Tanggal, 11 Juni – 17 Juni 2023 (Kesehatan Kula)
Ogen : Yohanes 9:1-7
Orang yang buta sejak lahirnya
9:1 Waktu Yesus sedang lewat, Ia melihat seorang yang buta sejak lahirnya. 9:2 Murid-murid-Nya bertanya kepada-Nya: “Rabi, siapakah yang berbuat dosa, orang ini sendiri atau orang tuanya, sehingga ia dilahirkan buta?” 9:3 Jawab Yesus: “Bukan dia dan bukan juga orang tuanya, tetapi karena pekerjaan-pekerjaan Allah harus dinyatakan di dalam dia. 9:4 Kita harus mengerjakan pekerjaan Dia yang mengutus Aku, selama masih siang; akan datang malam, di mana tidak ada seorangpun yang dapat bekerja. 9:5 Selama Aku di dalam dunia, Akulah terang dunia.” 9:6 Setelah Ia mengatakan semuanya itu, Ia meludah ke tanah, dan mengaduk ludahnya itu dengan tanah, lalu mengoleskannya pada mata orang buta tadi 9:7 dan berkata kepadanya: “Pergilah, basuhlah dirimu dalam kolam Siloam.” Siloam artinya: “Yang diutus.” Maka pergilah orang itu, ia membasuh dirinya lalu kembali dengan matanya sudah melek.
Tema : Jesus Erkuasa Nandangi Daging Kula
Tujun : Gelah Saitun
- Ngangkai maka Dibata erkuasa nandangi daging kula manusia
- Erdiate Nandangi Kalak siberkebutuhen khusus
- Nggit nehken pelayanen ku YKPD Apha Omega GBKP
- BENA KATA
Manusia ijadiken Dibata seri ras tempasNa. Janah manusia si ijadiken Dibata e seh kal ulina bali ras kerina tinepa Dibata sidebanna (bandingken Kejadin 1). Kita harus ngergaken kerina tinepa Dibata erkiteken Dibata sijadikennca, si empuna, bagepe si erkuasa nandangi ia. Emaka adi ateta ngidah Kuasa ras kemuliaan Tuhan sialoken ras siergaken kerina si enggo itepaNa ndube. Adi ngenan ateta “Dibata” maka nenlah manusia siseri tempasna ras Dibata. Ngergaken temannta e tandana kita ngergaken Dibata, bagepe sebalikna adi si la siergaken temannta maka Dibata nge la siergaken.
- MPEBAGESI OGEN
I bas tradisi kalak Yahudi lit pengakap maka kai si terjadi i bas sekalak jelma e terkait kubas kegeluhenna, apakah ia erdosa entah lang. Adi sikap kegeluhenna maka i akap kalak ia la erdosa, mehuli bagepe ngena ate Tuhan. Sebalikna adi la sikap geluhna, mis sakit, susah, gagal usahana maka i akap kalak ia erban dosa, erban sila mehuli ras la ndalanken kai siiperentahken Dibata. Sada dampar memang lit nge hubungen antara kai siilakoken kita ras kai ka akibatna, misalna adi la kita patuh man Tuhan maka kita ndatken hukumen entah pe kiniseran i bas geluh enda. Tapi labo kerina kai si terjadi i bas geluhta erkiteken pelin-pelin perbahanenta maka si e terjadi, misalna Bencana alam erupsi gunung sinabun. Bencana alam erupsi sinabun terjadi labo erkiteken salah dosanta tapi erkiteken bage kin siklus kegeluhen bas alam enda enggo iaturken Dibata. Arah e ate Tuhan ncidahken kuasaNa maka IA sinjadiken doni enda emaka IA e me si ngaturkenca. Janah arah eme teridah keleng ateNa nandangi kita.
