Muat Bagin Guna Kiniulin Jelma Sienterem
Yeremia 29: 7 – 8
29:7 Usahakanlah kesejahteraan kota ke mana kamu Aku buang, dan berdoalah untuk kota itu kepada TUHAN, sebab kesejahteraannya adalah kesejahteraanmu.
29:8 Sungguh, beginilah firman TUHAN semesta alam, Allah Israel: Janganlah kamu diperdayakan oleh nabi-nabimu yang ada di tengah-tengahmu dan oleh juru-juru tenungmu, dan janganlah kamu dengarkan mimpi-mimpi yang mereka mimpikan!29:7 Erdahinlah guna kiniulin kuta-kuta ku ja kam enggo Kubuang jadi tabanen. Ertotolah guna keperlun kuta e sabap adi sikap ia kam pe ikut sikap.
29:8 Aku TUHAN Dibata nu Israel mpersingeti kam, ola pelepasndu dirindu itipu nabi-nabi si lit i tengah-tengahndu entah kalak si deban si penipu, si ngatakenca maka banci ia ernubuat kerna wari-wari si pepagi. Ola perdiateken nipi-nipina!
(HUT RI 17 Agustus 2023 pe 78 ras Politik)
Ogen : Jeremia 29:7-8
Tema : Muat Bagin Guna Kiniulin Jelma Sienterem
Tujun: Gelah Saitun:
- Meteh dahin Jeremia mpeseh kecibal kalak Israel i Babel
- Tetap erdahin arah perukuren ras perbahen guna kiniulin ija kita tading, khususna i bas ngalo-ngalo PEMILU 2024
- Tutus ertoto gelah ngawan GBKP ikut muat bagin i bas erban ras ngelakoken kebijaken itengah-tengah bangsa ras negaranta banci erdahin alu tutus ras mehuli
I. BENA KATA
Keberadaan kalak si erkiniteken ijapa pe ia tading ras kai pe si ilakokenna eme ncidahken kerna buah kiniteken nandangi Dibata. I japa pe ia tading ras kai pe si ilakokenna maka e merupaken tanda pelayanenna guna naksiken kerna berita si meriah ku sekelewetna. Pendilo man banta guna ngelai pebelangken berita si meriah labo i bas lingkungen gereja ngenca tapi arah kerina dampar kegeluhenta subuk i bas inganta tading, inganta erdahin ras kerina cara geluhta eme lapangen guna inganta ngelai. E maka kehadiren anak-anak Tuhan eme kehadiren simaba pasu-pasu ku sekelewetta, sebab kehadiren anak-anak Dibata merupaken kehadiren Dibata guna kalak sideban. Ijapa pe kita tading ras kai pe si ilakoken kita maka si e labo guna kiniulinta ngenca tapi pe guna kiniulin kalak sinterem.
II. MPEBAGESI OGEN
Kalak Israel sangana i bas pembuangen i Babilon. Dekahna kalak Isarel tading jadi tabanen i Babel enggo isingetken Tuhan 70 tahun. Situhuna lit arapen kalak Israel maka meter min kalak enda banci mulihken ku Jerusalem sebab iakapna Jerusalamen me kota Dibata janah ije ngenca Dibata tading ras mereken pasu-pasuNa. Ketedehen ate kalak Israel e maka segera mis mulihken ku Jerusalem i manfaatken nabi palsu si mberitaken maka segera me kalak Israel pulah i bas tabanen Babilon nari maka mulih ken ku Jerusalem. Erkiteken si e kalak Israel la tutus atena nggeluh i taneh Babilon, la lit semangatna erkaipe, la lit ia muat bagin i tengah-tengah kuta inganna tading i Babilon. Keberadan kalak Israel i Babilon la jadi pasu-pasu.
