KERINA TINEPA DIBATA MEHULI
Kejadin 1:31; 2:1-4
(GBP Tahun 2022: Kelestarian Alam/Hari Lingkungan Hidup)
1:31 Maka Allah melihat segala yang dijadikan-Nya itu, sungguh amat baik. Jadilah petang dan jadilah pagi, itulah hari keenam.
2:1 Demikianlah diselesaikan langit dan bumi dan segala isinya.
2:2 Ketika Allah pada hari ketujuh telah menyelesaikan pekerjaan yang dibuat-Nya itu, berhentilah Ia pada hari ketujuh dari segala pekerjaan yang telah dibuat-Nya itu.
2:3 Lalu Allah memberkati hari ketujuh itu dan menguduskannya, karena pada hari itulah Ia berhenti dari segala pekerjaan penciptaan yang telah dibuat-Nya itu.
2:4 Demikianlah riwayat langit dan bumi pada waktu diciptakan. Ketika TUHAN Allah menjadikan bumi dan langit,
A. PERSIKAPEN
- Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
- Nikapken ingan persembahen.
- Nungkun ras nuratken topik pertoton sapaat.
- Kune i bas sektor entah jabu kepkepen, perdalanen PJJ ibabai Pertua, Diaken, Pengurus PJJ, bage pe sekalak si enggo iaturken pengurus PJJ. Dikune PJJ ilakoken i jabu masing-masing, maka perdalanen PJJ ibabai bapa, nande, bage pe anak.
- Sope benaken PJJ, banci kita rende alu make ende-enden KAKR.
- Janah kerina perdalanen PJJ enda banci iubah (imodifikasi) rikutken perluna.
B. PERPULUNGEN JABU-JABU/ PERPULUNGEN JABU
Rende: KEE No. 260:1 (Ibabai Nande)
https://www.youtube.com/watch?v=I1Bx457z1V4
Oh andiko jilena, tinepa Dibata,
subuk pertibi enda ras isina k’rina
Deleng si meratah kerangen, perik-perik rende kabangen
Andiko jilena si banNa, seh kal kap ulina
Reff : E maka tangarlah min kita jelma, ola melasang, ola meturdaksa
Lit tenah Kata Pedah ni Dibata, jaga kelengi k’rina tinepaNa
Ertoto (Ibabai si mada jabu)
Ngoge Pustaka Si Badia : Kejadin 1:31; 2:1-4 (Ibabai anakanak)
Renungen (Ibabai Bapa)
Tema : Kerina Tinepa Dibata Mehuli
Sinimaksudken lingkungen e me kap kerina tinepa Dibata, umpamana: manusia, rubia-rubia, ras sinuan-sinuan bage pe doni enda. Si sedari maka bage kal belinna dahin Dibata nepa doni enda, tentu arus lit kesadarenta ka maka manusia e me salah sada bagin arah dahin Dibata nepa doni enda. Jadi, labo manusia e ngenca tinepa Dibata i doni enda. Janah adi isiksiki pe i bas kitab Kejadin 1 ikataken i je manusia e tinepa Dibata siperpudina kal itepa Dibata i bas wari pe-enemken sope Dibata pekesahken i bas wari pepituken. Jadi banci iandingken maka manusia e me anak singuda i bas bagin Dibata nepa doni enda. Jadi, enggo arusna manusia mehamat man tinepa Dibata si deban si tuan asangken ia.
I bas bahan PJJ-nta Kejadin 1:31; 2:1-4 ikataken ije maka tinepa Dibata e mehuli kerina. Erkiteken Dibata si nepa tinepa e tuhutuhu seh kal ulina. Penilaien si ikataken i jenda e me tuhu-tuhu mehuli, e me kai si itepa Dibata mulai wari pemena seh wari peenemken. Kerinana tinepa e tuhu-tuhu erguna. Itepa Dibata doni enda tentu mereken kegeluhen man kerinana sue ras surasura Dibata. Kerina tinepa, khususna kerina mahkluk si nggeluh kuh kal kerina guna sada kegeluhen si kin ibabai kempak wari pepituken e me muji ras nembah man Dibata. Kerina si itepa Dibata e ujungna e me kempak wari pepituken, wari pekesahken guna Dibata. Ertina, tinepa Dibata e kerina mulai wari pemena seh wari peenemken imaksudken guna mpermuliaken Dibata.