Jesus pe ningetken kerna Kuasa ras perbahanen Tuhan teridah arah kai si jadi I bas kegeluhen manusia. Emaka tupung lit kalak nungkun man Jesus kerna lit sekalak si pentang maka ia banci bage ise nge si salah maka banci ia jadi pentang. I bas situasi sibangenda manusia cenderung ndarami ise sisalah gelah banci ipersalahken kerna keadaan enda. Bahkan sikap sibagenda cenderung jadi menghakimi. Seharusna I bas situasi bagenda si perlu ikembangken eme uga kita banci ngergaken kalak sipentang e alu ngkelengisa; uga maka banci ia ermeriah ukur ndalani kegeluhenna ras kai sibanci ilakokenna maka ia banci mehuli. Jesus alu tegas ngataken maka adi kalak ndai pentang e labo erkiteken dosana entahpe dosa orang tuanna. Arah kegeluhen kalak sipentang enda ate Tuhan ncidahken kuasaNa. Tuhan banci makeken KuasaNa arah kerina sinasa lit aminna banci jadi manusia tangtangna la ngasup ngukurisa ras ngelokenca tapi kedungenna ije iakukenna maka Tuhan tuhu-tuhu erkuasa. Cara Tuhan ncidahken kuasaNa la banci iatur manusia sebab Ia Dibata. Adi manusia banci ngaturken kai si ilakoken Tuhan man manusia maka Dibata e la erkuasa. Kuasa Tuhan la kap ersibar sedang kuasa manusia ersibar. Manusia perlu waktu guna ngangkai Kuasa Dibata sebab terbatas kal pengukuri ras kengasupen manusia. Sibanci petangkas kerina kuasa Dibata ipakekenNa guna ncidahken kuasaNa, emaka sura-sura Tuhan gelah arah kerina kecibal kegeluhennta siidahikenlah kai si sentudu ra sura-sura Tuhan.
- PENGKENAINA
Sikataken bujur man Tuhan sebab gerejanta ipakeken Tuhan guna ncidahken kuasaNa arah pelayanennta nandangi unit pelayanen YKPD (Yayasan Kesejahteraan Penyandang Disabilatas) Alpa Omega. Anak-anaknta sitading ijenda eme anak-anaknta si istimewa bali ras kita kerina eme seri tempasta ras Dibata. Awalna nai tupung lenga sitandai tuhu-tuhu anak-anaknta enda lit denga pandangen negative i bas kita tapi genduari si e la nai lit erkiteken kita enggo ngergaken ia bali kita ngergaken dirinta sendri. Anak-anakta enda ikataken berkebutuhen khusus erkiteken guna mengembangken kengasupenna perlu penampat i bas kita nari. Penampat si iperlukenken anak-anakta e bahan lah ia jadi temanndu ras ergaken ia i bas mengembangken kengasupenna.
Arah anak-anakta enda me ate Tuhan ncidahken kuasaNa si la bagi biasa si iantusi kita manusia kidekah enda. Anak-anakta enda pe ipake Tuhan guna mpermuliaken la. Perlu perubahen i bas kita si la pernah ngataken bujur, la pernah merasa puas ras rusur nuntut padahal enggo melala kal pemere Dibata siisehkenNa ku kita. Emaka perlu kita ngergaken kai sienggo lit i bas kita maka eme pemere Dibata simehulina janah arah e teridah kuasaNa gelah IA ipermuliaken.
- PERTOTON
O Tuhan adi kidekah enda kami lenga ngasup ngidah kerna kuasaNdu erkiteken bagi ate kami min sijadi, alemilah kami. AjariNdu kami gelah ngasup ngidah Kam arah keberadaan teman-teman kami i bas saling ngergaken ras sikeleng-kelengen. Pasu-pasundu Gerejandu GBKP jadi alat encidahken kuasaNdu gelah anak-anak kami siberkebutuhen khusus banci mengembangken potensi si lit i bas ia .Amin.
- METODE: DISKSUSI RAS AKSI
- Uga caranta ngergaken daging kulanta arah e teridah kuasa Tuhan?
- Engkai maka lit denga kalak si lenga ngasup ngaloken keberadaan anak si tubuh berkebutuhen khusus?
- Ban aksi guna encidahken maka kita ngaloken ras mendukung anak-anakta silayani i YKPD Alpa Omega gelah anak-anakta si tading ije banci mengembangken potensina.
Pdt. Relpelita Ginting -GBKP Budi Lulur