(Kesehaten Pusuh)
Ogen : Kuan-kuanen 17: 22
Tema : MERIAHLAH ATENDU KATAWARI PE
Tujun : Gelah Saitun:
- Nggejapken maka keriahen desken tambar nandangi daging kula.
- Ngataken bujuri bas kerina keadan, gelah jumpa keriahen.
- Maba keriahen man anak kempuna I bas situasi si ugapana pe.
17:22 Hati yang gembira adalah obat yang manjur, tetapi semangat yang patah mengeringkan tulang.
- BENA KATA
Lit ende-enden Sekolah minggu
Hati yang gembira, adalah obat, seperti obat hati yang senang
Tapi semangat yang patah keringkan tulang,
Hati yang gembira, Tuhan senang.
Ende-enden enda erpalasken Kitab Kuankuanen 17:22. Ayat enda e me bagin i bas pertenget Raja Salomo. Si jadi penungkunen: “Lit kin bas kegeluhen enda kalak si mpedauh dirina i bas keriahen nari? entah lit kin kalak si ngataken ‘aku la merincuh i bas keriahen, rincuhen aku sisada, ngukuri kegeluhenku si gulut ras serbut. Tentu labo lit kalak sibagenda rupana (adi kin lit perlu jera). Situhuna kerina kalak ndarami keriahen, kai pe ibahanna gelah lit keriahen i bas pusuhna ras kalak si lit isekelewetna (perbulangen entah ndeharana, anak-anak, kempu, teman meriah ras sidebanna). Rumah ipekena-kena ras ipesikap, gelah sikap ngianisa, iban pangan alu mehuli gelah entabeh man pangan. Bage me ilakoken sebage usaha gelah ndatken keriahen.
Bage me bahan PA-nta Minggu enda si ngajari “Ermeriah Ukur Katawari pe” (tema).
- MPEBAGESI OGEN
“Keriahen desken tambar simereken kejuah-juahen, adi ukur serbut erbahanca daging kertang tading tulan” Kuan-kuanen 17:22.
Raja Salomo si terberita kerna kepentaren na ngajarken man bangsa Israel makai bas ngadapi kerina keadan bas kegeluhen arus alu pusuh si bersih ras ketetapen ukur man Dibata. Alu bage, ulihna lalap lit keriahen bas pusuh. Sabab nina Jesus i bas pengajarenNa i das uruk; “Ketuahen kalak si meciho pusuh peratenna, sabab itandaina me tuhu-tuhu Dibata” (Matius 5:8). Arah kata enda teridah maka kalak si meciho (bersih) pusuhna me maka itandaina Dibata, kalak si nandai Dibata, igejabkenna kiniulin Dibata i bas kerina kecibal geluhna. Emaka ngasup ia ngaloken kai pe si jadi i bas
geluhna alu meriah ukur. Tek maka kerina pasti ibentasi pinakit banci madan, perbeben banci ialaken, keguluten banci lit serpang pulah. Alu bage i bas keriahen, talu ukur gulut.
Nina Raja Salomo: “Keriahen desken tambar”, ertina keriahen e banci nambari erbage pinakit, subuk pinakit kula bage pe pinakit pusuh. jadi reh belinna keriahen e, reh sehatna kula entah pe pusuh.
Penungkunen: “kai nge sukat-sukatna adi ikataken meriah ukur?” Jababna: pusuh dem alu ketenangen, la nggit mpermasalahken hal si kitik, ngasup ngalemi salah kalak, la nggit nusahi kalak, rukur mehuli (positip), kejahaten la ibalas alu si jahat, ermeriah ukur ras kalak si meriah, la percian, la erelem-elem ras sidebanna.
Nina tole Raja Salomo: “adi ukur serbut erbahancadaging kertang tading tulan”, artina ukur serbut mpeturah jungut-jungut, rukur la mehuli (negatip), kai pe la teng-teng, latih rukur katawari pe, la lit ketenangen, merawa, bene pengarapen kerna si mehuli. Kerina enda erbahanca kerah tulan, janah daging pe reh kertangna.
Raja Salomo, ngingetken maka mbelin kal ngaruh perukuren nandangi daging kula. Daging kertang ras tulan sikerah nuriken kerna situasi kegeluhen si la mehuli. La lit perkembangen, mesunah penggel tupung reh perbeben (talu i bas perbeben), la ersemangat, la sikap man tatapen apai ka jadi usihen, mesunah putus asa, la ergegeh ras sidebanna
- PENGKENAINA
Keriahen e me perayaken geluh kerina manusia, tapi labo kerina kalak ndatken keriahen e. Sabab labo kerina meteh uga carana ras ija banci ndatkenca.
Rikutken kai siituriken i datas, maka ulu keriahen e me kap Dibata, keriahen e iberekenNa man kalak sinandai IA, janah kengasupen manusia guna nandai IA arah pusuh si meciho (bersih).
Selaku Saitun, perlu kal tetap nggeluh i bas keriahen sabab:
- Keriahen e desken tambar nandangi daging kula. Bagi enggo rusur si gejabken maka melala kal kekurangen ras persoalen i bas geluhta, sierbahanca kita sakit. Arah Kuan-kuanen 17:22, ngajuk kita gelah tetap ermeriah ukur. Gelah tetap banci ermeriah ukur arus nggeluh ersada ras Kristus (Pilipi 4:4).
- Arah keriahen ukur, maka kita ngasup ngataken bujur I bas kerina keadan, sabab i bas kerina keadan. Dibata tetaperdahin guna kiniulin geluhta (Roma 8:28).
- Keriahenta erbahanca kita ngasup maba keriahen man anak ras kempunta. Adi gulut ukurta, labo kita ngasup maba keriahen man kalak sideban.
Emaka, selaku Saitun tetaplah jaga pusuhta, gelah tetap meriah katawari paksa pe, alu tutus ertoto, megi Kata Dibata, ngoge Pustaka Sibadia alu setia. Emaka mari sipergermetken, tentu adi meriah tuhu-tuhu ukurta, maka reh tambahna kesehatenta, sabab e me pedah Dibata.
- PERTOTON
Bujur O Tuhan ku kerna kataNdu si mereken persinget man kami gelah i bas umur kami si gedang enda, banci tetap ermeriah ukur i bas kerina keadan geluh kami seh maka kami ngasup jadi pasu-pasu man kerina kalak terlebih man anak-anak ras kempu. AjariNdu kami tetap nginget maka Kam ngenca Dibata kami singasup mereken man kami keriahen.
Begiken lah toto sembah kami Tuhan, Amin.
- DISKUSI
- Cuba turiken kai saja sibanci erban kam ermeriah ukur.
- Pelajaren kai nge siidatndu arah Kuan-kuanen 17:22, turikenlah!
- Arihkenlah guna erbahan group rende (koor ntah vocal group) guna iendeken i bas kebaktin Minggu entah pe i bas kebaktin sidebanna.
Pdt. Jean P. Br Meliala
Salah bisa di perbaiki, gagal bisa di ulangi, jatuh bisa
bangun kembali, tapi menyerah berarti selesai.
Hidup akan selalu mengalami salah, gagal dan jatuh,
namun jangan sampai menyerah.