(Minggu 14 Kenca Trinitatis)
Ogen : Jakub 5:13-18
Tema : Kuasa Pertoton
Tujun : Gelah Saitun
- Reh tutusna nggejapken kuasa pertoton sireh ibas kiniteken sipaguh
- Tek alu bulat ukur maka Tuhan Yesus ngasup mpepalem kerina pinakit ras perbebenna emaka mpengasup ia pe ngelai temanna si sangana ngenanami perbeben.
5:13 Kalau ada seorang di antara kamu yang menderita, baiklah ia berdoa! Kalau ada seorang yang bergembira baiklah ia menyanyi! 5:14 Kalau ada seorang di antara kamu yang sakit, baiklah ia memanggil para penatua jemaat, supaya mereka mendoakan dia serta mengolesnya dengan minyak dalam nama Tuhan. 5:15 Dan doa yang lahir dari iman akan menyelamatkan orang sakit itu dan Tuhan akan membangunkan dia; dan jika ia telah berbuat dosa, maka dosanya itu akan diampuni. 5:16 Karena itu hendaklah kamu saling mengaku dosamu dan saling mendoakan, supaya kamu sembuh. Doa orang yang benar, bila dengan yakin didoakan, sangat besar kuasanya. 5:17 Elia adalah manusia biasa sama seperti kita, dan ia telah bersungguh-sungguh berdoa, supaya hujan jangan turun, dan hujanpun tidak turun di bumi selama tiga tahun dan enam bulan. 5:18 Lalu ia berdoa pula dan langit menurunkan hujan dan bumipun mengeluarkan buahnya.
BENA KATA
Pertoton eme gegeh ras kegeluhen kerina kalak sitek, ibas ertoto e kita banci nuriken kerina isi pusuhta man Tuhan. Kai pe sipindo ras sibelasken ibas ertoto, idengkehken Tuhan nge kerina. Katawari isehken Tuhan pemindonta e tentu labo sekalak pe kita banci metehsa, saja ngenca ibas kiniteken siipindo kita ibas kiniteken dingen pengarapen isehken Tuhan kap ibas paksana sue ras waktu Tuhan. Kita pe perlu nginget maka labo asal sipindo man Tuhan pasti iberekenna, sebab labo banci sipaksa ras siatur Tuhan arah isi pertotonta. Tapi perlu singet maka Tuhan nge singaturken kegeluhennta. Tupung kita ertoto ije kap pengendesen geluhta kubas pimpinen Tuhan gelahna IA sitetap ngaturken kegeluhenta. Adi ertoto harus tek, labo banci bagi pemindo-pemindo saja. Tuhan erkuasa arah kerina si itotoken kita, labo kita siengkuasai Tuhan arah pertotonta.
PEBAGESI OGEN
Ogenta enda ngajuk ras mereken kata pedah man kerina pengikut Kristus gelah tetap megegeh ras megenggeng ngalaken perbeben erkiteken kiniseran, dingen labo gegeh ras pemeteh siipenalem tapi mindo penampat ras perkuah ate Tuhan ibas ngalakenca ras nggengkenca. Pertoton siipenangkih man Tuhan mbabai kalak sitek e tetap ngasup mengandalkan Tuhan i bas kerina dampar kegeluhenna. Adi pang kita mindo man Tuhan, tentu kita enggo mereken kesempaten Tuhan singaturken kegeluhenta.
Ertoto harus tek, maka ula mindo-mindo saja ngenca dahinta, kerina sibelasi ras sipindo seh maka singasup pe kita ndahikenca sisuruh ka nge Dibata ndahikenca. Kitab Yakobus nuriken maka lit nge pinakit banci turah ibas daging kula erkiteken kurang tek. Ipersingeti Yakobus pe perpulungen gelah adi lit sisakit mindo penampat gelah itotoken serayan Tuhan sienggo itangkuhken, alu namaken minak kukula sisakit e. Enda hal siwajar sebab notoken kalak si sakit e kap tanggung jawab serayan. Janah simehulina ras siseharusna serayan e pe ietehna tanggung jawabna guna notoken perpulungen kepkepenna, gelahna ibas ngalaken pinakit epe kinitekenna tetap paguh erkiteken lit serayan sinumpak-numpaksa
Yakobus pe ngidah maka banci turah pinakit i bas daging kula erkiteken dosa siilakoken bas kegeluhen sitep-tep wari baik secara pribadi bagepe kelompok (ras-ras). Emaka tep-tep kalak si sakit harus ka nge iperiksa dirina i lebe-lebe Tuhan, Adi lit kin si enggo lepak ilakoken harus nge lit pengakun dosa i lebe-lebe Tuhan bagepe mindo pengalemi dosa subuk e man Tuhan bagepe man kalak sienggo ceda pusuhnna erkiteken pengelakonta, segelahna salang kerina isi pusuh ras lalit rasa bersalah, maka kita metunggung mindo perkuah ateNa ras pertotonta erkuasa Sebab Kesah Sibadia nge singajari kita guna ertoto.
