Keluarga Dibata
Efesus 2: 19 – 22
2:19 Demikianlah kamu bukan lagi orang asing dan pendatang, melainkan kawan sewarga dari orang-orang kudus dan anggota-anggota keluarga Allah,
2:20 yang dibangun di atas dasar para rasul dan para nabi, dengan Kristus Yesus sebagai batu penjuru.
2:21 Di dalam Dia tumbuh seluruh bangunan, rapih tersusun, menjadi bait Allah yang kudus, di dalam Tuhan.
2:22 Di dalam Dia kamu juga turut dibangunkan menjadi tempat kediaman Allah, di dalam Roh.2:19 E maka kam si labo kalak Jahudi lanai kam kalak asing ntah pe pertandang. Kam pe genduari enggo jadi sada warga ras anak-anak Dibata dingen enggo jadi anggota keluargaNa.
2:20 Kam pe ipajekken i babo palas si itamaken rasul-rasul ras nabi-nabi, janah Kristus jine me palas persukina.
2:21 Si nentuken susunen kerina bagin-bagin bahan-bahanen e. Bahan-bahanen e tambah belinna janah jadi Rumah Pertoton si Badia i bas Tuhan.
2:22 I bas persadanndu ras Kristus, kam pe ras kerina kalak si deban iranggut jadi sada rumah, i ja Dibata ringan alu KesahNa.
Teks : Epesus 2:19-22
Tema : Keluarga Dibata
Tujun : Gelah Mamre:
- Meteh maka kerina ngawan perpulungen GBKP e me anggota keluarga Dibata
- Muat bagin i bas kerina dahin-dahin gereja
I. KATA PENARUH
Sada kebutuhen utama manusia (kebutuhenta) gelah ula mesunah stress (mengalami gangguan jiwa), ras banci ngenanami keriahen kemalemen ate ras dame, e me adi mehuli iketen pusuh (bonding: ikatan emosional, batin) ras kalak si ndeher ras kita. Terutama i bas jabu (keluarga) dukungen sosial ras iketen emosional si enteguh perbulangen ras ndehara, orang tua ras anak-anak, sapih anak-anak, radu ras kerina seisi jabu. Tentuna enda pe jadi min ku bas kerina dampar geluhta, umpamana i bas lingkungen si ndeherna ras kita (hubungen dareh), lingkungen inganta tading, lingkungen pendahin ras seterusna. Uga kita mbangun iketen enda, erlajar kita arah bahan PA Mamrenta, alu tema: Keluarga Dibata.
II. PELIKASI (URAIAN) TEKS
Arah pemenan surat Epesus enda tangkas man banta maka si nulis surat enda e me Rasul Paulus, ikataken: “Surat enda i bas aku nari, Paulus, si enggo jadi Rasul Kristus Jesus rikutken peraten Dibata, ras alamatna pe tangkas, ikataken: Man anak-anak Dibata i Epesus, kalak si tutus i bas kegeluhenna i bas persadan ras Kristus Jesus (1:1). Tapi adi si perdiateken isina, teridah labo terjeng mereken pengajaren kerna perbeben khusus si jadi i bas perpulungen Epesus. Isina litna perbeben Rasul Paulus, arah ia ngaloken berita i bas perpulungen-perpulungen nari kerna uga kin Berita Si Meriah ni Tuhan Jesus e jadi perdebaten si peturah permusuhen. Permusuhen e jadi erkiteken la sada pengertin ras penggejapen i bas ngalokenca. Penggejapen perpulungen si asalna Jahudi lebih ndeher iakapna bana ras Dibata asa si la Jahudi. Ikatakenna ia selaku bangsa pilihen, kesusuren Abraham ras ndalanken undang-undang Musa si enggo jadi adat/tradisi kegeluhenna. Sikap eksklusif (elitisme: merasa lebih unggul) perpulungen Kristen Jahudi enda encidahken penulaken ras permusuhen man perpulungen si la Jahudi, si peturah aru ate ras perukuren serap-serap.
I bas bahan PA enda, Rasul Paulus nuriken kerna “kemalemen ate ras dame” i bas Tuhan Jesus. Kenca ia ngelayasi sikap eksklusif (elitisme) kalak Jahudi (kalak si ersunat, kemegahen pertubuh arah kesusuren Abraham, ras kalak si ngaloken undang-undang Tuhan) si erbahanca la banci ersada (ermusuhen) ras kalak si labo Jahudi. Rasul Paulus ngataken i bas Kayu Persilang Kristus permusuhen enggo ikernepken, arah dareh Kristus kerina enggo ipersadaken alu serta. Ertina i bas Kristus, kita kerina enggo iperdamekern (Ep.2:15-18). ljenda ia nuriken kerna status si mbaru i bas Kristus, maka si labo Jahudi, gelgel ikataken kalak pertandang (Jun. xenos: kalak asing, sendalanen ras kata “parepidemos: perantau, kentisikngenca tading ije, “paraikos: la warga negara), tapi genduari enggo jadi sada warga ras anak-anak Dibata dingen enggo jadi anggota keluargaNa (Jun. Oikos Theou: keluarga Dibata).
