Bahan PJJ 11-17 Juni 2023

June 12, 2023 Writer-1 PJJ Sektor, Sektor Betlehem, Sektor Filipi, Sektor Galilea, Sektor Hermon, Sektor Kana, Sektor Korinti, Sektor Roma, Sektor Yerusalem 0

KERINA TUTUS RAS-RAS ERTOTO

Perbahanen Rasul-Rasul 1: 12 -14

1:12 Maka kembalilah rasul-rasul itu ke Yerusalem dari bukit yang disebut Bukit Zaitun, yang hanya seperjalanan Sabat jauhnya dari Yerusalem. 1:13 Setelah mereka tiba di kota, naiklah mereka ke ruang atas, tempat mereka menumpang. Mereka itu ialah Petrus dan Yohanes, Yakobus dan Andreas, Filipus dan Tomas, Bartolomeus dan Matius, Yakobus bin Alfeus, dan Simon orang Zelot dan Yudas bin Yakobus. 1:14 Mereka semua bertekun dengan sehati dalam doa bersama-sama, dengan beberapa perempuan serta Maria, ibu Yesus, dan dengan saudara-saudara Yesus.

  1. PERSIKAPEN
  • Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
  • Nikapken ingan persembahen.
  • Nungkun ras nuratken topik pertoton sapaat.
  • Kune i bas sektor entah jabu kepkepen, perdalanen PJJ ibabai Pertua, Diaken, Pengurus PJJ, bage pe sekalak si enggo iaturken idur pengurus PJJ. Adi kune PJJ ilakoken i bas teptep jabu ngawan perpulungen, maka perdalanen PJJ ibabai bapa, nande, bage pe anak.
  • Sope benaken PJJ, banci kita rende alu make ende-enden pop rohani.
  • Janah kerina perdalanen PJJ enda banci iubah (imodifikasi) rikutken perluna.
  • Erdandanken perpulungen jabu-jabu e me ingan sharing grup/wadah kesaksin e maka mehuli leben pandita, pertua, diaken, entah emeritus nuriken Kata Dibata.
  1. PERPULUNGEN JABU-JABU/ PERPULUNGEN JABU
  1. Rende KEE No 270: 1, 3 (Ibabai Nande/si Mada Jabu)

Ermengkah ras ertoto, em keg’luhen si payo
Bas Kristus k’riahenta, meriah ukurta
Reff: I bas senang ntah susah, kecibal geluhta
Pujilah Tuhan kataken bujur, alu bulat ukur

Bapa/Nande : Kai kin erti geluhta, ‘di la muji Dibata
Anak : Kita enggo itebus, alu dareh Kristus
Kerina (Reff) : I bas senang ntah susah…

  1. ERTOTO: lbabai Bapa/Nande (si mada Jabu)
  1. RENUNGGEN

Teks : Perbahanen Rasul-Rasul 1: 12 – 14 (logeken Anak)

Tema : Kerina Tutus Ras-Ras Ertoto

Kenca 40 wari perayan Paskah, Jesus iangkat ku Surga i datas uruk Seton, dauhna 1,5 km arah Timur kota Jerusalem nari. Sue bagi si enggo ipadanken Jesus man ajar-ajarNa maka ialokenna gegeh Kesah Si Badia kenca la iangkat ku Surga (ay. 8). E maka mulih ajar-ajar i uruk Seton nari ku Jerusalem lako nimai si ipadanken Jesus e. Kenca seh i Jerusalem, lawes ajar-ajar ku rumah inganna kesilang. Pulung ia ras-ras ertoto i bas loteng rumah e. Si pulung e me kap diberu (la isingetken gelarna) ras Maria nande Jesus, senina-senina Jesus e me Jakup, Joses, Judas ras Simon (bdk. Mrk. 6:3).

