ERTOTO RAS ERDAHIN GUNASI ENTEREM
Jeremia 29:4-7
(Konfesi GBKP BAB V: Masyarakat)
- PERSIKAPEN
- Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
- Nikapken ingan persembahen.
- Nungkun ras nuratken topik pertoton sapaat.
- Kune i bas sektor entah jabu kepkepen, perdalanen PJJ ibabai Pertua, Diaken, Pengurus PJJ, bage pe sekalak si enggo iaturken idur pengurus PJJ. Adi kune PJJ ilakoken i bas teptep jabu ngawan perpulungen, maka perdalanen PJJ ibabai bapa, nande, bage pe anak.
- Sope benaken PJJ, banci kita rende alu make ende-enden pop rohani.
- Janah kerina perdalanen PJJ enda banci iubah (imodifikasi) rikutken perluna.
- Erdandanken perpulungen jabu-jabu e me ingan sharing grup/wadah kesaksin e maka mehuli leben pandita, pertua, diaken, entah emeritus nuriken Kata Dibata.
- PERPULUNGEN JABU-JABU/ PERPULUNGEN JABU
- Rende: KEE No. 424:1 (ibabai anak)
I puji kami Kam Dibata si mbelin
Alu ende-enden si meriah
Suari ras berngi kawali kami min
Segelah la celus bas percuban
Reff: Sangap kap kalak si ‘rnalem ba Ndu e
Daten tuah ras kesen angen pe
Sangap kap kalak si rnalem baNdu e
Daten tuah ras senangna pe
- ERTOTO (ibabai Bapa)
- RENUNGEN
Teks: Jeremia 29: 4-7 (babai Nande)
Tema: Ertoto ras Erdahin Guna Si Enterem
Jeremia 29 enda e me pedah Tuhan arah Nabi Jeremia man bangsa Israel. Itulisken sekitar tahun 597 SM, banci jadi sada ntah pe dua tahun kenca bangsa Israel iambengken ku Babel. Tuhan nehken pedah kuga arusna kegeluhen bangsa Israel i taneh buangen. Nggeluh i taneh buangen (negeri kalak asing) e labo menukah apai ka jadi tabanen/buangen. Hak-hakna lebe labo seri ras kalak singiani kuta e, bage pe perbahanen kalak si mada kuta e man bangsa buangen, tergejab seh kal suina (bdk. Jer. 9:17-22). I bas kiniseran si mesangat e, kata Tuhan seh man bangsa Israel gelah ngasup ia nggeluh i taneh pembuangen bagi ia tading i kutana jine.
Perentah si isehken Tuhan e me kap:
- Pajekken rumah ras tadinglah ije Arah perentah enda teridah maka labo kentisik bangsa e iambengken ku Babel. E maka ingan cicio (perlindungan) arus ipajekken. Janah kata rumah nuriken sada pengertin ingan kiniersadan ras pe simbol “identitas” jabu. Pajekna rumah e erbahanca turah ukur ras semangat lako ngertiken situasi si jadi. Umpamana: mabai manusia guna banci ngaloken situasi si jadi banci reh belinna. Janah usaha guna ndalani kegeluhen pe reh belinna. Bage pe i bas kinata kegeluhen ermasyarakat, adi ipajekken rumah ras tading ije, encidahken maka enggo lit “keabsahan” kita e me kap “anggota” negeri e. Rumah jadi sentral kerina aktivitas kegeluhen jabu ras pe pengakun sekelewet nandangi jabu.
- Suani peken jenari pan ulinna; erdahinlah guna kiniulin kuta ku ja kam Kuambengken. Ertotolah guna keperlun kuta e, sabap adi sikap ia kam pe ikut sikap Hakekat manusia selaku mahluk si erdahin, enda la ibatasi ija ia itading ras kuga kondisina. Tapi ibereken kengasupen man manusia guna erdahin ija pa pe. Gelahna arah dahin e pengakun masyarakat nandangi sekalak jelma per eh belinna. Sabap i idah alu mata jine, maka sekalak jelma e lit tanggungjababna nggeluh. Radu ras si e pe, maka erdahin guna ncukupi keperlun nggeluh, la ergantung man kalak si deban. Si penting isingetken Tuhan maka tujun erdahin e me kap guna kiniulin kuta e. Adi sigejapken maka tupung kita tading i bas negeri asing, arus ka nge sicidahken kelebihenta, tandana maka biakta e erguna man kalak si deban. Janah si belinna, la terjeng tenaga, pikiren sibereken i bas kita nggeluhken geluhta, tapi kinitekenta man Tuhanta pe tetap si cikep arah pertotonta. Totonta la terjeng kegeluhenta, tapi pe guna kuta inganta tading. Sabap adi sikap kuta e kita pe malem ateta. Bagi sinialami Jusup ras Daniel, si banci jadi “influencer” i negeri kalak si deban. Teridah ije etos kerja kalak si erkemalangen man Tuhan.
- Erjabu, mupus, lit anak, pejabu ka anak tubuh ka kempu janah nggeluh la kekurangen (kegeluhen si erkelanjuten, ersinursur)
Perentah Tuhan man bangsa Israel e me encidahken maka lit nge kegeluhen si terus erkelanjuten aminna gia tading i negeri kalak asing, e me kerna sinursur. E maka erjabulah, mupuslah ras anak pe ipejabu ka, maka ia pe mupus ka. Jadi lit tetap sinursur i bas kegeluhen. Alu bage la ngadi kegeluhen bangsa Israel. Janah si inget nge uga bangsa Israel seh 70 tahun iambengken ku Babel. Banci si idah lit generasi si tubuh i taneh pembuangen. Amin bage gia, orat geluh tetap nge idalanken. Si e kerina tetap jadi keriahen anem gia lit ukur ertedeh ate mulih ku kuta pengulihen.
Konfesi GBKP kerna Masyarakat i bas BAB V, encidahken kuga peran serta perpulungen guna mbangun kesejahteran masyarakat. Si lang-langna teptep jabu banci ndalanken kai si enggo iperentahken Tuhan man bana. Sabap masyarakat e me jabu-jabu teptep jelma. Tupung jabu-jabu e ndalanken kerina tanggungjababna, mabai bana kegeluhen masyarakat pe dem alu kemalemen ate. Selamat berkarsa, berkarya i tengah-tengah kuta ija kita tading: jadilah kita sira ras terang i tengah-tengah masyarakat.
- Nuriken Penggejapen:
- Bapa
- Nande
- Anak-anak
- DISKUSI:
- Kai nge si banci silakoken guna ngubah kiniseran jadi peluang rikutken kata Dibata sinialoken kita sendah?
- Uga caranta berkontribusi nandangi kuta inganta tading? Kai kesuliten sinialami kita terlebih i tengah kegeluhen bangsa si majemuk?
- Persembahanen: RENDE KEE No 450:1-2 (ibabai anak)
Endesken kami man baNdu, sada bagin pemereNdu
Persembahen kami baNdu, gelah ialoken Ndu
Reff: Pasu-pasu Ndu min gelah, si tading i bas kami
AjariNdu dage kami, m’re persembahen baNdu
Si pepulung persembahen, si endesken e man Tuhan
Asa gegeh kengasupen, mari si persembahken Reff: …
- PERTOTON PERSEMBAHEN, SAPAAT, PERTOTON TUHAN
- Notoken kuta inganta tading rikut ras pemerentahen
- Si turah i bas jabu/ perpulungen
- MOM0
- JEDA RAS PENUTUP
Pdt. Irama Purba, S.Th., M.S.
HP/WA: 08126066694b