(Ersembah i bas ke-Kristenan)
Ogen : Roma 12: 1 -2
Tema : Ersembah e me orat nggeluh Kalak Kristen
Tujun : Gelah Saitun:
1)Tetap ersembah man Dibata i bas kerina kecibal geluh
2)Meteh maka lit perulihen kalak ersembah man Dibata.
Persembahan yang benar
12:1 Karena itu, saudara-saudara, demi kemurahan Allah aku menasihatkan kamu, supaya kamu mempersembahkan tubuhmu sebagai persembahan yang hidup, yang kudus dan yang berkenan kepada Allah: itu adalah ibadahmu yang sejati. 12:2 Janganlah kamu menjadi serupa dengan dunia ini, tetapi berubahlah oleh pembaharuan budimu, sehingga kamu dapat membedakan manakah kehendak Allah: apa yang baik, yang berkenan kepada Allah dan yang sempurna.
I. BENA KATA
Geluhta, kai si lit i bas kita, kai si lit isekelewetta, Dibata kap empuna. IA si nepasa, IA erkuasa nandangi kita kerina. IberekenNa man banta erbage-bage si mehuli gelah malem ateta nggeluh. IperlengkapiNa kita alu kepentaren si erbahanca melala perlengkapen nggeluh sinanami, sierbahanca ertambah-tambah keriahenta. IberekenNa man banta perukuren si mehuli alu pengajari Kesah Si Badia, maka dame pusuhta ras teneng i bas ngalaken kerina keadan si la bagi ukurta. Tuhu-tuhu sangap kal kita ibahanNa.
Si jadi perenungen man banta, enggo nge sigejapken kesangapen e i bas geluhta? Adi IA kal simada geluhta, enggo nge si sembah IA bagi patutna?
II. MPEBAGESI OGEN
Bahan PA-nta Minggu enda (Rm 12:1-2) ngingetken kita kerna orat nggeluh kalak si erkiniteken man Dibata si erkuasa, si nepa langit ras doni, si engkelengi manusia, si mereken man manusia perukuren ras kepentaren lebih asa pemereNa man tinepaNa sideban.
Orat nggeluh kalak Kristen (sierkiniteken) eme ngendesken kula sebage persembahen si nggeluh man Dibata; la mpelepas diri jadi seri ras doni enda; mere perukuren ipelimbarui Dibata.
Teluna orat ngeluh arus tap (ilakoken secara terus-menerus), la banci sekali-sekali entah pe kentisik-kentisik. Orat ibagenda arus tetap ilakoken sabab kita nggo ndabuh ku bas dosa, emaka katawari kita la megermet, entah lalai ngelakokenca, mis reh si iblis ngkuasai kita,
Gegehta ndalankenca e me arus tetap nginget perkuah ate Dibata si mbelin, janah nginget maka kita e me mahluk (tinepa) si rukur. Perbahan kita rukur, e maka sieteh mbedaken kai siarus silakoken kai si la banci. Perban kita rukur maka ngasup kita nggejabken perkuah ate Dibata, ngasup kita ngendesken
geluhta sebage persembahen si nggeluh. La kita bali ras doni enda, sadar kita i bas kelemahen ras dosanta e maka sibere man Dibata perukurenta guna ipelimbaruiNa. Erdandanken sienda kerina maka la lit alasen i bas kita la ngasup nggeluh bagi orat nggeluh kalak Kristen.
Emaka adi nggeluh I bas orat nggeluh kalak Kristen lit ulih nggeluh si ersembah. Ulih nggeluh si ersembah e me kap ndatken kai sura-sura Dibata, kai si mehuli, kai si ngena ateNa janah kai si serta. Arah kata enda teridah maka ndatken sura-sura Dibata, kai si mehuli, singena ateNa, kai si sempurna, e me kesangapen, upah. Labo mesunah ndatken sienda kerina, aminna pe tempa kerina enda enggo si eteh, si dat, tapi situhuna langa bo. E maka, sangap kal kalak si ndatken sura-sura Dibata, si mehuli ras sidebanna. Kesangapen ras pasu-pasu e, labo terjeng meriah ukurta, ndatken kai sinisuraken, tapi pe ndatken sura-sura Dibata dingen ngelakokenca.
III. PENGKENAINA
Ndatken sura-sura Dibata arusna jadi perayaken kalak si tek. Salah Sada dalan guna ndatkenca eme kap tetap ersembah man Dibata i bas kerina kecibal geluhta. Arah pengerana, perbahanen rikut ras perukuren. Kerina enda encidahken maka kita ersembah man Dibata. Jaga diri gelah la seri ras doni si dem alu kejahaten, e maka bere perukurenta man Dibata guna pelimbaruiNa, e maka si datken kai sura-suraNa, si ngena ateNa, Alu mpersembahken geluhta, si sembah IA i bas kerina kecibal geluhta, maka Dibata lit i bas kita dingen erkuasa, emaka kuasa-kuasa sideban lanai ngkuasai kita.
Kerina enda labo dahin si sea-sea, tapi lit ulihna i bas Dibata nari. Bagi nina: “Erkiteken sie o senina-senina si kukelengi, tetaplah ukurndu, ola mbewat-mbewat. Mejingkatlah kam rusur i bas ndahiken dahin Tuhan, sabab ietehndu maka labo percuma dahin si idahikenndu i bas Tuhan” (1 Korinti 15: 58)
Ertina la lit si la rulih i bas Tuhan, la ipediatna kita mulih alu ngambe-ngambe. E maka bahanlah pendahin ras perukurenta jadi persembahen si nggeluh, si ngena ate Dibata. Kita labo terjeng ersembah man baNa tapi perkuah ateNa pe tuhu-tuhu mbelin kal man banta (ayat 1). Ingetlah e…
IV. PERTOTON.
Bujur i bas KataNdu Tuhan si ngingetken kami gelah ersembah man bandu, sabab eme biak kami selaku kalak si tek. Pengarapen kami tambahiNdu kepentaren ras kengasupen kami guna ndalankenca, gelah banci idatken kami kai si ngena ateNdu. Alu bage la sia-sia kami jadi kalak Kristen. I bas Jesus ipindo kami man banNdu alu dem pengarapen. Amin.
V. DISKUSI
- Turiken sekali nari, kai-kai saja orat nggeluh kalak si erkiniteken (kalak Kristen) rikutken Roma 12:1-2.
- I bas perdalanen geluhta sitep-tep wari, kai nge kendalana maka la kita ngasup mpersembahken geluhta man Dibata arah pengerana ras perbahanenta? Turiken!
- Kai sibanci ibahandu sijadi tanda kam mpersembahken geluhndu man Dibata ku lebe enda. Lakokenlah!
Pdt. Jennie E. Keliat