Tanggal 04 Juni – 10 Juni 2023 (Gereja ras Oikumene)
Ogen : Johanes 17: 21 -23
Tema : Ersada Min ia Kerina
Tujun : Gelah Saitun:
- Meteh ras mpebagesi erti pertoton sapaa sapaat Jesus (ayat 21).
- Jadi pelopor Gerakan Oikumene Saitun (Lanjut Usia) antar Gereja secara Oikumene, umpamana erbahan rencana aksi “Doa ras PA” bersama.
17:21 supaya mereka semua menjadi satu, sama seperti Engkau, ya Bapa, di dalam Aku dan Aku di dalam Engkau, agar mereka juga di dalam Kita, supaya dunia percaya, bahwa Engkaulah yang telah mengutus Aku. 17:22 Dan Aku telah memberikan kepada mereka kemuliaan, yang Engkau berikan kepada-Ku, supaya mereka menjadi satu, sama seperti Kita adalah satu: 17:23 Aku di dalam mereka dan Engkau di dalam Aku supaya mereka sempurna menjadi satu, agar dunia tahu, bahwa Engkau yang telah mengutus Aku dan bahwa Engkau mengasihi mereka, sama seperti Engkau mengasihi Aku.
- BENA KATA
Perpecahen ras peperangen erbanca manusia menderita la saja rugi secara perbeliten, tapi kesah manusia pe terancam simaba ku kematen. Perpecahen biasana terjadi erkiteken ngukuri kepentingen na sendiri si turah i bas perukuren manusia erkiteken erbage-bage kepentingen sierbanca lanai siangkan sada ras sidebanna seh maka doni reh rontangna.
Kiniersadan siniarapken manusia tetap min ijaga alu mehuli, sabab nina kuan-kuan “Ersada kita paguh, adi sirang la ergegeh”. Emaka i bas kegeluhen enda persadan ras kiniersadan e me sada gegeh lako bangun masa depan si lebih mehuli. Kerina kiniulin e harus itempuh arah kiniersadan. Umpamana bagi purih sada ngenca metahat nggunakenca kecuali jadi perligas sierbahanca mesui. Tapi adi ipesada simelala e banci igunaken napui sierbahanca lingkungen bersih maba kiniulın ras keriahen man manusia.
Doni enda itepa Dibata guna ingan manusia nggeluh ras erdahin si asilna encidahken kiniulin, la saja guna kegeluhen manusia, tapi pe man kerina tinepa Dibata si debanna, Lau, Daraten, Udara, ruang angkasa rsd, arus terpelihara alu mehuli. Kiniulin doni banci terpelihara adi manusia patuh man perentah Dibata i bas ia ngiani doni enda. Ertina ia nggeluh ras erdahin maba kiniulin kalak sienterem sue sura-sura Dibata, la guna pribadi saja, tapi man kerina tinepaNa. I bas si e, tentu perlu kiniersadan/ persadaan i bas kelompok manusia i bas nehken sura-sura Dibata.
- MPEBAGESI OGEN
Kerna pentingna kiniersadan enda banci melala kita erlajar i bas Pustaka si Badia, umpamana Rasul Paulus arah suratna man perpulungen Korinti, maka ipujikenna perpulungen e arah kiniersadanna guna ikut muat bagin i bas nampati perpulungen i Jerusalem si sangana ngenanami erbage-bage kesuliten si mberat. Emaka arah enda kuga perpulungen Makedoni ersada ia mpepulung penampat e guna i peseh man teman-teman sada kiniteken i Yerusalem. Ternyata i bas kiniersadan e labo erkiteken bayakna tapi erkiteken tanggung jabap kinikteken, sebab arah kai sini ibahanna e labo merugiken bana tapi man kalak ernanam. Hal enda ngajuk kerina kita warga GBKP, ikut ertanggung jabap guna erbahan si mehuli arah kita ikut muat bagin lako nampati, janah kiniersadan e mbangun kalak si deban arah kai si lit i bas kita. Perpulungen Makedoni tuhu-tuhu kepati nandangi kiniseran perpulungen, emaka arah kekurangenna pe ikut ia nampati (2 Kor 8).
Yohanes 17:21-23, Yesus ertoto syafaat, emaka arah pertoton-Na man Bapa i Surga ibenakenNa alu notoken diriNa sendiri, maka lanai ndekahsa IA iendesken me man penguasa doni enda, sebab lanai terelakken pengorbanen-Na i kayu persilang. Emaka i bas pertoton- Na nina: “O Bapa genduari nggo seh paksana, Pemuliakenlah AnakNdu gelah AnakNdu pe mpermuliaken Kam” (Yoh 17:1-5). Kenca bage maka iterusken-Na doa syafaat-Na guna notoken ajar-ajarNa gelah ersadalah ia sebagai sekerajangen Dibata, gelah banci nerusken karya keselamatan doni enda. Gelah murid-murid nggejapken maka ia enggo iajari lebih telu tahun guna meritaken Berita Si Meriah (ay 6-19). Emaka Yesus nerusken doa syafaat-Na guna kerina manusia si enggo tek man baNa gelah ersada min kerina i bas ndalanken tugas tanggung jawab guna meritakan Berita si Meriah (ay. 20-26). Emaka Kesah Si Badia mereken gegeh man GerejaNa gelah tetap njaga kiniersadan i bas mbangun kiniteken. (oge Ay 21).
