Ogen : Job 42:12-15
Tema : Erta Tading Tadingen
Tujun : Gelah Mamre:
- Meteh perbahanen Job selaku orangtua mbagiken erta tading tadingenna
- Ngasup ngusih perbahanen Job bas mereken warisen man anakna.
42:12 TUHAN memberkati Ayub dalam hidupnya yang selanjutnya lebih dari pada dalam hidupnya yang dahulu; ia mendapat empat belas ribu ekor kambing domba, dan enam ribu unta, seribu pasang lembu, dan seribu ekor keledai betina. 42:13 Ia juga mendapat tujuh orang anak laki-laki dan tiga orang anak perempuan; 42:14 dan anak perempuan yang pertama diberinya nama Yemima, yang kedua Kezia dan yang ketiga Kerenhapukh. 42:15 Di seluruh negeri tidak terdapat perempuan yang secantik anak-anak Ayub, dan mereka diberi ayahnya milik pusaka di tengah-tengah saudara-saudaranya laki-laki
KATA PENARUH
Bahan PA nta sendah kerna erta tading tadingen, perlu kal siukuri ras sirenungken alu mbages, sebab mekatep kal terjadi pengelako erta warisen rubat ersenina, lanai siperiahen erturang. Imbasna seh ku kempu pe lanai sitedehen, deba lanai sidahi dahin. Adi ije dengalah orangtua e banci denga ersada siersenina, meriah denga erturang, tapi lanai irumah orangtua minter teridah lanai ersada.
Sierbahanca turah sibage umumna perban erta tading tadingen, lit simerasa kurang adil ibas pembagin. E maka lit nge orangtua ibagikenna enggo senang ibas pembagin, e maka itetapkenna. Tapi gia enggo itetapken, langa iendesken man anak e erkiteken orangtua nggeluh denga dingen memerluken perawaten. Katawari pagi orangtua lanai lit irumah ije me pembagin e ilakoken pengendesenna. Alu cara sie pe labo jaminen kerina banci sikap, sabab labo banci seri kal pembagin, labo ka tertutup kemungkinen sibelinen ilaina. Bagepe kecibal anak singaloken tading tadingen e pe labo ka seri kerina. I bas sie ka me peran orangtua guna njelasken erti rutang si megegeh man si la megegeh. Adil nina kalak ertana man anakna tupung ia nggeluh denga. Kenca kerina sierkiniteken labo berarti belah jering pembagin e.
APLIKASI (URAIAN) TEKS
Job sekalak tokoh ibas Pustaka Si Badia, sirusur ibahan kalak jadi contoh i bas ngalaken kiniseran, gelah megenggeng. Sabab Job enda sekaligus mengalami ujian ras cobaan. Langa lit teridah kegeluhen si bagi Job genggengna ibas ngalaken kiniseran.
Ujian bas Dibata nari, cobaan i bas iblis nari radu reh man Job. E maka telu dampar ia icubai ras iuji. Reh pinakit mekelek, langa malem pinakit enggo ka reh berita kerina asuh asuhen irampas kalak Kaldea ras Seba. Langa ka terukuri sie, reh ka berita tupung anakna sintua erbahan dahin man man, reh angin kalisungsung, runtuh rumah ndai, keri anakna itindihina (Job 2:13-22). Tambah tindih kiniseran sinialami Job. Kiniseran daging kula (pinakit), kiniseran latih rukur (kepaten), kiniseran erkiteken kebenen erta (kemusilen). Tapi arah apai pe Job itindih, ia tetap ngakui Dibata simerekenca Dibata ka muatca, terpujilah la (Job 2:21).
I bas situasi ras kondisi sicukup kacau enda, tetap denga pengeranana mpeturah ate Dibata mekuah. La ia erdosa erkiteken kiniseran si mekelek nendeng geluhna. E maka mekuah ate Dibata, iberekenNa malem penakitna, umurna tambah 140 tahun nari, kebayakenna dua kali lipat bayakna asa si enggona, anak ipupusna pe ibereken Dibata pitu dilaki telu diberu. Ibelang belang daerah e lalit jilen asa anak Job ngenca.
Ngkai maka banci jadi sibage man Job? Erkiteken i bas Dibata lalit kai pe simetahat. Dibata me empuna kerina kebayaken doni enda, kai pe si lit hanya titipen kap ngenca sifatna, hak pakai ngenca bereken Dibata man manusia.