I bas situasi sibage me maka ngerana Nabi Jeremi mpeseh kai sura-sura Tuhan nandangi kalak Israel si enggo tading i Babilon. Lit rencana Tuhan arah kehadiren kalak Israel man kalak Babilon eme gelah kalak Israel banci jadi pasu-pasu man kalak Babilon aminna kalak Isarel sebage tabanen. Sura-sura Tuhan gelah arah kehadiren kalak Israel maka itandai kalak Babilon kedungenna ise kin Dibata si isembah kalak Israel, janah arah e pe kari bangsa Babilon ngakuken maka Dibata si isembah kalak Israel eme Dibata simada Kuasa ras si tetap engkelengi anak-anakNa. Bangsa Babilon si megegeh ras erkuasa kedungenna talu iteruh kuasa Dibata si isembah kalak Israel. Adi Tuhan nuruh kalak Israel guna majeken rumahna, nuani peken, pejabuken anak-anakna ras erdahin eme gelah kalak Israel banci petandaken kinitekenna ras petandaken Dibata si isembahna man kalak Babilon. Arah kehadiren ras cara nggeluh kalak Israel si jadi pasu-pasu maka enda banci mereken pengaruh positif man kalak Babel. Alu bage melala kesempaten kalak Israel guna banci muat bagin i bas lingkungen inganna tading. Alu kalak Israel tading ndekah i Babilon maka erbuena peluang guna petandaken kerna uga kin kiniteken kalak Israel, cara beribadah ras perentah Dibata si biasa idalanken kalak Israel.
III. PENGKENAINA
Perlu sitotoken kerina anak-anak Tuhan si erdahin i bas kerina bidang kegeluhen baik i bas pemerintahen bagepe non pemerintahen maka i bas ia erban keputusen, ras kebijaken bagepe i bas ndalankenca maka tuhu-tuhulah ilakokenna alu erkemalangen man Tuhan. Kehadiren anak-anak Dibata ije eme guna maba pasu-pasu e maka setiap keputusen/kebijaken ras ndalankenca siukurina uga maka kesejahteran kalak sinteremlah iutamakenna. Kesempatan ras kekuasaan si lit bas ia ipakekenlah uga kin arusna alu payo gelah arah e ermulia gelar Tuhan.
I bas tahun 2024 silakoken me pemilu guna memilih presiden ras wakil presiden, Anggota Dewan Perwakilan Rakyat (DPR, DPRD I, DPRD I), Gubernur ras Bupati . Keterlibatenta sebage anak-anak Dibata tentu harus sicidahken i tengah-tengah bangsa ras negaranta enda. Sikap politik sebagai kita ngawan GBKP la banci golput sebab la banci lang kita harus nentuken sikap ise kalak si ipercayaken guna berperan sebagai pemimpin bangsa ras negaranta bagepe si menjadi perwakilan rakyat. Arah Presiden /Wakil Presiden, DPR/DPRD I/DPRD II bagepe Gubernur ras Bupati enda me kari simemimpin ras menentuken kebijaken bangsa ras negaranta bage daerah ija kita tading, Keterlibatenta i bas pemilu enda eme tanda tanggungjabapta selaku anak-anak Dibata sekaligus selaku warga Negara Indonesia si mehuli. Adi lit ngawan perpulungennta si atena ikut ipepilihken maka secara postif si e sinen dalam rangka gelah kalak sierkiniteken banci berperan ras mereken pengaruh i tengah-tengah bangsanta.
Adi kin memang si idah kehadiren anak-anak Tuhan ije guna jadi pasu-pasu tentu patut si totoken ras sidukung. Selaku kalak si erkiniteken kita arus mereken contoh i bas nulak politik uang, ertina ula sipilih pemimpin erkiteken igalarina soranta maka sipilih ia, bagepe ula ka si dayaken hak soranta maka sipilih ia. Tapi sipilih lah situhu-tuhu kalak si rukur guna kesejahterannta -bagepe kuta ingannta tading. Janah sipenting pe ula lupa notoken kerna proses ras pelaksanan pemilu enda maka erdalan alu mehuli.
IV. PERTOTON
O Tuhan, sampatindu kerina anak-anakndu sierdahin subuk si erban kebijaken/ keputusen bagepe sindalankenca gelah banci ia alu tutus ngelakokenca janah kerina si idahikenna gelah banci mabai kiniulin man kalak sinterem. Pasu-pasundu kami rakyat Indonesia i bas ngalo-ngalo Pemilu 2024 maka banci erdalan alu mehuli. Terpilih lah pemimpin kami si mpelebeken kesejahteran ras kiniulin Negara kami, si ngasup njagai Negara Kesatuan Republik Indonesia, si tetap mpelebeken Bhineka Tunggal Ika ras toleransi umat beragama. Amin.
V. METODE: DISKUSI
- Engkai maka kalak Israel la nggit majeken rumahna, tutus erdahin, nuani peken ras pejabuken anak tupung tading i Babilon?
- Kai banci silakoken maka kita maba kiniulin man kalak sinterem?
- Kai si perlu sipersiapken i bas kita ngalo-ngalo Pemilu 2024
Pdt. Rehpelita Ginting
GBKP Budi Luhur