Bahan PJJ 3-9 Juli 2022

ERSEMBAH RIKUT RAS ERDAME
Matius 5:23-24

5:23 Sebab itu, jika engkau mempersembahkan persembahanmu di atas mezbah dan engkau teringat akan sesuatu yang ada dalam hati saudaramu terhadap engkau, 
5:24 tinggalkanlah persembahanmu di depan mezbah itu dan pergilah berdamai dahulu dengan saudaramu, lalu kembali untuk mempersembahkan persembahanmu itu.

A. PERSIKAPEN

• Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
• Nikapken ingan persembahen.
• Nungkun ras nuratken topik pertoton sapaat.
• Kune i bas sektor entah jabu kepkepen, perdalanen PJJ ibabai Pertua, Diaken, Pengurus PJJ, bage pe sekalak si enggo iaturken pengurus PJJ. Dikune PJJ ilakoken i jabu masing-masing, maka perdalanen PJJ ibabai bapa, nande, bage pe anak.
• Sope benaken PJJ, banci kita rende alu make ende-enden KAKR.
• Janah kerina perdalanen PJJ enda banci iubah (imodifikasi) rikutken perluna.

B. PERPULUNGEN JABU-JABU/ PERPULUNGEN JABU
RENDE : KEE No. 187 : 1,2 Gegeh Kuasa Kesah Sibadia
(IBABAISI MADA JABU)
https://www.youtube.com/watch?v=2uUYbpqop10

1. Gegeh kuasa Kesah si Badia, ib’re Tuhan bangku tiap jam
   Katawari pe itemaniNa, iidahNa kai pe si kuban
   Perdalanku pe ikawaliNa, setan iblis ipelawesNa
   Kuasa doni la ergegeh bangku, Tuhan saja man ikutenku
2. Adi dua, telu kalak gia, tutus pulung i bas gelarNa
   Reh me Ia ku tengah-tengahna, sabab e nggo ipadankenNa
   O, Tuhan kupindo Kamlah saja. Nemani geluhku tiap jam
   Amin tah kentisik saja gia. La ateku erleka ras Kam

ERTOTO (IBABAI ANAK)

NGOGE KATA DIBATA
Teks : Matius 5:23-24 (IBABAI NANDE)
Tema : Ersembah Rikut Ras Erdame

RENUNGEN
Ersembah e me salah sada bagin si penting i bas peribadahen gereja ta. Ersembah i bas kita nehken kiniteken man Tuhan alu mereken persembahan man Dibata (gift) enda e me salah sada pengataken bujur erkiteken kekelengen ras penemani Tuhan i bas geluhta.

Persembahen enda enggo isuratken i bas Kitab Padan si Ndekah (Kitab Kejadin) e me persembahen Habel, bage pe kerna persembahen Abraham man Dibata. I bas kitab Imamat pe ijelasken maka Tuhan merentahken bangsa Israel maba korban persembahen i bas ibadah, e me lit piga-piga : persembahen korban tutungen, persembahen pangan, persembahan pengalemi dosa, ras si debanna. E maka nehken persembahan nggo semal i bas kegeluhen bangsa Israel. Bangsa Israel la banci ngadap man Tuhan adi la maba persembahenna jine. E maka persembahen e pe enggo i terusken seh asa genduari i bas kerina kegiaten kebaktin lit i sehken persembahen man Dibata.

Ersembah i bas teksta sekali enda nuriken kerna mereken persembahen man Tuhan ku rumah pertoton, adi kin lit denga turah perubaten ntah la erdame maka tadingkenlah lebe persembahen e maka lawes, dahi ise si ersoal ras kita. Janah kenca dung persoalen e, e maka banci nehken persembahen man Dibata. Erdame ertina e me berbaik kembali; berhenti bermusuhan

Jesus labo ngatakenca maka kita ula pedah nehken persembahen adi lit pusuh ukur si lenga erdame. Jesus ngatakan adi kita reh ku lebe-lebe/altar Dibata maba persembahen ula min kita ngataken maka kita tempa-tempa la ersalah (hidup benar) ras mehuli perbahanenta adi bas pusuh lit ije konflik ras la lit dame. Tuhan
Jesus nuriken kerna bersih ukur pentingen asangken ritual persembahen/praktek keagamaan. La banci bagi Kalak Parisi ras ahli taurat tupung si e patuh i bas ersembah/beribadah tapi pusuh peratenna ndauh i bas Dibata nari (pekulah-kulah/munafik). Jesus muat kata nabi Jesaya “Nina Dibata, bangsa enda ipujina aku alu biberna ngenca, tapi ukurna ndauh sirang i bas Aku nari. La lit ertina i sembahndu Aku, sabab undang-undang agama si ajarken eme peraturen-peraturen manusia” (Mat. 15:7-9).