Kinitutusen Jesus ertoto man Dibata sope la iangkat ku Surga jadi sada usihen man ajar-ajarNa gelahna tutus etoto ras-ras. Kerina si pulung tek maka asum ia tutus ras-ras ertoto, tetap ia ersada ras Jesus, bagi Jesus pe tetap ersada ras Dibata Bapa arah iketen hubungen diriNa (secara pribadi/personal). Arah ketutusen Jesus ertoto man Dibata (bdk. Mat. 14:23; 26:36, 39, 42, 44), jadi palas kesaksin kiniteken ajar-ajar gelahna ia kerina pe ras-ras ertoto alu tutus. Biak nggeluh ertoto ras-ras jadi sada usihen si icidahken ajar-ajar arah orat geluh Jesus si rusur ertoto. lajuk dingen ipersingeti Jesus pe gelah ajar-ajarNa tutus ertoto (Mat. 26:41; Mrk. 14:38; Luk. 22:40 46), Arah kinitutusen ertoto ras-ras mpeturah sada penggejapen ras kesaksin maka ajar-ajar e pe tetap nge ersada ras Kristus aminna pe Jesus enggo ringan i Surga ras Dibata Bapa.

I bas GBP GBKP, iajuk ngawan perpulungen gelah kerina tutus ras-ras ertoto. Palas kinitutusen ertoto e me naksiken kinitutusen ajar-ajar ras-ras pulung lako ertoto. Bagi si isaksiken ajar-ajar e, maka Jesus pe ertoto man Dibata Bapa alu tutus. I bas ertoto e, labo inehen kinibeluhen sekalak ntahpe sekelompok jelma si ertoto. Sabap labo kinibeluhen ertoto si pentingna. Tapi, kinitutusen ras kiniersadan i bas ertoto. Kerina jelma arusna min ras-ras alu tutus i bas ertoto dingen njadiken ertoto e jadi orat geluh (gaya/model hidup) kalak si tek man Dibata. Bage pe i bas jabu, subuk bapa, nande ras anak-anak teridah min kinitutusen ras kiniersadan ertoto e i bas ia. Bage pe kinitutusen ras kiniersadan ertoto man Tuhan. Si bagidi megati ka nge si idah isekelewetta, umpamana: lit sekalak si maba pertoton, tapi si ikut ertoto paksa si e langa alu tutus ertoto. Lit deba enggo tertunduh pe. Lit ka deba sanga ertoto e dahinna ngoge-ngoge handphone. Lit ka deba ipindokenna gelah ia itotoken tapi si mindo itotoken e pe la teridah kinitutusenna ertoto man Tuhan. E maka i bas GBP Gerejanta iperluken sada tim (Tim Doa) si banci mabai ras jadi “motivator” man perpulungen gelahna tutus ertoto i bas geluhna.

  1. NURIKEN PENGANGKAN / PENGGEJAPEN :
  1. Bapa
  2. Nande
  3. Anak
  1. DISKUSI:
  • Kai nge si njemba ajar-ajar ras si pulung e tutus ras-ras ertoto?
  • Bahanlah Tim Doa i bas Runggun ras PJJ sektorta masing-masing.
  1. RENDE KEE No. 332:1- 2 ras NEHKEN PERSEMBAHEN (ibabai anak)

Totonta begiken Na, keleng ateNa kita
Ertoto isuruhNa, em si ngena ateNa
Mbelin kal kuasaNa, ras perkuah ateNa
Si pindo si erguna, lah terpuji gelarNa

  1. PERTOTON SAPAAT
  • Jabu ingan pulung sendah, kecibal isi jabu bapa, nande, anak, usaha pencarin ras gegeh kesehaten (ibabai Nande)
  • Kerina si pulung rikut ras kecibal isi jabu gelah tutus ras-ras ertoto (lbabai Bapa)
  • Jabu ingan pulung PJJ minggu si reh, berita-berita i bas perpulungen, pangan ras inemen bage pe persembahen (lbabai Pt/Dk)
  1. RENDE : KEE No 280 :2 (ibabai bapa/nande)

Man Tuhan pindo, k’rina si perlukenndu
Sehken arah toto, labo perlu kam aru
Lah tetap ukur, arapen la erkusur
Kekelengen Tuhan, tetap labo luntur
Kekelengen Tuhan, tetap labo luntur PERTOTON TUHAN

  1. MOMO

  1. JEDA RAS PENUTUP

Pdt. Merry Tatuwo, M.Th.
HP/WA: 0821 6679 5962

Post Views: 3,005