Job si enggo tahan uji i bas kai pe, ibereken Dibata man bana keistimewan sabab enggo ngasup ia erbahanca meriah ukur Tuhan tupung ia ngalaken kiniseranna. Kebayaken Job enda adi iperhitungken i bas paksa genduari biri biri 14.000, unta 6.000, lembuna 2.000, keledaina 1.000, adi i rupiahken enggo seh 250 Milyard, kebayakenna langa ikira taneh ras emasna, rumahna ras sidebanna.
Ngidah erta sibage belinna berpotensi kal anakna ersoal kerna pembagin. Tapi nggeluh denga pe Job enggo ibagikenna ertana man anakna si dilaki ras si diberu, Sabab Job nggejapken kerina si lit Tuhan kap si mada, titipen Tuhan, ulih pemasu masun Dibata. Job erpengarapen gelah anakna metenget i bas makeken erta e, gelah tetap ipakeken jadi pasu pasu ras guna pemuliaken Dibata, sabab kerina rehna i bas Dibata nari.
Adi la metenge arah erta banci saja itunggangi iblis jadi kite-kite si erbanca turah kesombongen, tah terjadi penyalahgunan, sierbanca segat ate Dibata. Job ije enggo ncidahken usihen si mehuli man anakna i bas menyikapi soal erta. Bagepe sekaligus enggo nuanken hal-hal rohani man anakna seh maka anak anakna kerina sibage teremna, enggo ngasup ngaloken baginna sekalak-sekalak alu meriah ukur alu la lit si erpengakap kurang adil. Sabab ibabo kerina erta e lit simeherga sienggo leben iwarisken Job man anakna e me warisen Kata Dibata. Warisen Kata Dibata e me si erbahanca lanai lit peluang guna ersoal, sabab kerina ia nggejapken erturang ras ersenina dingen nggeluh sikeleng kelengen.
Alu palas sikeleng kelengen enggo bias erbahanca kerina pembagin jadi adil. Anak-anak Job enggo ngasup ngalokenca maka erbagi erta warisen labo berarti seri timbangenna, sabap Job enggo leben mewarisken Kata Dibata man anak anakna, e maka turah i bas anak e prinsip rutang si megegeh man si la megegeh, sierbahanca lanai lit soal i bas pembagin warisen.
PENGKENAINA
Mamre arus sedar maka anak e me pemere Dibata si mehergana kal ku tengah-tengah jabu, ergan asangken erta. E maka si man jagan ula kal pengelako erta, anak e ceda. Ola pengelako ngarapken erta tading-tadingen anak enggo ketadingen. Tapi jadiken lah erta e kite-kite erbahanca ia erdeherna ras Dibata, dingen reh belinna kekelengenna ersenina ras erturang.
Warisen si paling penting man anak e me warisen kiniteken, Kata Dibata, si ngubah karakter anak ku si mehuli. Adi enggo siwarisken Kata Dibata man anak, sitik pe tading tadingen la ceda, adi mbue tama tengtengna. Tapi adi la lit kata Dibata nggeluh i bas anak e, kune sitik ngenca sitadingken ban sitikna ia rubat, adi mbelin sitadingken. belinna maka rubat, kuga pa pe la tengteng. Dungna kita pe labo ate anakta e keleng, padahal latih naring siakap ndaramisa gelah lit si man tadingenken. Adi lalit kekelengenna i bas pembagin erta lit rusur iakap kurang adil. Sabab penilaianna bagi perhitungen doni denga.
Anak i bas jabu labo seri kerina biakna, karakterna, kecibalna, tapi kita orangtua arus ncidahken seri ateta kelengna, subuk anak si dilaki ntah anak si diberu, bagi perbahanen Job man anakna si dilaki ras si diberu. Ola erbuni buni mereken kai pe man anak gelah ola si suanken i bas anakta ersegat ate ersenina ras erturang. Ulin nge adi lit anakta susah akapna siarihken ras seninana tah turangna kuga nampatisa, gelah ia ersenina ras erturang terpupuk kekelengenna pekepar.
DISKUSI.
- Turiken pengangkanta erpalasken ogenta uga si mehulina pembagin erta tading tadingen?
- Kuga nge pengidahta kerna Mamre bas ngaloken tading tadingen, enggo nge teridah bedana ras kalak si deban i bas mbagiken tading tadingen? Jabab alu bujur, jenari kai ateta silakoken ku lebe enda.
USULEN ENDE ENDEN:
- KEE GBKP No. 334:1,2
- KEE GBKP No. 249:1
- KEE GBKP No. 35:1.
- KEE GBKP No. 290:1-3.
- KEE GBKP No. 309:1,2,3.
Pdt. Diman Ginting, MA
HP/ WA: 08126350496