(HUT Mamre si pe 28 ken)
Ogen : Masmur 18: 2 – 4
Tema : Dibata Sumbul Kegeluhen
Tujun : Gelah Saitun:
- Ngusih Daud si tetap teneng i bas ngalaken perbeben geluh.
- Nggeluh teneng jadi penggurun man anak – kempu.
- Erbahan perkunjungen guna ngiahken Mamre si langa reh ku kegiaten Gereja (Kebaktian Minggu, PA Mamnre entah pe Perpulungen Jabu-jabu).
- BENA KATA
Reh belinna kebiaren ras perbeben i bas keheluhen, reh belinna ka gegeh ras penampat si ibereken Dibata man kalak si ernalem man baNa. Man kalak si erkiniteken, la lit perbeben si la banci ibentasina, sabab Tuhan simereken penampat. Emaka kalak Kristen, si tek man Dibata arah Yesus Kristus, la mbiar ngalaken tantangen-tantangen i bas kegeluhen, la ia perlu kiam i bas tantangen nari, sabap tantangen ras perbeben erbahanca ia terbentuk jadi kalak si tangguh, megenggeng sabar ras bijak. Tantangen, perbeben ras kebiaren e ka erbahanca ia reh ndeherna ras Dibata, janah arah e ka nge ia ngeteh bahwa Dibata e tuhu-tuhu erkuasa. Bagenda me penggejapen raja Daud i bas pengalamenna ras Dibata.
- MPEBAGESI OGEN
Masmur 18 endae me Ende-enden Daud erkitken menang i bas ancamen-ancamen si hebat si arus ihadapina, termasuk ancamen pembunuhen i bas raja Saul nari (musuh dalam selimut), bagepe tekanen-tekanen i bas musuh-musuhna idarat Israel nari, bangsa Kanaan ras Filisten (musuh sungguhan),
Sicedana kal ate Daud e me sanga iayak-ayak raja Saul ia. Ceda atena erkiteken arusna raja Saul ngkapiti ia, sabap sada bangsa ia, bagepe Daud si erbahanca maka Israel menang ngelawan kalak Filistin si ipimpin Goliath. Tapi erkiteken rakyat Israel lebih mujiken Daud asangken Saul, turah “cian ate” i bas pusuh raja Saul. Emaka irencanakenna munuh Daud, ilembingna Daud tapi Tuhan ngkawalisa, la kena. Kenca kiam Daud i bas istana nari, iayak-ayak Saul alu tenterana si enterem. Tapi Tuhan tetap ngkawali Daud. Saul e me musuh dalam selimut, enda lebih berbahaya asangken musuh sesungguhnya, sabab siakap denga teman kepeken lanai, gampang akapna erbahan kita cilaka. Tapi erkiteken Tuhan singkawali, Daud selamat i bas usaha pembunuhen Saul nari (1 Samuel 19 seh 30. Tole, ope Daud jadi raja, enggo mbue italukenna musuh-musuh Israel, bagepe terlebih kenca ia jadi raja, mbue bangsa-bangsa sideban isekitar Israel italukenna. Setiap ancamen i bas bangsa sideban nari, ngasup Daud nalukenca.
Emaka i bas Masmur 18, Daud erbahan syair ende-ende kerna penampat Dibata simereken kemenangen man bana. Labo erkiteken gegehna jine. Emaka ikatakenna: la tanggung keleng atena man Tuhan Dibata, la saja erkiteken pengkawaliNa, Dibata tapi pe igejapkenna kal maka Dibata e sumbul kegeluhenna. Dibata e desken ampang-ampang man Daud, emaka la perlu ia mbiar. Erkiteken lit ampang-ampang si paguh, la terlawan emaka teneng pergeluhna. Menurut pengalamen pribadi Daud, pengkawali Dibata tuhu-tuhu terandalken. Emaka seterusna i bas geluhna, Daud tetap erlebuh man Dibata terutama tupung iancam musuh-musuhna. Ende-enden enda itulisken Daud erpalasken hubungenna ras Dibata kidekah ia nggeluh.
- PENGKENAINA
La lit jelma / manusia si la lit perbebenna, tantangen i bas geluhna. Perbeben enda megati lit reh erkiteken masalah i bas keluarga, sangkep nggeluh, ekonomi, bagepe anak-anak si la bagi ukur ndalinken geluhna. Enda banci ikataken tantangen geluh dari dalam. Banci saja jadi maka kade-kadenta nge si rukur la mehuli man banta. Megati lebih gulut siakap rukur ada masalah ras perbebenta reh i bas kalangan sendiri ras keluarga nari.
Banci ka nge keguluten rukur erkiteken kalak sideban, i bas teman si labo lit perkade-kadenta nari. Itebu-tebu temanta berbisnis, entah kalak sideban encekuraki kita, ercian ate nandangi kita, rsd. Enda kerina mabai ukur gulut, la kita teneng ibahanna.
Perbapan-perbaparn i bas pepulungenta pe tentu la mungkin pulah i bas perbeben nari, simabai gulut perukurenna. Emaka kita Saitun ikut ertanggungjawab nandangi perbapan si lebih nguda asangken kita, guna ngajuk ia ernalem man Dibata saja. ula ngandalken ukurta sebagai manusia. Emaka Saitun arus ngajuk anggota-anggota Mamre i bas perpulungenta gelah ikut muat bagin i bas kegiaten-kegiaten Gereja, umpamana ku Perpulungen jabu-jabu, PA Mamre, Retreat ras kegiaten sidebanna. Gelah reh enteremna perbapan-perbapan GBKP aktif i bas kegiaten Gereja terutama kegiaten Mamre GBKP Selamat Ulang Tahun Mamre si pe 28 ken. Tuhan simasu-masu Kategorial Mamre GBKP, ija pe kam kerina ringan.
- PERTOTON
Bapa kami si ringan i bas surga, ikataken kami bujur man baNdu, i bas usihen si enggo icidahken kemahenNdu Raja Daud ernalem ras mengandalken Kam sebagai pengawal ras penampatna. Bahan Bapa, maka kami pe kerina anggota Saitun GBKP ngasup ernalem man bandu i bas kerina perbeben ras tantangen geluh kami. Bagepe pakeken kami kerina gelah nggit ngajuk perbapan GBKP – Mamre lako ernalem pe man baNdu saja. Pasu-pasu pe Mamre GBKP si berulang tahun pe 28 ken enda.
Bujur Tuhan, aloken pertoton kami i bas gelar AnakNdu Yesus Kristus. Amin
- DISKUSI
- Kuga nge pendapatndu kerna Daud iayak-ayak raja Saul? Irencanakenna munuh Daud si enggo nampati ia i bas naluken Goliath? Kuga perasaan Saul maka seh ukurna ngerencanaken pembunuhen? Kuga ka perasaan Daud sendiri?
- Kai patut silakoken adi gulut ukurta erkiteken kalak sideban, kade-kadeta terutama? Kuga sikap hidupta nandangi ia, ras ku ise kita ngguru?
Pdt. M.P. Barus M.Th