CIREM DINGEN SIANGLAH AYONDU KATAWARI PE
Pengerana 9:4-10
(Keluarga)
9:4 Tetapi siapa yang termasuk orang hidup mempunyai harapan, karena anjing yang hidup lebih baik dari pada singa yang mati. 9:5 Karena orang-orang yang hidup tahu bahwa mereka akan mati, tetapi orang yang mati tak tahu apa-apa, tak ada upah lagi bagi mereka, bahkan kenangan kepada mereka sudah lenyap. 9:6 Baik kasih mereka, maupun kebencian dan kecemburuan mereka sudah lama hilang, dan untuk selama-lamanya tak ada lagi bahagian mereka dalam segala sesuatu yang terjadi di bawah matahari. 9:7 Mari, makanlah rotimu dengan sukaria, dan minumlah anggurmu dengan hati yang senang, karena Allah sudah lama berkenan akan perbuatanmu. 9:8 Biarlah selalu putih pakaianmu dan jangan tidak ada minyak di atas kepalamu. 9:9 Nikmatilah hidup dengan isteri yang kaukasihi seumur hidupmu yang sia-sia, yang dikaruniakan TUHAN kepadamu di bawah matahari, karena itulah bahagianmu dalam hidup dan dalam usaha yang engkau lakukan dengan jerih payah di bawah matahari. 9:10 Segala sesuatu yang dijumpai tanganmu untuk dikerjakan, kerjakanlah itu sekuat tenaga, karena tak ada pekerjaan, pertimbangan, pengetahuan dan hikmat dalam dunia orang mati, ke mana engkau akan pergi.
A. PERSIKAPEN
1) Pengurus PJJ ngaturken perdalanen PJJ subuk kune ilakoken i bas sektor,jabu kepkepenntah i bas jabu ngawan perpulungen
2) Ngaturken perdalanen PJJ subuk si mabaisa/singelaisa, adi i bas sektor ntah i jabu kepkepen perdalanen PJJ i babai Pt/Dk/Pengurus sektor/sekalak si enggo iaturken pengurus PJJ.
3) Adi ilakoken irumah iaturken Bapa/Nande/Anak
4) Ngaturken kelengkapen ingan persembahen ras ngaturken si mabai pertoton sapaat
5) Perdalinen PJJ rikutken kecibalna banci i ubah (imodifikasi)
6) Sope benaken PJJ banci i lebei alu rende lagu-lagu KAKR
B. PERPULUNGEN JABU-JABU/ PERPULUNGEN JABU
- Rende KEE No. 368:1-2 “Sipuji Tuhan Dibatanta” (Si mada jabu)
https://www.youtube.com/watch?v=WNjTX1zdFb4
Si puji Tuhan Dibatanta, kataken bujur baNa
Sabab Ia si merekenca, pasu-pasu man banta
Reff : Mbelin ras mulia, kekelengan Tuhan ku bas doni enda
Ajari O Tuhan kami k’rina anakNdu,
Naksiken kerina perbahanenNdu
Geluh kami meriah tuhu, k’rina si k’rajangenNdu
Sabab kalak si nembah baNdu, datken pasu-pasuNdu.Reff.. - Ertoto (Orang tua ntah pe sekalak anak)
- Ngoge Kata Dibata : Pengerana 9:4-10 (Anak ntah kempu)
- Renungen
Tema : Cirem Dingen Sianglah Ayondu Katawari Pe
Sia-sia geluh enda! Kesia-sian i babo kesia-siaan, bagi si nukati cimber ntah nama lau kempak ember cires. Labo mbera reh masinna lau lawit bicara si tama pe melala sira ku bassa.
Adi bage, kai nge ertina kita nggeluh? Bage me nina Pengerana ntah Pengkhotbah i bas kitabna si gendek. Pengerana (ahli filsafat) enda, nuratken pengajarenna si petembil kal ras teologi si ‘umum’na lit i bas Pustaka si Badia. Enda banci jadi erkiteken kitab Pengerana isuratken kenca kalak Israel enggo jumpa ras cara rukur ntah filsafat Gerika (Junani). Salah sadana igelari “Sinisme”, e me cara rukur si natap kegeluhen ras kerina kejadin arah sudut pandang negatif.
