Kesadaran Bersama dalam merawat lingkungan menuju kesejahteraan umat
(Kolaborasi Kategorial)
Teks : Masmur 133: 1-3
Tema : KINIERSADAN EMPETURAH KEGELUHEN
Tujun : Gelah Mamre:
- Ngidah gambaren nggeluh si ersada si empeturah keriahen, kiniulin geluh ras pasu-pasu Dibata.
- Jadi pelopor kiniersadan guna mpekena-kena doni ingan Dibata mereken pasu-pasuNa
Persaudaraan yang rukun
133:1 Nyanyian ziarah Daud. Sungguh, alangkah baiknya dan indahnya, apabila saudara-saudara diam bersama dengan rukun! 133:2 Seperti minyak yang baik di atas kepala meleleh ke janggut, yang meleleh ke janggut Harun dan ke leher jubahnya. 133:3 Seperti embun gunung Hermon yang turun ke atas gunung-gunung Sion. Sebab ke sanalah TUHAN memerintahkan berkat, kehidupan untuk selama-lamanya.
Metode : Diskusi
1. KATA PENARUH
Tep-tep manusia tentu lit perbebenna bas ndalani kegeluhenna. Tupung kinata kegeluhen enda la sue ras kai si iarapken, banci erbahan bene ukur, la ersemangat, ndele ate tep-tep wari. Erdandanken sie maka kerina kalak perlu dukungen i bas keluarga entah pe i bas teman nari, terlebih-lebih i bas Dibata nari si jadi gegeh guna ndalani kegeluhen enda ras ngalaken kerina tantangen si lit. Bagenda me ituriken kerna uga pentingna kiniersadan i bas kegeluhen manusia si erbahan kegeluhen enda tuhu-tuhu nggeluh. Mari kita erlajar arah kitab Masmur 133:1-3.
2. URAIAN TEKS/ TAFSIREN
Masmur 133:1-3 nuriken kerna situasi keluarga ras bangsa Israel, sipaksana ngadapi ancamen perpecahen i bas kerajan enda, radu ras sie i bas jabu-jabu pe mulai turah benih-benih permusuhen. Erdandanken sie maka Pemasmur ertedeh ate guna nuriken man bangsa e, uga belinna ulih kegeluhen siersada perarih alu nggambarkenca bagi minak wangi ras embun i deleng Hermon simereken kemalemen ate.
- Ayat 1
Andiko ulina ras senangna, adi kalak siersenina ersada perarih. Salah sada dalan gelah manusia ndatken kiniulin ras kesenangen i bas kegeluhen enda e me kap kegeluhen siersada perarih. Nggeluh siersada perarih mpeturah keriahen ras semangat guna makeken tep-tep paksa alu mehuli, i bas perbahanen, rukur bage pe ngerana, e maka nina Pemasmur ‘andiko ulina ras senangna..’ sabab i bas kinulin e lit kesenangen.
- Ayat 2-3a
Bali kape ras minak wangi si meherga, si icurcurken ku takal Harun, maler ku janggutna, maler ku kerahung, baju jubahna. Minak si mehuli eme kap minak urapen si meherga, siicurcurken ku takal Harun tupung penangkuhen selaku Imam. Minak e ‘langka’ ras meherga. Alu minak e, sekalak Imam itangkuhken ras ipebadiaken quna ndalanken dahin pelayanenna. Tupung minak e iamburken, maka bau minak si merim e tergejab ku sekelewetna. Bage me nanamna adi kita nggeluh ersada perarih, sibaba me dampak positif si luar biasa man dirinta jine bage pe jadi pasu-pasu man kalak sideban.
Bage pe bagi embun ideleng Hermon, si nusur ku deleng-deleng Sion. Gedang-gedang tahun puncak deleng Hermon itutupi salju, tapi daerah si isekelewetna kerah. Janah embun i deleng Hermon la mungkin seh ku Bukit Sion siibatasi kelbung ras kerah. Tapi ijenda me rahasiana, e me kai pe banci jadi adi Dibata sierbahanca. Bage me pe kerna kegeluhen siersada perarih. Adi Dibata lit i bas kegeluhen tep-tep kalak maka kai pe singolang-ngolangi guna ersada perarih sada ras sidebanna banci italuken, sabab kalak sibage terjemba guna mbuka diri ngaloken ras ertedeh ate guna memahami kalak sideban. Ertina nggeluh ersada perarih, nggeluh i bas siergan sabab lit kesadaren maka selaku tinepa Dibata, lit pemere si khusus ras kebutuhen khusus. E maka bagi nina Rasul Paulus “Sisampat-sampatenlah kami bas maba baban geluhndu.” (Galati 6:2). Bage me gambaren kiniulin ras kesenangen e ituriken Pemasmur.
