Tuhan Dibatanta, kataken bujur baNa
Sabap lA si merekenca, pasu-pasu man banta
Reff: Mbelin ras mulia, kekelengen Tuhan
Ku bas doni enda
Ajari o Tuhan kamik’rina anakNdu
Naksiken kerina perbahanenNdu - ERTOTO (IBABAI BAPA)
- RENUNGEN
Teks : BILANGEN 3:27-31 (IBABAI NANDE)
Tema : ERTANGGUNG JABAB NGURUS PERALATEN RUMAH PERTOTON
Ibas kegeluhen enda, teptep jelma pasti lit tanggungjabab si arus i dalankenna. Tanggungjabab (“responsibility”) lit dua erti kata penting e me tanggung (response) ras jawab (ability) ertina kewajiben, tugas, beban si arus i tanggung bage pe i dalanken alu setia i bas kegeluhen, janah adi la lit si ertanggung jabab i bas sada dahin, maka banci saja kerina dahin e jadi murde.
Bage pe i bas oratenta enda, guna kiniraturen Kemah Perjumpan ras njaga kebadianna, Dibata milih kalak Lewi erdahin nampati imam Harun ras anak-anakna ngurus kerina alat-alat si lit i bas Kemah Perjumpan (Bil 3:5-9), sabap Kemah e, e me tanda kerehen Dibata. Pembagin tugas ras tanggungjabab man telu anak Lewi pelain-lain:
• Terpuk Gerson ertanggungjabab kerna kemah, tarumna si bas ras si arah darat kire-kire guna dalan bengket, kire-kire si jadi kesain i sekelewet kemah e ras batar-batar bage pe kire-kire dalan bengket ku bas kesain (ay. 26-27).
• Terpuk Kohat ertanggungjabab kerna peti perpadanen, meja, nahe lampu, batar-batar, perkakas si ipake imam i bas ingan si Badiana ras kire-kire si i bas dalan bengket bas Ingan Si Badiana kal (ay. 27-31),
• Terpuk Merari ertanggungjabab kerna papan, dingding kemah, beloti-belotina ras tiang-tiangna, alas ras kerina perkakas kemah e. kerina terpuk e ndahiken tugasna jine alu ertanggungjabab i bas kebadian Kemah Perjumpan e.
Temata e me ertanggungjabab ngurus Rumah Pertoton, selaku kalak si tek man Tuhan, enggo nge kita ikut eratanggungjabab ngurus Rumah Pertoton? Adi kalak Lewi kerina ertanggungjabab i bas tugasna njaga perkakas kemah perjumpan ras Tuhan.
Uga nge penggejapenta adi tupung kebaktin i gereja sound na storing, ruangen melket, interior gereja merap ras la teratur? Tentuna sangat terganggu, perpulungen si hadir pe lanai fokus i bas ersembah man Tuhan. Uga maka sempat lit barang si ceda enggo agak mesera mpehulisa? Lit kuan-kuan nina “lebih menukah ngelitkenca asangken ngurussa”. I bas ngelitkenca tuhu semangat kal kita muat bagin, tapi kinatana bas ngurussa enggo kurang perhatinta. Si akap rusur e tugas tim inventaris, me enggo lit tim inventaris, me nggo lit tim kebersihen, bage me usur pengakapta seh maka Rumah Pertoton e enggo kurang iperdiateken perkakasna. Adi rumahta pe si urus, tentuna rumah Tuhan oratna lebih sikap si ban e me tanggungjababta selaku kalak si erkiniteken. Lit nina lagu “gereja bukanlah gedungnya dan juga menaranya tapi gereja adalah orangnya”. Payo gereja labo gedungna, tapi arah gedung e banci teridah uga kualitas kiniteken kalak si lit i bas gereja e. Adi murde gedung gereja e, murde ka nge kualitas kiniteken kalak si lit i bas gereja e. E maka erkiteken kegeluhenta enda Tuhan mpekena-kenasa tiap wari, jadi kita pe arus muat bagin i bas ngurus Rumah Pertoton. Penandaita alu payo Tuhan e njemba kita muat bagin i bas mpekena-kena Rumah Pertoton.
NURIKEN PENGGEJAPEN
• Anak
• Bapa
• Nande
DISKUSI/SHARING RAS AKSI
- Sedekah enda enggo nge lit tanggungjababta i bas ngurus peralaten Rumah Pertoton? Adi nggo turiken contohna, adi lenga kai si ngambati!
- Arihken lah i bas sektor erbahan aksi guna ngelitken perkakas gereja ras erbahan kebersihen.
PERSEMBAHEN RENDE: KEE No. 343:1 (ibabai anak)
Pasu- nasu bas Tuhan nari, gejapken kami teptep wari
Bas naksa-paksa geluh kami, Kam me tetap singkawali
Pasu-pasu bas Tuhan nari, jadi pergegeh tendi kami
Guna ndalani wari-wari, si rehna bas Kam Tuhan nari
Reff:
Pasu-pasu dage o Tuhan
Persembahen kami anakNdu
Labo kapen enda metunggung
Persembahen si nggo pepulung
AjariNdu pe kami gelah min
Tetap ngasup mere man Tuhan
PERTOTON SAPAAT
- Gelah ngawan perpulungen ngasup ertanggungjabab muat bagin i bas ngurus Rumah Pertoton (Nande)
- Notoken seksi pembangunen gereja, seksi inventaris bage pe seksi kebersihen gereja (Pengurus PJJ)
- Persembahen, si mada jabu, si turah i bas perpulungen (Serayan Tuhan)
RENDE KEE No. 402: 3
Perban kekelengen Ndu, jadiken Ndu geluhku
Meherga ras erguna, desken batu permata
Reff:
Asa ngasup gegehku, kuikutken kataNdu
Jesus Kam si perkuah, ku puji ras kusembah
PERTOTON TUHAN (IBABAI SERAYAN)
MOMO
C. JEDA RAS PENUTUP
Pdt. Edward Sembiring, S.Th., M.M.
HP/WA: 081376616564