Labo lit si pasti bas kegeluhen seakatan kematen, kesempaten guna ngenanami si ntabeh ras si sikap i bas kegeluhenenda ngenca. Tole nina, “La kin ulin biang nggeluh asangken singa matemate?” E maka: Manken dingen meriahlah atendu…Cirem dingen sianglah ayondu katawari pe. I bas cakap asli teks ayat 8 enda si ikuti piga-piga terjemahen nina: Pakelah paken mbentar ras minaki bukndu. Pengerana ngajarken maka kegeluhen e me sada pesta meriah, labo bagi peradaten nurun-nurun ntah kematen. Tambah si e nina, “Pesenangkenlah dirindu ras ndehara kekelengenndu!” Ertina, kesenangen ras keriahen e ula nanami sekalak, tapi ras anak jabu (keluarga). I bas doni kematen pagi lanai bo lit si e kerina, e maka tupung lit denga waktu nanamilah kai akapndu ntabeh. Amin bage gia arus kita megermet nandangi pengajaren enda, gelah la kita celus kempak cara nggeluh “Hedonistis”, e me filsafat kalak si la ngukuri wari pepagi, si terjeng ndarami keriahen ras senang la diatena cara si ipakena payo ntah lahang.
Pengerana ngajari gelah banci kita ngenanami kiniulin ngalaken kinisuin. La iajarkenna jelma jadi sekalak pertapa, si melala pantangenna. Nggeluh labo terjeng ertoto ras kebaktin, sabab erdahin, erjabu ras kerina dampar geluh si deban pe sada bagin cara muji Dibata nge. Melala kal bas doni enda si banci erbahan kita senang. Dibata jine pe ngaturken geluhta jadi sada kegeluhen si banci ngenanami kesenangen (ay. 7-10). Labo ate Dibata kita lalap bas ndele ate. E maka, gia jumpa kita si gulut ula mis berjut ras jutjut. Ulih encari ula terjeng ipunjut janah man pangan ntabeh pe si akap rugi. Layasi ukur mehuli iatur, segelah tupung mambur iluh rumat geluh la runtuh. Bayak labo terayak, tapi geluh senang e sada pilihen. Lit kalak si erduit tapi lalap ngataken: sulit. Lit kalak musil tapi melumbar ras la perdegil. Ija duduk perkarana maka banci si dua kalak e beda carana ndalani kegeluhen? Kunci kegeluhen si ermalem ate kepeken i bas cara rukur. “Muas teruh sampuren” bage me kecibal geluh Doktor Faust, tokoh drama karangen sastrawan Jerman: J.W von Goethe. Faust la pernah puas nandangi geluhna. Lalap akapna lit si kurangna, e maka ibahanna perjanjin ras Setan. Faust ndatken kerina kesenangen ras keriahen si lit i doni enda tapi tendina jadi si kerajangen Setan. Bayak namura tuhu ia tapi pusuhna la lit bas dame. Tupung ia erkadiola kepe nggo melawensa. E maka daramilah keriahen, ayakilah kesenangen! Riahken ras anak jabu alu ngataken bujur man Dibata!
Pulut tanggerken lau pola si inem
Pola suanken i Kandibata
Gulut pe ukur erlajarlah cirem
Ola lupaken lit nge Dibata
- Nuriken Penggejapen (Bapa, Nande ras sekalak anak)
- Irakut Pdt/Pt/Dk/Em
- Diskusi
1) Kai akapndu si menarik (unik) arah pengajaren si lit i bas Kitab Pengerana enda?
2) Cara rukur si kuga nge ndia si megati erbahan kita lanai ngasup ermeriah ukur makeken pemere Dibata? - Rende KEE No. 280:1-2 “Keg’luhen doni Tuhan Si Ngaturkenca”
(Persembahen)
https://www.youtube.com/watch?v=JoRPpOJMPNo
Keg’luhen doni, Tuhan si ngaturkenca
Labo tersipati, IA si mada kuasa
Tah kai pe jadi, leben enggo itehNa
La lit si terbuni i lebe-lebeNa, la lit si terbuni i lebe-lebeNa
Man Tuhan pindo, k’rina si perlukenndu
Sehken arah toto, labo perlu kam aru
‘Lah tetap ukur, arapen la erkusur
Kekelengen Tuhan, tetap labo luntur,
Kekelengen Tuhan tetap labo luntur - Pertoton Persembahen ras Sapaat
1) Persembahen
2) Si mada jabu sendah ras Pekan Kebaktin Keluarga
3) Bangsa ras Negeri bage pe gereja
4) Si turah i bas perpulungen - Rende KEE No. 199:1,3 “Senang gundari geluhku”
https://www.youtube.com/watch?v=6sjjHqRqVVs
Senang gundari geluhku, ban Tuhan negu langkahku
Ku ja pa pe perdalanku, tetap tanNa gelemenku
Reff : Tuhan nemani geluhku, cikepNa tanku meteguh
Dibata pengendesenku, i bas tanNa aku ‘nggeluh
Pengajuk erta doni e, ngerintak aku lah bene
Tapina megenggeng aku, la sambar kinitekenku. Reff… - Pertoton Tuhan
- Momo
C. JEDA RAS PENUTUP
Pdt. Albert Purba, M.Th.
HP/WA : 0813 6113 9496