- Ayat 3b
lje me Tuhan erpadan mereken pasu-pasuNa, kegeluhen si la erkeri-kerin. Ertina, i bas kiniulin ras keriahen e me pasu-pasu e.
3. APLIKASI
Moria, Mamre, Permata ras anak KAKR bage pe Saitun, nggeluh ersenina erturang i bas sada keluarga, e me keluarga Dibata. Mekatep kalak erpengakap maka pasu-pasu e lit i bas kinibayaken, keberhasiken i bas erusaha, sukses anak, kesehaten ras sidebanna. Arah kata sijadi bahan PA-nta ngataken maka kinulin nggeluh ras keriahen e me situhuna pasu-pasu e. Sabab kai pe lit, kai pe jadi adi labo mehuli, labo mpeturah keriahen, cilaka nge gelarna. Nggeluh ersada perarih erbahanca kegeluhen tuhu-tuhu nggeluh, sabab ije lit spirit (semangat), keriahen. Tupung kita ngenanami perbeben, merasa sendiri, kiniersadan banci jadi pengapul ras gegeh.
Perbeben secara Nasional genduari e me ‘doni enda enggo ceda’ taneh, udara, lau mekatep mereken kiniseran man manusia, pemanasen global mekatep jadi. E maka selaku Gereja, aron Dibata, ertanggungjabab i bas empekena-kena doni enda. Gerejanta GBKP i bas tahun 2022 erbahan tema “Kreatif Merawat Lingkungan”. Tema enda sekaligus jadi perayaken, uga kita banci berperan aktif i bas mpekana-kena doni si enggo ceda enda gelah jadi ingan siteneng ras mereken keriahen.
Kiniersadan Kategorial Saitun, Moria, Mamre, Permata ras anak KAKR, jadi kinata si mehuli ras tuhu-tuhu mehuli ras ‘bernilai istimewa ilebe-lebe Dibata (siang ayo Dibata natap kita), banci rulihken pasu-pasu man banta (bd. Mat. 18:19). Bage pe i bas pertoton Jesus ngataken “gelah kerina ia ersada..” (Joh. 17:21). Ersada ukur ras tekadta mpekena-kena doni enda. Si bahanlah maka mpena-kena doni sekelewetta jadi keriahenta, jadi Gerakan Bersama. Moria enggo erbahan geraken mpepulung minak jelantah gelah ula iambekken ku ingan sembarangen, sabab adi iambekken encedai taneh ras lau, Permata enggo erbahan program mpepulung ras mendaur ulang sampah. Ersadalah arihta, si dukunglah program enda, si persada gegehta. I bas jabunta pe, radu ras kita orangtua, anak-anak guna mpesikap jabu, kesain rumah gelah bersih. Ula si pelepas anakta saja, entah nande saja bage pe bapa saja. Sabab. Adi si persada gegehta banci mbelang bekasta, la ka latih si sada, mateken lau, mateken listrik adi la perlu. Sampah si pepulung, adi banci ipeserap-serap gelah ula ercampur kerina, umpamana lit ingan plastik, ingan kertas, ingan pangan sisa ras si debanna. Banci si bayangken adi ersada arihta, ersada aksinta tentu teridah dingen tergejab man lingkungen sekelewetta, si pekena-kena sinuan-sinuanta, rubia-rubia gelah kerina nggeluh alu sejahtera dingen dame. E maka kegeluhenta enggo jadi kesaksin, kita enggo jadi saksi Dibata si nggeluh. Ermulialah Tuhan i bas kiniersadanta, dame ras pasu-pasu Dibata jadi sikerajangenta.
4. DISKUSI
1. Rikutken Masmur 133:1-3 kai ulih kegeluhen si ersada perarih,
2. Persadalah arihndu guna mpesikap lingkungen sekelewetndui rumah ras gereja. Lakokenlah?
- USULEN LAGU
- KEE GBKP No. 209:1-2,
- KEE GBKP No. 262:1-3
- KEE GBKP No. 292:1-3
- Kerja Buat Tuhan selalu manise
- KEE GBKP No. 306:1-3
Pdt. Jennie E Keliat, S.Th
HP. 0813 7552 3001