(Minggu I Kenca Trinitas)
Ogen : Mazmur 33: 18-22
Tema : Erpengarapen Man Dibata Saja
Tujun : – Gelah Saitun tetap erpengarapen man Dibatai bas kerina paksa ras kecibal geluhna
- Gelah Saitun maba keriahen ras kesangapen man kalak si lit sekelewetna si enggo bene pengarapenna.
33:18 Sesungguhnya, mata TUHAN tertuju kepada mereka yang takut akan Dia, kepada mereka yang berharap akan kasih setia-Nya, 33:19 untuk melepaskan jiwa mereka dari pada maut dan memelihara hidup mereka pada masa kelaparan. 33:20 Jiwa kita menanti-nantikan TUHAN. Dialah penolong kita dan perisai kita! 33:21 Ya, karena Dia hati kita bersukacita, sebab kepada nama-Nya yang kudus kita percaya. 33:22 Kasih setia-Mu, ya TUHAN, kiranya menyertai kami, seperti kami berharap kepada-Mu.
I. BENA KATA
Setiap manusia pasti lit pengarapenna, sebab erpengarapenmerupaken hal si penting i bas kegeluhen manusia. Pengarapen eberkaiten ras masa si reh janah i bas erpengarapen e perlu ije litbiak sabar ras megenggeng (bd. Roma 8:24- 25). Pengarapen ebiasana lit hubungenna ras sura-sura. Arah litna sura-sura maka setiapmanusia berusaha erpalasken gegeh ras pemetehna lit gelah seh bagi nisura sebab e me sini arapken kerina manusia. Tapi i bas kenyatannamaka labo kerina tersehi bagi sura-sura, malahen siterjadi e me sehsura-sura turah ka sinanggel, la seh sura-sura enggo jadi tangkel-tangkel. Bage me rusur pengalamen geluhta wari lepas wari. Jaditangkas man banta maka labo kepe terandalken gegeh ras pemetehta ibas ndalani kegeluhenta enda.
II. MPEBAGESI OGEN
Arah bahanta enda tangkas teridah isingetken permazmur maka ilebe-lebe Dibata si mada kuasa, teridah maka manusia e labo lit gegeh ras kengasupenna guna ndatken kai sini surakenna. Gia sura-sura e mehuli ras payo iakapna kai sini idahikenna tapi jelas maka Dibata kap sierbahan keputusenna janah la ka sinimbangsa kai si lit i bas ukur manusia (bd. Kuan2en.16: 1-2). I bas ayat 13-14 ituriken maka Tuhan e natap i surga nari guna ngenehen kerina jelma manusia si ngiani doni enda. I bas Dibata la kepe terligen kai si lit i bas kegeluhen manusia, sebab ija pa pe la nge si erkuasa. I bas ayat 19 iangkat permazmur salah sada contoh pengalamen geluh manusia i bas bencana nari.
Selaku kalak si rembak dingen erkiniteken man Dibata, umpamana Daud, ia yakin maka Dibata nge si tetap ngkawali ras nemani ia i ibas ngalaken erbage-bage tantangen ras ancamen nari. Daud sendiri enggo terancam geluhna erkiteken Saul si paksa ia resmi denga secara pemerintahen doni sebagai Raja rikut pe ras tenterana berusaha guna munuh Daud. Bage pe anakna sendiri si Absalom erbahan sada geraken guna banci ndabuhkenca gelah ia nggantiken bapana guna jadi raja. Bage me tantangen ras ancamen sini hadapi Daud ibas kegeluhenna, tapi labo erbalas ras bertindak erpalasken ukurna jine. Daud sendiri tetap ernalem ras erpengarapen man Dibata saja. Sanga Daud ngalaken bangsa Pilistin (Goliat) maka secara gegeh bage alatsi lit maka labo mungkin ia ngasup naluken bangsa enda. Tapi erkiteken Daud erpengarapen man Dibata saja maka kuasa Dibata erdahin guna jadi penampat si erbahanca Daud jadi pemenang.
III. PENGKENAINA
Virus corona 19 enggo ngkenai kegeluhen manusia i bas doni enda mulai ibas akhir tahun 2019 ras seh ku tengah-tengah bangsanta enda i bas awal tahun 2020. Enggo melala manusia si jadi korban ras dampakna kubas kegeluhen manusia pe cukup mbelin, baik arah segi ekonomi, pendidiken, agama ras budaya. Erkiteken virus enda mbaru denga ras la teridah, e maka tambarna pe langa ieteh, si nambarisa pe erlajar denga kuga ka nambarisa. Tentuna labo enda saja si jadi tantangen ras ancamen i bas geluhta, langa pe reh ndube covid enda enggo me melala perbeben sini hadapi kita. Si penting e me kuga kita ngalaken perbeben ras ancamen e gelah salih jadi alat ras kesempaten guna ndatken erbage-bage si mehuli si rehna i bas Dibata nari. Paulus ngataken maka i bas kai pe Dibata erdahin guna kiniulin man kalak si erkeleng ate man baNa, e me kalak si enggo ipilih Dibata arah sura-suraNa. (Roma 8: 28) Gia erbage-bage perbeben si megati jadi ancamen i bas kegeluhenta enda labo ertujun guna mpebiar-biar kita, tapi gelah kita pe banci njagai kesehatenta sendiri, keluarganta, bage pe tetangganta ras kalak si deban. Kepatuhen ras kesetianta nandangi kata Dibata bage pe ras tetap patuh ras displin ngikuti siaturken pemerintah maka banci terjaga kesehatennta. Dibata sierkuasa ras perkeleng e tetap nge nampati ras ngkawalisa sue ras padanNa maka la tetap nge ras kita seh ku kedungen jaman (Mat. 28:20)
Malem kal ate kalak nggeluh adi Dibata ibahanna jadi pengarapenna, subuk i bas hal kesehaten, ekonomi dingen keamanen, I bas ayat 18 b nina permazmur: Tuhan ngkawali kalak si ngikutken la, kalak si ermalem man keleng ateNa si la ersibar. Keleng ateNa s la ersibar e sitandai i bas diri Yesus Kristus si enggo ngataken “O Bapa. alemin min kalak enda, sebab la langkana kal si ibahanna enda” (Luk 23:34)
IV. PERTOTON
O Tuhan Dibata si tetap erkeleng ate man kami manusia, ipuji dingen isembah kami Kam. Arah ukur meriah ikataken kami mbue bujur man baNdu. Kam kap pengarapen kami i bas ngalaken erbage-bage perbeben geluh dingen Kam kap sekawal kami sangana kami paksa ngelabuh. E maka tetap kami temani ras kawaliNdu, gelah geluh kami pe banci jadi pasu-pasu man kalak si deban jenari gelarNdu pe tetap terpuji dingen ermulia. I bas gelar Yesus Kristus isehken kami pertoton kami man baNdu. Amin
V. DISKUSI
1. Turiken pengalamenndu tandana kam erpengarapen man Dibata saja!
2. I bas kai-kai saja megati kita enggo kurang pengarapenta man Dibata, terlebih i bas masa tuanta enda?
Peru ngadil-ngadi i juma Tanjung
Ingan perlajangen i Deleng Babo
Labo gunana kiniteken tanggung
Patuh ras tutus maka enggo payo
Anding-andingen:
Bagi si nutung ranting meratah, isempul pe tambah cimberna,
adi igestungken mate me jadina.
Iandingken kempak sada-sada pendahin,
dosa isampati maka reh rontangna.