(Kesehatan pengerana)
Ogen : Kuan Kuanen 15:30
Tema : Pake babahku o Tuhan.
Tujun : Gelah Saitun:
- I bas pengerana maba kemalemen ate man kalak simegikenca
- Tetap erlajar makeken babahna gelah ngasup ngerana alu mehuli man sekelewetna.
- BENA KATA
Dibata njadiken dua cupingta, dua matanta, dua lubang igungta, dua tanta, dua nahenta tapi ngkai maka sada ngenca babahta?.
Arah ring ring daging kulanta enda banci sitafsirken ulin nge kita megi dua kalí e maka sekali kita ngerana. Dua kali kita ngidah, dua kali nganggeh, dua kali erdahin tanta, dua kali enggo idalani nahenta, e maka cukup sekali kita ngerana.
Ertina buen kita erdahin ras mpegejapkensa asa ngerana. Sibage biasana erbelas alu dem pertimbangen labo asal erbelas. Tapi adi kune buen ngerana asa megi, tah buen ngerana asa ngidah, banci jadi ndabuh kubas pengerana sisalah “erbahan kesimpulen ope ieteh soal”, sibage banci peturah perubaten. Kuan kuan kalak Karo “ukurken lebe maka belasken” tah pe “siksik lebe maka tindes” ertina erbelaslah kita alu bijak, gelah kata-kata si ibelasken kita maba pasu pasu ras kemalemen ate man kalak si megi.
- MPEBAGESI OGEN
Kitab Kuan-kuanen e me sada kitab sibanci jadi pelajaren banta, kuga arusna nggeluh alu payo ras mehuli itengah tengah jelma sienterem.
Kalak si enggo nggeluh alu payo ras mehuli, ija pa pe ia tading, ras ise pe ia jumpa, katawari pe waktuna, lanai perlu lit kesangsin ras kebiaren. Sabap ras ise pe ia jumpa enggo ngasup nampilken bana, sabap enggo pentar ncidahken ayo meciho, bagepe ncibalken dirina, rikut ras mbelasken cakapna.
Ise pe jelmana kune jumpa ras kalak sideban, sipemenana kal lebe inen eme ayo. Adi ayo siang banci turah ukur guna nyambung kubas percakapen. (ay 30a)
Penampilen alu siang ayo, dingen pengerana alu meteruk, bagepe pencibalken dirinta alu mehamat, sibage ija pa pe enggo tampil lanai akap metumbur.
Arah Kitab Kuan kuanen enda iajari dingen ipersingeti Salomo singoge kitab enda gelah ngasup ncidahken ayo siang sebage tanda ngasup ngaloken teman. Ncidahken ayo meciho sebage tanda kerehenna maba berita si meriah, labo maba keguluten tah pe ceda ate. Langa pe erbelas enggo teridah tanda tanda meriah, apai ka enggo erbelas tarmbah ate malem megi berita e.
- PENGKENAINA
Lit nge jelma langa ia ngerana langa ate kalak nembeh erkiteken pengerana la erpepah banci kalak megelut, peturah ate megendek, sierbahanca mela akap kalak, labo kurang erkiteken pengerana peturah perubaten.
Tapi lit ka nge jelma ngerana kenca ia malem ate kalak, meriah ukur kalak simegi megi, megedang ate jelma sienterem. Lit nge pengeranana maba pasu-pasu si erbahanca kalak damai. Apai pe banci terjadi i bas kita ngerana. Memang dilah labo ertulan, kai pe banci belaskenna. Enterem kal kalak erdosa pengelako pengerana. Enterem kal kalak papak pengelako pengerana lepak.
Thema PA nta sendah e me pertoton, gelah Tuhan make babahta ku simehuli, melasken kata tuhu alu tengteng. Gelah kata-kata sindarat i bas babahta nari jadi berita si meriah ras berita si mehuli man kalak si megi-megi. Ertina kai si belasken kita arus maba pasu pasu, si mpeturah ate megedang, si erbanca ate malem. Sikurang-kurangna pengerananta ola erbahanca kalak papak tah peturah perubaten ras keguluten. Adi labanci kita ngerana pedameken perubatkenlah gia ula. Adi labeluh kita ngerana pejoreken nggulutilah gia ola. Babahta e me babah sienggo ngakuken kinitekenta man Tuhan Yesus, berarti e nggo lit Kesah Dibata ngajari kita ngerana mehuli, marilah sipake babahta guna kemulian Tuhan.
- PERTOTON
O Tuhan pakai babahku gelah ngasup erbelas alu nuriken situhu-tuhu. Gelah malem ateku i bas aku erbelas. Bagepe kata si kubelasken gelah jadi pasu-pasu man kalak si megikenca. Amin.
- DISKUSI
- Apai nge katepen i bas kita ngerana: “siukurken lebe maka maka sibelasken” tah “sibelasken lebe siukurken”?
- Kune kita ngerana si pentingna banta muat ukur Tuhan, muat ukur teman tah muat ukurta? Apai simekatepna?
Pdt Diman Ginting /08126350496