Ergakenlah Budaya Si Enggo Lit
Galatia 3: 28 – 29
3:28 Dalam hal ini tidak ada orang Yahudi atau orang Yunani, tidak ada hamba atau orang merdeka, tidak ada laki-laki atau perempuan, karena kamu semua adalah satu di dalam Kristus Yesus.
3:29 Dan jikalau kamu adalah milik Kristus, maka kamu juga adalah keturunan Abraham dan berhak menerima janji Allah.3:28 Dage lanai bo erndobah kalak Jahudi tah kalak Junani, budak tah kalak bebas, dilaki ras diberu. Sabap kerina nge kam sada i bas Kristus Jesus.
3:29 Adi kam sikerajangen Kristus, kesusuren Abraham me kam, janah ialokenndu me kai si enggo ipadanken Dibata.
(Ersembah I bas Budaya)
Ogen : Galati 3:28-29
Tema : Ergakenlah Budaya Si Enggo Lit
Tujun : Gelah Saitun:
- Ngangkai maka aminna pe lit erbage-bage budaya tapi ersada erpalasken keleng ate Kristus.
- Nggit jadi usihen i bas ngaloken kerina budaya si enggo lit.
I. BENA KATA
Lit kap kata ajar si isehken tua-tuanta si arah lebe, nina: “Ula kel kita i bas geluh enda sinungkat-nungkat batang galuhna, sinandai-nandai takal manukna” pengajaren enda isehken arah anding-andingen. Antusenna, i bas geluh enda ula kel sempat erkendobahen siidah manusia. Biak sembuyak tah kalimbubu tah anak beruta saja ngenca siperdiateken. Tapi i bas nehken kekelengen arus isehken man ise saja gia. Arah kata Dibata, si jadi oraten í bas PA sekali enda, Saitun ipersingeti mulihi kerna kuga kearusen geluh selaku sikerajangen Kristus, selaku kesusuren Abraham. Bagepe segelah Saitun, terbeluh ngergaken budaya si enggo lit guna jadi dalan nehken keleng ate Kristus.
Alu bage, Saitun banci jadi usihen ras jadi penggurun man sinursurna.
II. MPEBAGESI OGEN
Rasul Paulus terberita sekalak rasul si nehken Berita Si Meriah man kalak si la Jahudi. Rasul Paulus nuriken alu tangkas man perpulungen Galati, kerna pengajaren keterkelinen. Lit si ngajarken man kalak si la Jahudi, guna ndatken keterkelinen eme arus ndalanken undang-undang Taurat. Arus isunatken, eme si jadi tanda sesekalak e enggo bengket jadi anak-anak Dibata. Pengajaren enda me si ipandang rasul Paulus. Rasul Paulus nehken pengajaren guna mereken pengangkan si payo man perpulungen Galati. Labo erkiteken ndalanken undang-undang maka manusia terkelin, tapi erkiteken kiniteken. Orat geluh rasul Paulus nina “Lanai aku si nggeluh, tapi Kristus kap si nggeluh i bas aku. Kegeluhenku si genduari i bas doni enda kugeluhken erdandanken kiniteken man Anak Dibata si ngkelengi aku dingen ngendesken DiriNa man gunangku” (Gal 2:20). Emaka nina rasul Paulus “Dage lanai bo erndobah kalak Jahudi tah kalak Junani, budak tah kalak bebas, dilaki ras diberu. Sabap kerina nge kam sada i bas Kristus Jesus. Adi kam sikerajangen Kristus, kesusuren Abraham me kam, janah ialokenndu me kai si nggo ipadanken Dibata.
Arah pengajaren rasul Paulus enda ngataken maka bali kap ergana iakap Dibata kerina manusia ntah bangsa i doni enda.Adi gelgel, terberita me kalak Jahudi eme bangsa pilihen Dibata. Bangsa si deban ikatakenna bangsa perbegu si la nandai Dibata. Kenca kerehen Jesus Kristus ku doni enda, teridah maka isehkenNa kekelengen man kerina bangsa. Jesus Kristus jadi Juruselamat man doni enda.
Emaka kerina kalak sierkiniteken, sikerajangen Kritus ras igelari pe kesusuren Abraham. Man kalak sierkiniteken ngaloken pasu-pasu si ipadanken Dibata eme keterkelinen.
