Ogen : Masmur 112:1-3
Mazmur 112:1-3
Bahagia orang benar112:1 Haleluya! Berbahagialah orang yang takut akan TUHAN, yang sangat suka kepada segala perintah-Nya.
112:2 Anak cucunya akan perkasa di bumi; angkatan orang benar akan diberkati.
112:3 Harta dan kekayaan ada dalam rumahnya, kebajikannya tetap untuk selamanya.Turi-turin kejadin si nasa lit
112:1 Mula-mulana ijadiken Dibata langit ras doni.
112:2 Doni lume denga, la lit tempasna. Lawit si mbelang ergalumbang itutupi gelap mesangat, janah kesah Dibata kelaling-kelaling i babo lau engkuasaisa.
112:3 Nina Dibata, “Jadi lah terang” – e maka jadi me terang.
Jabu Si Ermeriah Ukur
Tujun : Gelah Mamre:
- Meteh maka kemalemen ate ras keriahen ukur teridah seh ku sinursur arah erkemalangen man Dibata
- Gelah kerina isi jabu ngelumbaken nggeluh erkemalangen man Dibata
Metode : Diskusi
I. KATA PENARUH
Harganas (Hari Keluarga Nasional) i bentuk i bas tanggal 29 Juni 1993 si tujunna e me “sebagai perwujudan pentingnya arti keluarga terhadap upaya memperkuat ketahanan nasional. Sebagai institusi terkecil dalam masyarakat keluarga menjadi pondasi penting awal pembangunan karakter bangsa”. Negaranta ngidah maka perlu kel keluarga jadi sada “ingan” guna mewarisi semangat perjuangan bangsanta janah pembangunen karakter si mehuli guna kesejahteraan bangsa ras negaranta. Emaka tiap tanggal 29 Juni i peringeti me sebagai hari keluarga nasional (HARGANAS), janah i bas tahun enda enggo 30 tahun hari keluarga nasional enda. Amin gia keluarga (selanjutna ipake kata: jabu) “unit” terkecil i bas masyarakat, tapi peranna guna kiniulin bangsa, negara, bagepe gereja seh kel mbelinna.
II. PELIKASI (Uraian) Teks
Kitab Masmur si jadi bahan PA-nta wari enda semalna i bas Bahasa Ibrani ipake kata “tehilim” si berarti ende-enden pujin. Secara umum, kitab Masmur enda itulisken guna nuriken pengalamen nggeluh Pemasmur erkiteken igejapkenna kuasa Dibata si mbelin i bas kegeluhenna, terlebih teridah kel emosional (perasaan) Pemasmur i bas nuri-nuri kerna perbeben geluhna, puji-pujinna man Dibata, janah kuga ia tek man Dibata. Emaka kitab Masmur enda biasana rusur ipake i bas kebaktin-kebaktin i bas ende-enden ras nuriken kata Dibata.
Adi si nehen kubas perikopta wari enda, penulisen kitab Masmur 112 enda ipake model sebab-akibat. Ertina Pemasmur nuriken pengajaren lit hubungen timbal balik si terjadi antara sada ras sidebanna. Ayat 1 igelari “sebab’, janah ayat seterusna eme”akibat/dampak” dari ayat sipemena nari.
Ayat 1 nuriken kemalemen ate kalak bujur eme erkemalangen man Tuhan ras meriah ukur ngikutken perentahna. I bas ayat e teridah maka kemalemen ate labo soal materi entah pe tersehi kerina sura-sura. Sebab iangkai Pemasmur nge maka kerina isi doni enda eme sikerajangen Dibata janah kiniteken Pemasmur mabai ia guna erkemalangen man Dibata. Malem kel ate kalak bujur si malang man Dibata janah ngikutken perentahNa. Pemasmur mabai kita gelah natap kempak Dibata janah la ernalem man isi doni enda. Siidah janah si gejap nge adi erkemalangen kita man isi doni enda tuhu-tuhu erkekurangen kita rusur. Kurang mejile siakap banta si tukur kosmetik tapi ngutang pe labo dalih. Kurang mehaga siakap banta situkur mobil kredit pe labo dalih. Kurang entabeh perpanta sipangani me pangan si la sehat, kurang jore siakap uang masukta korupsi me silakoken, adi lang suap menyuap man atasan. Melala denga contoh-contoh erkekurangen sierbahanca ndele ateta i bas doni enda. Si pepayo ku Dibata lah kita natap, tentu erbahan geluhta sikap.