Pertoton kalak sibenar erkuasa, engkai? erkiteken Tuhan kin si erkuasa arah kerina pertoton siipindokenna man Tuhan. Kita ibenarken ras ipebadiaken Tuhan, erkiteken si e me maka pertoton kalak si benar ergegeh ras erkuasa, Ertina labo banci bagi ate-ateta saja mindo man Tuhan, tapi kita pe harus nge sipekena-kena kegelunenta tupung kita mindo man Tuhan. Kalak si benar ningen e, e me kalak si nggit ngendesken kerina dampar kegeluhenna man Tuhan, seh maka ietehna nge siapai sura-sura ras peraten Tuhan ibas kegeluhenna. Kebenaren e me sierbahanca madan pinakit, sialoken keselamaten ras banci kita pulah arah kerina perbeben simberat.
Kitab Yakobus enda pe nuriken kesaksin geluh Elia sitetap tutus ras setia man Tuhan seh maka kerina siipindokenna idengkehken Tuhan. Labo erkiteken ia kalak hebat ras luar biasa, tapi ia kalak sibiasa nge tapi pengendesen geluhna man Dibata nge siluar biasa seh maka terjadi siluar biasa ibas kegeluhenna. Dibata erkuasa arah pertotonNa erkiteken perkuah ate Dibata. Labo lit si sia-sia adi kita ernalem ras erpengendes man Dibata. Sebab kuasa Dibata tetap nge iberekenna man kalak si tek maka Dibata sierkuasa guna ngaturken kegeluhenna.
PENGKENAINA
Adi ertoto harus tek dingen nggeluh benar, alu bage pertotonta erkuasa sebab Tuhan kap siengkuasai kerina dampar kegeluhenta. Asa singasup kita ndahikenca dahikenlah, maka ula kita bagi pemindo-mindo ras nuruhi Tuhan saja ngenca sibeluh ibas pertotonta. Adi lit pinakitta erpalasken ogenta enda ndai cuba sigar-gari adina erkiteken lit nge salah dosanta maka kita sakit, perlu ka nge kita berobat ras bertobat gelah lampas madan pinakit e. Pertoton kalak benar ergegeh ras erkuasa, e mpersingeti kita mulihi maka labo sia-sia kita jadi kalak benar sebab adina kita mindo man Dibata, idengkehkenNa kap pertotonta.
Sura-sura Tuhan maka kita pe arus ngergaken kegeluhen bagepe ngergaken serayan Tuhan si enggo itangkuhken, sebab pertotonna pe erkuasa erkiteken ia nggeluh i bas kebenaren Dibata. Adi labo kita nggeluh benar labo banci ergegeh ras erkuasa pertotonta. Emaka marilah sipindo perkuah ate Dibata alu nggeluh benar
PERTOTON
Oh Tuhan Dibata, isehken kami bujur man baNdu perban oraten PA kami enda kan erbahan kami ngangkai kerina erti ertoto. Bahanlah reh ngasupna kami erkemalangen man baNdu ras reh ngasupna ngangkai sura- suraNdu, seh maka jadi kerina kai siisuraken kami. Amin.
DISKUSI
1) Erpalasken ogenta enda rikutken pengalamenndu katawari nge pertotondu idengkehken Tuhan?
2) Kai siilakokenndu guna nggeluh alu benar i lebe-lebe Tuhan gelah pertotondu erkuasa?
3) Adina reh pinakit nderpa daging kulandu, kai nge si biasa ilakokenndu?
Kata-Kata Bijak: Manusia mengukur dari penampilan luar, tetapi Tuhan mengukur isi hati