Gereja-gereja selaku kula ni Kristus patut njaga kiniersadan, ula nggeluh erbana-bana. Gereja-gereja i Indonesia enda ipersada arah litna kiniersadan si ibenaken Tahun 1950, ija gereja-gereja membentuk sada persadan sini igelari PGI (Persekutuan Gereja-Gereja di Indonesia). PGI selaku persadaan gereja-gereja sitermasuk kubas Gerakan Oikumene situjunna mbangun kemandirian i bas erti persadan, kesaksin ras pelayanen. Geraken oikumene ngajuk gereja-gereja segelah radu ras ngukurken kekristenen i ja ia tading jadi sira ras terang i bas nehken kesaksinna. Pertoton safaat Yesus ikut mpengaruhi geraken oikumene i belang-belang doni enda. Geraken kemandirian bidang teologi, daya ras dana e me salah sada tujun geraken oikumene. Saling mengakui ras saling menerima, pengakuan iman Bersama rsd. Arah persadaan enda pe mereken sada gegeh guna ikut muat bagin membangun gereja ras bangsa. Emaka enggo melala hal-hal simehuli sinilakoken Gereja-Gereja Indonesia enda. Bage pe i bas Pilipi 2:2b ikataken, ersadalah min arihndu, sikeleng-kelengen min kam, ersada min geluhndu dingen ersada ukurndu. Si enda banci terlaksana adina kita nggeluh i bas erkiniteken man Tuhan Yesus.
- PENGKENAINA
Jesus i bas pertoton safaatNa, mindo man Dibata gelah ersada min Manusia kerina bagi Kristus ersada ras Bapa si i Surga. Perluna kiniersadan manusia jadi penting sabab e isi pertoton safaat Yesus Kristus. Banci ikataken mbangun kiniersadan e wajib ilakoken manusia si encidahken gambaren persadan Kristus ras Bapa i Surga.
Persadan Saitun pe ulih pertoton syafaat Jesus nge, perlu tetap ersada i bas encidahken dirina erguna man sienterem, ula sebalikna merasa lanai erguna. Perpulungen Saitun ibahan selaku wadah persadan ngawan perpulunegn sienggo berumur tertentu, tapi semangatna arus tetap nguda. Persadan siidalani enda arus erbuah rikut kengasupen arah talenta silit i bas sa sekalak-sekalak. Keriahen siigejabken ras sipeturah alu ras-ras mahan bana peturah “hormon endorphin” (hormone kegembiraan=meriah ukur) jadi tambar i bas daging kulanta banci mpepalem mbue pinakit bas geluh Saitun. Ertina adi meriah iakap, mahan bana lanai inget pinakit, mesui nahe, tiwen rsd. Semangat keriahen e erbahanca bene pinakit e. Emaka rajinlah i bas ngikuti kegiaten Saitun.
Emaka kita sebagai warga GBKP mperdiateken kubas kai si ni itotoken Yesus arah Yohanes 17:21, ras arus sisedari maka kita enda sada aron guna ndalanken Misi Gereja I Indonesia enda. Kiniersadan sini itotoken Yesus labo kesatuan organisasi tapi kesatuan rohani pengikut-pengikutNa, si berdasarken kegeluhen i bas Ia (ay 23), sebab si nandai la eme kalak si enggo nggejabken kekelengen-Na si luar biasa. Emaka setiap kalak si enggo ngaloken la jadi Juruselamat harus taat nandangi Kata Dibata, ras bage pe mabai kalak gelah banci tetap setia/ tek nandangi Kata Dibata.
- PERTOTON
O Tuhan enterem dengan manusia nggeluh erbana-bana si la encidahken persadan. I bas sie mindo penampat kami man Tuhan segelah reh ersadanalah ukur ras pusuh manusia siencidahken kiniersadan guna kiniulin, Pedauh i bas kami nari ukur si la sentudu ras peraten Dibata. Jadikenlah persadan Saitun enda jadi persadan si maba kiniulin man doni enda arah erbage-bage talenta si lit I bas kami. I bas gelar Tuhan Yesus kami ertoto. Amin.
- DISKUSI
- Engkai maka Tuhan Yesus ertoto guna kiniersadan ajar-ajar/manusia sitek? Turiken
- Persadan si kuga kin siiarapken Jesus sibanci sikembangken i bas persadan Saitun GBKP? Bahanlah contohna
Kai sumbangen saitun i bas geraken oikumene? Ban Contohna
Pdt. Erick J. Barus
I bas dalin medalit murahkal celus
Adi sempat celus tuhu-tuhu meusi
Adi enggo si cubaken ngikutken Jesus
Ula nai kal sempat nulih ku pudi