I bas ayat 1 pe ituriken Pemasmur maka erkemalangen man Tuhan ngumputi ras ermeriah ukur i bas ngikutken perentah Tuhan. Pemasmur enggo ngejapken maka meriah ukur i bas ndalanken perentah Dibata e seh kel perluna. Ngikutken perentah Dibata labo pekulah-kulah entah pe jadi sada ritual entah pe kewajiben, tapi harus i bas pusuh si ermeriah ukur nari. Rehna kiniriahen ukur e erkiteken enggo tergejap man Pemasmur maka pentingen akapna perentah Dibata asangken pengajuk doni, janah enggo tergejap man bana maka perentah Tuhan e erkuasa man bana. Kiniriahen ukur Pemasmur enda me jadi palasta i bas PA wari enda. Subuk kata Dibata bagepe isi jabunta ula min jadi beban man banta. Asa ngasup, asa gegeh, asa ukur lit si kelengi Dibata alu meriah ukur.
Ayat 2 ras 3 eme dampak entah pe ulih i bas erkemalangen man Dibata ras ngikutken perentah-perentahNa. I bas ayat 2, ulihna eme man kesusuren. I bas tradisi Israel, jabaten bagepe hak ras kewajiben I tengah-tengah masyarakat itentuken i bas “silsilah” kesusuren nari. Contohna siidah i bas Pustaka maka Jesus ikataken kesusuren Daud encidahken jabaten si ialokenNa jadi kesusuren raja si maba dame ras keselamaten. Pentingna nilai-nilai kesusuren enda me si ituriken Pemasmur maka kesusuren kalak si malang man Dibata ipasu-pasu Dibata, subuk jasmani bagepe rohanina.
I bas ayat 3 Pemasmur nuriken maka kalak si malang man Dibata isi jabuna bayak namura, janah kebujurenna lit rasa lalap. Pemasmur enggo ngaloken ulih i bas ia malang man Dibata. Perayaken doni enda kerna kinibayaken ras kebujuren erbahansa enterem jelma i bas doni enda sirang ras Dibata. Tapi justru erdeherna ras Dibata nge maka sialoken kerina si iayaki kalak i bas doni enda. Tentuna seri kal bagi situriken Jesus i bas Matius 6:33, “tapi si pentingna kal, daramilah lebe kinirajanNa, janah dalankenlah si ngena ateNa, maka icukupiNa kai si perlu man banndu”. Enda me si nambahi kiniriahen ukurta maka labo sisa-sia kita ngikutken ras ndalanken kata Dibata, sebab sialoken me ulih si mehulina kel i bas Dibata nari.
III. PENGKENAINA
I bas perjumpanta paksa enda igelari HARGANAS (Hari Keluarga NasIonal) ija kerina kita kategorial Mamre, Moria, Permata, Saitun, ras KAKR banci menghayati pentingna peran keluarga i tengah-tengah bangsa ras negaranta, terlebih i bas Dibata. Adi sinehen mulihi Pustaka Si Badia, perpadanen ras keleng ate Dibata tetap icidahkenna melalui keluarga/jabu. Pemena i bas jabu Adam ras Hawa, emaka ilanjutken ku Jabu Nuah, perpadanen Dibata i lanjutken ku jabu Abraham, iterusken ku jabu Jakup (jadi sada bangsa si igelari Israel), janah i bas Padan Si Mbaru seh me ku jabu Jusuf ras Maria janah arah jabu enda me reh Jesus Kristus, janah arah Jesus Kristus kita iperdameken ras Dibata jadi sada “keluarga kerajaan Allah”. Pustaka Si Badianta mempersaksiken maka padan Dibata erdahin arah jabu-jabu kalak si tek man baNa. i bas paksa gundari perlu kal siergaken kerina anak jabunta. Janah labo terjeng seh ije saja, tapi pe i bas persadanta i bas Tuhan melalui gerejanta. harta yang paling berharga adalah keluarga!