Ogenta paksa enda ipeseh gelah i bas kita mere persembahan ku Dibata perlu ije ukur si bersih ras mejile ka hubungenta ras keluarga, senina turang ras sapih-sapih kita manusia. Ula pekulahkulah adi ersembah man Dibata. Mehuli hubungan i bas kita ersembah man Dibata tentu sendalanen ras hubungen si mehuli nandangi kerina jelma. Lalit i je konflik/perubaten si lenga terdameken.

Lit piga-piga si penting i bas ogenta enda, e me :

• Ersembah perlu isikapken alu mehuli. Labo meros, gelah nggo lit saja. Tujunna pe labo gelah pamer ras ia teridah, gelah i puji kalak. Mereken persembahen man Dibata, si mehulinalah si sikapken. Janah adi enggo ibereken ku rumah pertoton ula jungut-jungut tapi meriah lah ukurta.
• Ersembah perlu alu ukur si dem pengataken bujur perban kerina si lit i bas kita Tuhan kap empuna, janah tetap i pasupasuNa kita seh ku bas wari enda alu erbage-bage pemere
• Ersembah man Tuhan perlu ije pusuh si erdame. Adi ingetndu lit ukur seninandu sangkut nandangi kam, tadingkenlah lebe persembahenndu i rumah pertoton (ertina itadingken i jenda e me guna makeken kesempaten e mpekena hubungenta lebe gelah sendalanen kiniteken ras perbahanen) jenari erdame ras ia. La lit dendam entah perubaten si lenga terdungi. Persembahen labo guna kewajiben ritual/ibadah saja tapi pe pusuh perukuren si enggo erdame ras turang senina entah pe kalak si deban.

NURIKEN PENGGEJAPEN (Maksimal 3 kalak banci nande, bapa ntah anak-anak)

IRAKUT PERTUA/DIAKEN/EMERITUS/PENDETA

DISKUSI/SHARING

1. Kai arti ersembah ras erdame rikutken pendapatndu?
2. Enggo nge kita mere persembahan alu pusuh si erdame ras dem pengataken bujur?
3. Turiken uga carana kita ngasup mere persembahen alu pusuh si bersih ras dem pengataken bujur (hati yang bersyukur)

RENDE : KEE No. 385:1, 2 “Babalah Persembahen” (PERSEMBAHEN)
https://www.youtube.com/watch?v=90JL9tyelzE

1. Babalah persembahen si merimna, ku adep-adepen Dibatanta
   Babalah korban pujin si mehaga, kulebe altarNa si Badia
   G’lah tetap b’reNa pasu-pasuNa, man k’rina manusia
   G’lah tetap b’reNa pasu-pasuNa, terpuji gelar Tuhan
2. Babalah persembahen si jilena, ku rumah Dibata si Perkuah
   Babalah korban pujin si merimna, ku adep-adepen si Erkuasa
   G’lah tetap b’reNa keleng ateNa, ras lias ateNa banta
   G’lah tetap b’reNa pasu-pasuNa, segedang-gedang geluhta

PERTOTON SAPAAT : (IBABAI BAPA)

• Persembahen ras si mada jabu
• Gelah ngawan perpulungen mereken persembahen alu benar ras pusuh si dem pengataken bujur ras nggit berdame ras kalak si deban.
• Gelah ngawan perpulungen ras kerina serayan sehat ras ipasupasu Dibata kerina i bas kegeluhenna
• Bangsa ras negara sejahtera ras ipepalem i bas pinakit bage pe virus corona-19.

PERTOTON TUHAN

MOMO

C. JEDA RAS PENUTUP

Pdt. Rosliana Sinulingga, M.Si.
HP/WA : 0813 2694 4794