(Gereja ras Oikumene)
Ogen : I Korinti 12: 12-13
Tema : Melala Ringring tapi Sada Kula
Tujun : Gelah Saitun:
- Meteh kai erti “melala ring-ring sada kula”.
- Nggit muat bagin i bas dahin pelayanen (Sektor, Runggun, Klasis ras Sinodal)
Banyak anggota, tetapi satu tubuh
12:12 Karena sama seperti tubuh itu satu dan anggota-anggotanya banyak, dan segala anggota itu, sekalipun banyak, merupakan satu tubuh, demikian pula Kristus. 12:13 Sebab dalam satu Roh kita semua, baik orang Yahudi, maupun orang Yunani, baik budak, maupun orang merdeka, telah dibaptis menjadi satu tubuh dan kita semua diberi minum dari satu Roh.
- BENA KATA
Minggu si lewat enggo kita erlajar kerna Oikoumene, eme kerina gereja-gereja ibabo doni enda ipersada i bas sada rumah, eme rumah Dibata. Arah gerakan Oikoumene enda, kerina anggota ngawan perpulungen GBKP iajuk guna membangun kerjasama simehuli ras kerina anggota Gereja si deban. Mbera enggo sipraktekken bas inganta sekalak-sekalak.
Wari enda, Kata Dibata si man oratenta eme kerna “melala ring-ring tapi sada kula”.
- MPEBAGESI OGEN
I bas I Korinti 12: 1-11 ituriken maka i bas perpulungen e melala pemere Kesah man perpulungen, tapi sada nge Kesah e. Janah melala dahin si man dahin perpulungen tapi sada nge Dibata si mada dahin e. Jadi reh buena dahin Dibata siidahiken perpulungen rikutken pemere Kesah si lit, e nuduhken maka erdahin kap Kesah si Badia e i bas perpulungen.
Bas ogenta ndai, ijelasken tole maka kalak si erdahin erpalasken pemere Kesah e, erdahin ia rikutken fungsina bagi si enggo iaturken Dibata, eme fungsi ring-ring. Persadan perpulungen iandingken Paulus alu istilah “Melala ring-ring, sada kula”. Deba kita erdahin alu fungsi ring-ring: mata, tan, nahe, cuping rsd. Kerina ring-ring e saling membutuhkan labo siganjang teruken. La banci erdalan sisada, umpamana mata lawes ku kemuhen, nahe ku kawes. Kerina iaturken i bas sada kula, janah pusat pengendali ras pengaturen eme Takalta. Jadi adi ikataken “kula” berarti e “persadan melala ring-ring” janah masing-masing ring-ring seri ergana, seri jilena, seri kualitasna. Adi sada tah dua ring-ring ngenca lenga banci ikataken e sebagai kula.
- PENGKENAINA
I bas tahun enda, focus pelayanen GBKP eme anggota perpulungen jadi pelaku aktif bas pelayanen gereja ras masyarakat. Sedalanen ras si e, Saitun selaku ring-ring ni Kristus e, banci ikut muat bagin sue ras fungsi ring-ring si lit bas kita. Mungkin banci kita berperan sebagai ring-ring babah tah cuping, alu tugas notoken, ngajarken anak kempu, temanta Saitun ras nggit ka pe megiken kalak si deban si nuri-nuri man banta. Adi megegeh denga kita, fungsi nahe pe banci sidalanken, eme ndahi teman-temanta si paksana kote kinitekenna, mberat baban geluhna.
Adi bas PJJ berperan kita bas mabai doa syafaat. Banci ka kita berfungsi jadi “tan sinampati” anak KAKR, PERMATA subuk i bas mpegegehi kinitekenna bagepe i bas mendukung dana pelayanenna. Gereja GBKP mbuka kesempaten ras peluang e man kerina Saitun rikutken kondisi bas runggunta masing-masing. Emaka ula mehangke kita Saitun, si dahi Runggun Gerejanta, sungkun ia, kai sibanci isampati Saitun. Alu bage perlu lah lebe siukuri, sitandai, fungsi ring-ring kai si ateta sidalanken.
- PERTOTON
Bujur man baNdu Tuhan, sebab kami enggo iberekendu kengasupen guna ndahiken dahin kami rikutken pemerendu si mbelin. Amin pe talenta kami berbeda-beda, tapi sada kap kami bas Kam Tuhan. PegegehiNdu min persadan kami Saitun enda. I bas gelar Yesus Kristus. Amin.
- DISKUSI
- Diskusikenlah mulihi penegertin “melala ring-ring tapi sada kula”. Kai ulihna adi kerina ring-ring e aktif bas ndungi sada dahin? Kai ka ulihna adi “mata ras nahe” ngenca si aktif, si deban pasif”.
- Arihkenndu ras anggota Saitun, dahin pelayanen kai bas Runggunta sibanci ije Saitun muat bagin? Jenari usulkenndu man Runggun gereja erkelangken Serayan Seksi Saitun, guna ibabana ku Sidang Majelis Runggun.
Pdt. Rosmalia Br Barus
Enda meganjang batang tualah
Naktak buahna i Tigabinanga
Kinitekenta ula bagi nggala si gurlah
Kentisik ngenca ncidahken bana