Si jadi tema PJJ-nta e me kerina tinepa Dibata mehuli. Kenca Dibata nepa kerinana i bas doni enda, maka lalit tinepa si la ndatken ingan janah kerina radu mehuli (harmonis). Kerina isi doni enda lanai melino, erkiteken enggo kuh kal. Kerina terpekena-kena i bas aturen Dibata nepa doni enda. Enda me kiniulin pendahin Dibata.
Selaku gereja Tuhan kita perlu lebih mbue kepate nandangi persoalen kelestarian lingkungen inganta tading e me doni enda. Megati nerapken bana kita arah tinepa si deban, alu alasen kita sue ras tempas Dibata. Tinepa si deban lang, e maka rate-ate kita nandangi tinepa si deban e. Kinatana Pustaka Si Badia naksiken maka kita arus ngkelengi kerina tinepa Dibata. Sabab labo ngasup tinepa Dibata enda nggeluh adi la kin sisampat-sampaten, tandana kita enda kerina itepa alu mehuli. E maka si arus jadi perukuren man banta e me kita pe ikut muat bagin (berpartisipasi) ku bas kerina tinepa alu ngenanami kai si inanami tinepa si deban e me ngaloken keleng ate Dibata. Kita ngenanami wari suari ras berngi raduken tinepa si deban. Kita ngenanami udara si la bersih raduken perik i awang-awang bage pe raduken nurung i lawit.
I bas kita mpekena-kena kelestarian doni enda PBB (Perserikatan Bangsa-Bangsa) enggo erban rumusen 17 Tujuan Pembangunan Berkelanjutan (TPB) Sustainable Development Goals (SDGS) enda banci si nehen i bas Garis-Garis Pelayanen (GBP) GBKP ntah i bas google. Selaku warga gereja, arusna buen kita ngelakoken dahin-dahin si banci mpekena-kena doni inganta tading enda. Banci jadi ntah sitik kal nge ngenca banci silakoken guna nehi tujun-tujun bagi sikataken i datas ndai. Janah banci ka pe silakoken aksi radu ras kerina perpulungen GBKP e me: nampati pemulung, petugas kebersihen, nuan batang kayu, kebersihen lingkungen, bank sampah, ngelola pertanian guna ketahanen pangan, pemberdayaan nandangi pengamen (menciptakan lapangan kerja man bana), ras si debanna.
Nuriken Penggejapen (Bapa, nande ras anak-anak)
Irakut Pandita/Pertua/Diaken/Emeritus/Vicaris/Detaser
Diskusi
- Uga pemahamenta sekalak-sekalak kerna erti tema “Kerina Tinepa Dibata Mehuli”, i bas mpekena-kena lingkungen inganta tading?
- Kai nge si banci silakoken gelah tinepa Dibata radu ngkuhi (saling melengkapi) kerinana?
Rende: KEE No. 343:1 (Persembahen)
https://www.youtube.com/watch?v=lsgTaTI4aIM
Pasu-pasu bas Tuhan nari, gejapken kami teptep wari
Bas paksa-paksa geluh kami, Kam me kap tetap singkawali
Pasu-pasu bas Tuhan nari, jadi pergegeh tendi kami
Guna ndalani wari-wari, si rehna bas Kam Tuhan nari
Reff: Pasu-pasu dage o Tuhan, persembahen kami anakNdu
Labo kapen enda metunggung, persembahen si nggo pepulung
AjariNdu pe kami gelah min, tetap ngasup mere man Tuhan
Pertoton Sapaat (Iaturken piga-piga mabaisa)
- Gelah perpulungen ngasup njagai ras ngergai tinepa Dibata si deban.
- Gelah perpulungen banci ndalanken aksi guna njagai lingkungen inganna tading.
- Kerna persembahen bage pe si turah i bas perpulungen.
Rende: KEE No. 260:5
https://www.youtube.com/watch?v=I1Bx457z1V4
Oh Andiko Jilena
Oh andiko riahna, doni si’nggo mbaru
Aloken Yesus Tuhan, Juruselamatta
‘Lah rubia njingkang la m’lance, perturah senuan la lengke
Andiko riahna ras Tuhan, pusuh pe la nggine
Reff : E maka tangarlah min kita jelma
Ola melasang, ola meturdaksa
Lit tenah kata pedah ni Dibata
Jaga kelengi k’rina tinepaNa
Pertoton Tuhan
Momo
Jeda Ras Penutup
Pdt. Andreas Pranata Meliala, S.Th.
HP /WA : 0821 6390 2618