Doni enda mereken pilihen-pilihen si mesera man kalak si erkiniteken. Antara memilih kesuksesan entah kesetiaan man Dibata. kesuksesan doni menuntut waktu ras pikiren gelah fokus man bana, janah megati mengorbanken kesetiaanta man Dibata ras kesetiaanta man isi jabunta. Erdahin, kujuma, kukantor, erbinaga entah kai pe dahinta ndarat rumah nari tentuna erbahansa latih ras ngalah kula ras pikirenta, janah mulih ku rumah pe tunduh ateta. Seh rumah mungkin melala tuntuten. Anak sekolah si gutul, entah lampu dapur si ceda, langa ka bene asuh-asuhenta, ras sidebanna. Menyita waktu ras pikiren kel kerina. Katawari nari lit waktunta guna ercakap-cakap ras anak i tengah-tengah jabu? Katawari nari perbulangen ras ndehara ngerana-ngerana kerna keperlun perbeliten isi jabu? katawari nari waktunta ras ras isi jabunta si bereken man Tuhan?
Adi enggo bage melalana waktu si menyita fokusta, subuk selaku nande, bapa, entah pe anak, tentuna kiniriahen ukur e lanai nari lit i bas jabunta. Kebersamaan i bas jabu pe enggo jadi beban entah pe rutinitas saja dibandingken ras saling mengisi ras engkelengi antara sada ras sidebanna i bas jabu. landingken bagi sinuan-sinuan, kiniriahen ukur ras kekelengen i bas jabu pe perlu i pupuk ras ipelihara alu mehuli. Sebab kekelengen ras kiniriahen ukur itengah jabu labo banci turah-turah bage saja. Si pekena komunikasi man isI jabunta.
Nilai-nilai sipentingna kal i bas Dibata e me karakter ras kesetiaan, si hampir seri ras tuntuten i bas jabu. Karakter si meteruk ukur ras kesetiaan man Dibata jadi poin penting si perlu si lumbaken i bas PA wari enda. Karakter ras kesetiaan harus leben si lumbaken asangken kinijagon entah pe kesuksesan i bas doni enda. Bage me sura-sura man isi jabu gelah kerina tetap erkemalangan man Dibata. Nini ras bulang, Bapa, nande, anak, tetap ersada arih erkemalangan man Dibata. Kalak Kristen memang perlu sukses ras jadi kalak si erkemenangen i doni enda, tapi adi la berkarakter ras la setia tentuna bene me kerinana. Siidah tokoh-tokoh hebat i bas Pustaka entah pe i bas si gundari enda, enterem memang sukses i bas kegeluhenna, tapi karakterna la mehuli, entah pe la setia man anak jabuna janah cerai. Sienda kerina nuduhken maka perlu kal kita karakter si mehuli ras setia man Dibata.
IV. DISKUSI
- Kai-kai saja nge sedekah enda perayakenta maka langa kal meriah ukurta guna malang man Dibata ras ngiikutken perentahNa?
- Kai-kai saja nge sedekah enda sierbahansa kita la ngergaken ras engkelengi isi jabunta? Sada persada kita mari situriken!
- Tulisken ras turiken kata-kata motivasi man keluarganta gelah tetap erkemalangan man Dibata (banci tulis i kertas, entah pe i media sosial, FB, IG, Youtube, DLL)
V. USULEN ENDE ENDEN:
- KEE GBKP No. 75:1,2
- KEE GBKP No. 124: 2,3
- KEE GBKP No. 372:1
- KEE GBKP No. 471: 1
- KEE GBKP No. 309:1,2
Pdt. Bangun Firdaus Sembiring, S.Th
HP/Wa: 081338106748