III. PENGKENAINA
Meriah ukurta, erpalasken pengajaren rasul Paulus maka i adep-adepen Dibata sada pe lanai erkendobahen. Kerina bangsa i doni enda ikelengi ras itebus Jesus Kristus. Si penting eme kita tek man Jesus Kristus si enggo nebusi kita i bas dosa-dosa nari. Tandana kita erkiniteken, sicidahken arah orat geluhta. Sipermuliaken Dibata arah kerina dampar geluhta. Terlebih-lebih arah budayanta selaku kalak Karo. Nini-nininta nai enggo nuanken ras nursurken pengajaren si mehuli. Pengajaren ras perbahanen guna nehken kekelengen sapih-sapih manusia bagepe man kerina tinepa Dibata. Bayak kel tuhu kalak Karo i bas mpeteguhi pengerakut kiniersadan ras kalak si deban. Sangkep geluh kalak Karo lit eme arah perkade-kaden dareh, perkade-kaden erkiteken perjabun ras perkade-kaden erkiteken teman meriah. Alu bage maka man kalak Karo pe lanai erkendobahen kerina manusia. Kerina irakut alu perkade-kaden guna nggeluh sikeleng-kelengen.
I bas budaya tah kesemalen kalak Karo pe teridah kiniersadan. Kai-kai saja pe dahin maka kerinana ibenai alu runggu. Si e ngatakenca maka dahin e dahinta ras-ras. Irasken menakenca, ngelayasisa ras ndungisa. Bagepe dikune lit perbeben sekalak/sada jabu i bas sangkep nggeluh maka sangkep nggeluh e ngeripe guna ndungisa. Alu bage maka sope kalak Karo ngaloken Berita Si Meriah situhuna Dibata enggo nuanken erbage-bage si mehuli arah budayanta. Emaka, marilah tetap ergaken ras dalanken erbage-bage budaya si lit. Arah budaya e sisehken keleng ate Kristus. Arusna, kenca kita ngaloken Berita Si Meriah, reh kuhna kekelengenta. Erkiteken kita sikerajangen Kristus, tentuna kegeluhenta pe ngusih kempak Jesus Kristus. Jesus Kristus si nehken kekelengenNa alu la erkendobahen man kerina tinepaNa. Saitun arus jadi usihen i bas makeken budaya, ndalanken adat ras i bas encidahken orat geluh mehamat erkalimbubu, medes ersembuyak/senina ras metami eranak beru. Saitun pe selaku kalak si erkiniteken, pentar i bas ngajarken ras jadi usihen i bas mpelimbarui budaya si i bassa lit kiniteken agama pemena/perbegu. Saitun arus jadi penggurun, maka dikuni lit kesemalen kiniteken agama perbegu segelah ula ilakoken. I bas ndalanken budaya e arus iterangi kata Dibata. Olanai lit kiniteken man Dibata-Dibata si deban.
IV. PERTOTON
O Dibata Bapa kami si ni Surga, ikataken kami bujur man baNdu, arah kataNdu si enggo ibegiken kami. Ertambah-tambah pengangkan kami, ertambah-tambah keriahen kami. Ertamabah-tambah kiniteken kami. KesahNdu Si Badia simpegegehi kami guna ndalanken kataNdu. Isehken kami kekelengen man kerina tinepaNdu alu la erkendobahen, I bas Jesus Kristus kami ertoto, amin.
V. DISKUSI
- I bas kai sinimaksudken rasul Paulus maka lanai erkendobahen kalak Jahudi tah kalak Junani, budak tah kalak bebas, dilaki ras diberu?
- Turiken kesemalen-kesemalen kai saja si lit i bas budaya kalak Karo si encidahken pengerakut kiniersadan ras keleng ate!
Pdt. Kalvinsius Jawak
Rejeki itu bukanlah sebatas hitungan rupiah, juga bukan
tumpukan barang mewah, tapi rejeki itu adalah persolan
rasa. Rejeki bukan tentang apa yang kita miliki, tapi rejeki
adalah yang kita nikmati.
Kasur yang empuk bisa kita bell, tapi tidur yang nyenyak
itulah rejeki. Hidangan yang mahal bisa kita bell, tapi
kelezatan makan itulah rejeki