Teks : Markus 16:20
16:20 Merekapun pergilah memberitakan Injil ke segala penjuru, dan Tuhan turut bekerja dan meneguhkan firman itu dengan tanda-tanda yang menyertainya.
Tema : Er Berita Si Meriah
Tujun : Gelah Mamre:
- Meteh perentah Jesus man ajar-ajarNa (kalak si tek)
- Meteh tanggungjababna i bas er Berita Si Meriah
- KATA PENARUH
Kerina manusia pasti merincuh guna ngaloken berita si meriah. Sebab berita si meriah eme berita si mereken kemalemen ate. Amin pe kerina manusia merincuh guna ngaloken berita si meriah, tapi labo kerina manusia ngasup guna jadi perberita si meriah. Arah PA Mamre sekali enda Mamre ibabai guna jadi perberita si meriah. Tentuna segelahna Mamre ngasup jadi perberita si meriah sipetangkas arah bahan PA Mamre erpalasken Markus 16: 20
- PELIKAS (URAIAN) TEKS
Markus 16: 20 enda eme rangkumen terakhir kitab Markus si erkaiten ras kekeken Jesus bagepe awal si mbaru kerna pelayanen ajar-ajar Jesus. Ayat terakhir enda eme sada bagin situriken kerna uga respon ajar-ajar Jesus nandangi perentah sibereken Jesus man ajar-ajarNa dingen uga pengkawali Dibata ibas respon ajar-ajarNa e. Jesus empegegehi ajar-ajarNa segelahna ajar-ajarNa meteh maka dirina enggo ipilih Dibata guna jadi “perberita berita si meriah”. Dingen meteh tanggungjawabna si harus ilakokenna selaku perberita si meriah.
Sope Jesus nangkih ku surga iberekenNa me perentah nandangi ajar-ajarNa guna meritaken berita si meriah. Berita Si Meriah eme sada konsep kiniteken kalak Kristen. Ibas bahasa Junani berita si meriah eme euangelion si ertina berita si meriah. Berita si meriah e ibaba Jesus dingen iberitakenNa man manusia, tapi situhuna berita si meriah e lit bas diri Jesus. Sebab Jesus reh ku doni guna mberitaken berita si meriah nandangi manusia si erdosa,
Berita si meriah sinimaksudken Jesus eme berita kerna Jesus eme Juruselamat si payo, si mereken kegeluhen si rasa lalap nandangi Manusia. Berita si meriah e enggo ialoken ajar-ajar Jesus, jenari ajar-ajarNa ertanggungjawab guna pembarken berita si meriah e kempak jelma si deban, si lenga ngaloken Jesus jadi Juruselamatna. Kalak si ngaloken Berita si meriah meteh maka keselamaten si enggo ialokenna e arah kegeluhen, pengajaren, kematen bagepe kekeken Jesus.
Ayat 20 enda alu tangkas nuriken uga respon ajar-ajar Jesus nandangi berita si meriah si enggo ialokenna ibas Jesus nari. Si jadi respon ajar-ajar e, eme “lawes janah erberita ku japa pe”. Enda encidahken sada respon si mehuli. Ajar-ajar Jesus encidahken ketutusenna dingen keriahen ukurna ibas ia enggo ngaloken berita si meriah e, la terjeng dirina saja ngenca iukurkenna, tapi ia pe ngukurken kalak si deban. Segelahna la terjeng ajar-ajar Jesus ngenca tek man Jesus dingen ngaloken keselamaten tapi kalak si deban pe tek nandangi Jesus dingen ngaloken berita si meriah e.
Ibas ajar-ajar e meritaken berita si meriah, “Tuhan nampati ibas dahinna, janah Tuhan pe rikut erdahin ras ajar-ajarna“. Enda encidahken maka ibas ndahiken dahin guna mberitaken berita si meriah, situhuna Tuhan nge si erdahin janah ajar-ajar Tuhan ipakena guna jadi alatNa. Ibas mbuena tantangan ibas mberitaken berita si meriah e, ipengasup Tuhan ajar-ajarNa guna mberitaken berita si meriah.
Bagepe “ibahan Tuhan maka i japa pe ajar-ajarNa mberitaken berita si ibas Dibata nari i je pe jadi tanda kuasa ras tanda sengget”. Enda jadi sada bukti maka Tuhan erkuasa dingen la ipermalukenNa ajar-ajarNa. Arah tanda sengget sibahan ajar-ajar Jesus mahanca erbuena kalak si tek nandangi Jesus dingen ngaloken Jesus selaku JuruselamatNa.
- PENGKENAINA
Berita si meriah enggo seh man Mamre. Tentuna arah sehna berita simeriah e maba Mamre guna ngaloken Jesus selaku Tuhan ras Juruselamatna dingen mabai Mamre guna ngaloken perentah Dibata guna jadi perberita si meriah. Jadi perberita si meriah memang labo dahin si melukah. Amin bage gia, labo e si jadi alasen Mamre guna la jadi perberita meriah. Justru Mamre selaku imam i tengah jabu harus ngasup jadi perberita si merah nandangi isi jabu. Mamre erjuang erbahan tim er PI sibenaken ibas jabu nari. Arah jabu nari berkat me Mamre jadi perberita si meriah seh ku tampuk doni.
Selaku Mamre i tengah-tengah gereja pe radu ras kerina Mamre erjuang mereken diri guna jadi perberita s meriah rikut arah perbahanen si mehuli. Dingen nggit mereken diri guna ngelai Tuhan sebagai bentuk kiniersadan Mamre guna er Pl, bahanlah team paduan suara bagepe vocal group Mamre bagepe tim song leader ibas Mamre nari. Sebab arah ende-enden pe Mamre banci jadi perberita si meriah. Dingen Mamre pe ersada arih guna erban kunjungen Pi ku runggun si perlu pegegehi
- DISKUSI
- Erpalasken Markus 16: 20, uga ngenda respon Mamre kerna perentah Dibata guna jadi perberita si meriah?
- Turiken kai-kai saja si ngambati Mamre guna jadi perberita si meriah dingen kai solusi si banci ibahan Mamre guna menanggulangisa!
- USULEN ENDE-ENDEN:
- KEE GBKP No. 3721-2
- KEE GBKP No. 399 1-2
- KEE GBKP No 257:1-3
- KEE GBKP No. 34S:1-2
- KEE GBKP No. 295:1-3
Pdt. Berandes Ginting, S.Th, M.Psi
(HP/WA: 0812 6905 4130)