Si ipajekken i babo palas si itamaken rasul-rasul (saksi mata kerna Tuhan Jesus), ras nabi-nabi (i bas Padan Si Mbaru lanai bo lit nabi-nabi, i jenda si imaksudken Rasul Paulus kerna nabi-nabi si enggo nuriken padan Dibata kerna keselamaten i bas Kristus), alu bage tangkas man banta “Palas e me Kristus” alu penegasen “janah Kristus me palas persukina” Nggeluh i bas keluarga Dibata (Oikos Theou), Rasul Paulus nggambarkenca desken sekalak ahli bangunen si erbahan rumah ingan tading si mejile ras paguh. Kristus me sinentuken susunen bahan-bahan bangunen e (Alkitab: rapih tersusun) jadi Rumah Pertoton Si Badia i bas Tuhan. I bas persadanndu ras Kristus, lanai bo lit si erndobahen, anem erbage-bage, enggo isusun mejile jadi sada rumah (oikos), ija Dibata ringan (Jun. katoiketerio tou Theou: tempat kediaman Allah) alu KesahNa. Bage me kerina kalak si enggo tek, lanai erndobahen kalak Jahudi entah la kalak Jahudi, lit kerina baginna (peran ras fungsina) i bas bangunen e. I bas pertumbuhenna ije me teridah ras tergejab Dibata ringan ije, alu KesahNa. Pergeraken gereja erkiteken Kesah Si Badia, i bas iketen keleng ate Kristus (bonding) njadiken doni jadi rumah (oikos) inganta tading ras-ras, si naksiken kegeluhen tading i bas Rumah Tuhan (Oikos Theou: Keluarga Dibata).
III. PENGKENAINA
Litna turah permasalahen i bas perpulungen e me erkiteken lit si nggejapken maka ia lebih asa kalak si deban (sikap eksklusif bdk. Sikap Kristen Jahudi) si erbahan lit kalak si narik diri nggejapken la metunggung (tidak layak) ras surut i bas kegeluhen perpulungen nari. Arah oratenta, si gejapken maka kita la erndobahen i bas Tuhan, pengorbanen Tuhan Jesus i Kayu Persilang ras DarehNa Si Badia enggo nebusi kita ras mpersadaken kita kerina alu serta (Ep.2:8-9). Kita kerina ikut jadi anggota keluarga Dibata (Oikos Theou) labo erkiteken kita metunggung, tapi atan erkiteken perkuah ateNa (sola gracia).
Erkiteken si e erpalasken bahan PA enda, erlajar kita i bas piga-piga hal:
- Kerina kita manusia terbatas, emaka la lit i bas kita sada kebenaren si la terbantahken.
- Kerina kita oratna sadar maka i bas ngidah sada-sada peristiwa, banci arah sudut pandang si berbeda.
- Kita pe erlajar gelah ngasup ersikap netral, maka ise pe banci salah, si penting pastiken i bas kita lit motivasi si mehuli, sehat, guna njagai kiniersadan.
- I bas perjumpanta ras kalak si deban, pastiken mereken keriahen, nambahi semangat kiniersadan. Alu bage i bas kecibal si kugapana pe banci mereken kiniulin.
- Selaku keluarga Dibata, si sadari maka kita lit i bas orat geluh (sistem) maka kerina kita perlu teman.
- Pegegehi penggejapen maka tuhu lit gegeh si terbelinen asa gegehta si banci mpersadaken kita, e me Tuhanta Jesus Kristus, si enggo mpersadaken kerina alu serta.
Arah penggejapen si mbages i bas 6 hal enda, jadi refleksi pribadinta selaku anggota keluarga Dibata, si pajekkenlah iketen nteguh (bonding), teklah adi si bereken dirinta guna kegeluhen si bage, pasti meriah dingen malem ateta. Ula si bere sada wari pe lewat i bas kegeluhenta alu la nggejapken maka i bas kegeluhen pribadinta, jabunta ras perpulungenta desken rumah ingan Dibata tading alu KesahNa.
IV. DISKUSI (SHARING)
- Ikataken i bas persadanta ras Kristus Jesus, kita iranggut jadi sada rumah (oikos), ija Dibata ringan alu KesahNa (ay.22), diskusiken kai nge antusenna ras inatana i bas perpulungenta?
- I bas pengkenai PA enda lit 6 hal jadi refleksi pribadinta, lit nge si la terlakoken kita? Adi lit kai nge alasenna?
V. USULEN ENDE-ENDEN:
- KEE GBKP No. 192:1, 3.
- KEE GBKP No. 210:1, 3.
- KEE GBKP No. 254:1.
- KEE GBKP No. 368:1-3.
- KEE GBKP No. 457:1-3.
Pdt. Obeth Ginting S.Th, MA
(HP/WA: 0813-7669-0510)