(HUT Saitun si pe- 8ken)
Ogen : Mazmur 71:17-18
Tema : Aku Nggo Metua dingen Ubanen.
Tujun : Gelah Saitun:
- Tetap nginget pengkawali Dibata nai-nai nari seh paksa enda.
- Ngasup ngaloken umur singgedang dingen ubanen bage pe ngaloken perubahen daging kula.
71:17 Ya Allah, Engkau telah mengajar aku sejak kecilku, dan sampai sekarang aku memberitakan perbuatan-Mu yang ajaib; 71:18 juga sampai masa tuaku dan putih rambutku, ya Allah, janganlah meninggalkan aku, supaya aku memberitakan kuasa-Mu kepada angkatan ini, keperkasaan-Mu kepada semua orang yang akan datang.
Metode PA : Diskusi
- BENA KATA
Tambah warina umur manusia reh tuana. Kinituan e teridah rikut ras perubahen kula: buk nggo ubanen, kulit ringut, gegeh mulai urak seh makana melala keterbatasen i bas dahin-dahinna. Keadan enda erbahanca lit ka deba aru atena, lit deba mbiar ngidah perubahen sijadi erkiteken kinituanna. Emaka lit ka deba operasi plastik seh ku luar negeri alu biaya si meherga guna mpekena kulitna si nggo mulai ringut, icet buk si nggo mulai ubanen si tujunna kerina gelah tetap idah mejile ras nguda denga lalap.
Lit ka kalak si nggo metua aru atena erkiteken kelungunen. Anak-anak nggo ndauh kerina, bicara lit pe tading ras ia, igejapkenna maka tempa lanai bo ia iperdiateken ntah lanai erguna akapna bana. Perukuren sibage pe turah bas Daud, emaka isehkenna pertotonna man TUHAN selaku ia sekalak si nggo metua, si nggo melala keterbatasenna alu pengarapen TUHAN tetap jadi sekawalna, sinemani ia amin pe nggo metua.
- MPEBAGESI OGEN
Masmur 71 enda ibere judul besar Pertoton Kalak Si Nggo Metua. Adi si oge ayat 1-24, tangkas man banta uga Daud nuri-nuri man TUHAN kerna kearun atena selaku kalak singgo metua, si nggo urak gegehna alu pengarapen ula min ibuangken ntah ilupaken TUHAN ia. Daud nggo nandai Dibata, emaka erpengarapen ia nandangi pengkawali Dibata.
I bas ayat 17 teridah arah kesaksin Daud kerna ketedehen atena guna nuriken perbahanen Dibata. Enda rusur ilakokenna mulai tupung Daud nguda denga. Situhuna tupung nguda denga pe Daud, teridah maka ngena Dibata ia, sebab ia kalak si tutus emaka ipilih Dibata ia jadi raja. Tupung nabi Samuel reh ndahi Isai (bapa Daud) ilegi me Daud si paksa e sangana ermakan sebab Daud me si metunggungna iakap Dibata guna jadi raja asangken senina-seninana. Janah adi adi iperdiateken i bas Kitab Masmur. teridah maka Daud rusur ertoto, sanga ermakan ipujina Tuhan alu kulcapi. Alu kata sideban, kitik-kitikna nari seh enggo pe metua, itandai Daud Dibata alu payo, sierbahanca ia tetap rembak ras Dibata.
Ayat 18, teridah uga bagesna pengarapen Daud man Dibata, emaka nina “ola kal tadingken aku”. Arah kata enda teridah uga belinna pengarapen Daud nandangi penemani Dibata i bas geluhna guna mpengasup ia nuriken kerna kuasa ras kinimbisan Dibata man kerina kesusurenna. Adi iperdiateken pemindon Daud enda, tangkas teridah maka pemindonna eme guna mpermuliaken Tuhan labo guna
dirina. Ertina, amin gia Daud nggejapken kelemahenna erdandanken enggo metua tapi i bas keadan si bage pe nggedang denga pengarapenna guna nuriken kerna Dibata.
- PENGKENAINA
“Hidup ini adalah kesempatan, hidup ini untuk melayani Tuhan, Jangan sia-siakan apa yang Tuhan b’ri, Hidup ini harus jadi berkat. O, Tuhan pakailah hidupku, selagi aku masih kuat, Bila saatnya nanti ku tak berdaya lagi, Hidup ini sudah jadi berkat” Arah lagu enda kita iajuk guna njemba dirita (motivasi dirinta)gelah makeken kesempaten si lit denga ras jadi pasu-pasu.
I bas tahun enda Saitun enggo genep umurna 8 tahun jadi sada Lembaga Kategorial i tengeh-tengeh Gereja GBKP. I bas mperingeti ulang tahun si pe 8 ken enda Saitun iajuk:
- Gelah tetap nginget kerna pengkawali Dibata i bas gedang-gedang geluh seh bagi umur si enggo lit genduari, labo nginget-nginget kekurangen si lit i bas daging kula (pinakit, anak-anak siiakap kurang erdiate, perduiten, anak-kempu si langa erjabu, melungun ras sidebanna).
- Ermeriah ukur ras ngataken bujur i bas kerina keadan si lit genduari. aminna kula lanai megegeh, enggo kurang jilena, pemegi ras pengidah enggo kurang asa si enggona. Alokenlah alu meriah ukur.
- Tetap erpengendes ras erkiniteken man Dibata, bagi pengarapen Daud, si tetap mindo pengkawali ras penemani Dibata, alu bage ngasup makeken kerina kecibal geluhta subuk kurang entah lebih guna naksiken kerna Dibata man isi jabu seh ku kempu ras ente.
- PERTOTON
O Tuhan Dibata sampati kel kami gelah ngasup kami tetap ngataken bujur man baNdu, ras makeken kai si lit i bas kami guna naksiken kerna kuasa ras keleng ateNdu nangdangi isi jabu ku ras kalak si lit isekelewetku. I bas Jesus Kristus kami ertoto. Amin
- DISKUSI
- “Aku enggo metua dingen ubanen”, ninta melaskenca. Kai nge kira-kira si lit i bas ukurta tupung melasken kata enda?
- I bas mperingeti wari Ulang tahun si pe 8 ken enda, kai nge si banci silakoken guna nampati senina-turangta si tading i PPOS Sukamakmur? Diskusiken, emaka lakokenlah!
Pdt. Frida Debora Br Purba