(Minggu Trinitas)
Ogen : Epesus 11:5-21
Tema : Kepentaren guna ngangkai kuasa ras kemulian Dibata I bas ndalani geluhna
Tujun : Gelah Saitun:
- Ndatken pengertin guna ngangkai kuasa ras kemuliaan Dibata i bas ndalani geluhna
- Makeken kuasa Dibata e jadi palas guna ndahiken dahin kesaksin, persadan ras ngelai
1. BENA KATA
I bas Minggu Trinitas enda kita iajuk guna ngangkai dahin Dibata Si Telu Sada (Allah Trinitas) i tengah-tengah doni enda. Kiniersadan Bapa, Anak, ras Kesah Sibadia (Allah Persekutuan) jadi palasta ndahiken dahin kesaksin, persadan, ras ngelai i gereja bagepe i doni enda Tentu saja, perlu kita kepentaren guna ngangkai kuasa ras kemulian Dibata, gelah tangkas sitandai pendahin Dibata Si Telu Sada e ibas geluhta.
2. MPEBAGESI OGEN
Ibas suratna man perpulungen i Epesus, Paulus ngangkatken tema kiniersadan i tengah-tengalh perpulungen sabab megati lit guru-guru si atena memecah belah kalak si tek. Tapi Paulus negasken maka kerina kita enggo ipilih Dibata jadi anak-anak-Na anem gia pelain-lain latar belakangna. Bagin pengogenta sendah judulna Pertoton Paulus sincidahken uga Paulus mabai perpulungen si enggo ipantekina e kubas pertotonna gelah tetap paguh kiniersadanna i bas keleng ate Kristus.
Situhuna, Paulus bangga man perpulungen i Epesus e, “kubegi maka kam enggo erkiniteken man Tuhan Jesus, dingen keleng atendu man kerina anak-anak Dibata” (ay. 15) Tapi Paulus sadar maka lit saja pihak-pihak siatena ngonggari kiniersadan perpulungen e. E maka arah totona nina, “Kupindoken man Dibata Tuhanta Jesus Kristus, Bapa siermulia, gelah ibereken-Na man bandu kesah kepentaren dingen ipetangkas-Na diri-Na man bandu gelah itandaindu la” (ay. 17), Kalimat enda nuduhken maka Paulus erpengarapen kal gelah Kesah Sibadia ngajari perpulungen e gelah pentar ncibalken dirina ras kalak sideban anem gia pelain-ain latar belakangna Kesah epe ngajari perpulungen nandai maka Dibata Si Telu Sada (Allah Trinitas) eme Dibata kiniersadan (Allah Persekutuan). Adi Dibata siisembah e biakna ersada (persekutuan), tentu saja anak-anak Dibata pe harus nggeluh ersada i tengah-tengah perpulungen. Kepentaren sibagenda rupana seh kal perluna gelah paguh kiniersadan i tengah-tengah perpulungen e la munukah ibabai pengajaren si papak.
Kepentaren guna nandai kuasa ras kemuliaan Dibata e mpetetap ukur perpulungen nehken kekelengen ras ndalanken simehuli geluhna sabab kuasa e mbelin kal (ay. 19) Kuasa e erbahanca kita la percik-cik, sabab ganjangen nge kuasa-Na asangken kuasa kai pe si lit ibas doni enda. Pertoton enda mpetetap ukur perpulungen kerna ise kin Dibata siisembahna. ldentitas selaku anak-anak Dibata erbahanca perpulungen tetap paguh kiniersadanna paguh kinitekenna, ras erburak-burak ukurna lako nehken Berita Si Meriah sabab kuasa Dibata arah Kristus i bas penemani Kesah Sibadia jadi palas perpulungen ndalani kegeluhenna.
3. PENGKENAINA
Melala kal situasi-situasi si banci ngonggari kiniersadanta, subuk i tengah keluarga bagepe i tengah gereja. Lit deba kelompok tah pe sekalak jelma atena mendominasi, erkiteken akapna nggo mbue ngaruhna ije, jagon ia asangken kalak sideban, seh maka katana jadi koto gong. Biak-biak sibagenda la ncidahken biak sekalak si ikuasai Kesah Si Badia Sabab adi erpenulih kita kubas kiniersadan Dibata Sitelu Sada subuk Bapa Anak, ras Kesah Si Badia, labo lit siganjang teruken. Dibata Si Telu Sada erdahin ras-ras ibas nepa doni enda, nelamatken doni enda ras masu-masu pendahin gereja. E maka. bagi pertoton Paulus man perpulungen i Epesus gelah perpulungen enda ndatken kepentaren guna nandai kuasa ras kemulian Dibata. Wari enda pe kita isingetken maka kuasa Dibata e mbelin. Kesah Si Badia ngajari kita meteruk ukur ras ngergai kalak sideban. Ula sinilai kalak arah status sosial tah pe ekonomina saja. Kuasa Dibata erbahanca kita la murah jole-joleken pengajaren doni si papak, entah pe kuasa kegelapen si tempa mabai kesuksesen, tapi petembil ras sura-sura Dibata.
Kalak sinandai Dibata ras kuasa-Na, nggit muat bagin ibas dahin pelayanen (kesaksin, persadan. ras ngelai), sebab ietehna maka Dibata si sembahna pe erdahin guna kiniulin doni enda, E maka, la itadingina dahin perpulungen, sebab tedeh atena rusur pulung jumpa ras Tuhan, bagepe junpa ras teman perpulungen Kalak si idemi Kesah Si Badia erburak-burak ukurna guna naksiken cara geluh sipayo singena ate Tuhan Jenari, kalak si nggeluh i bas kuasa Dibata makeken dirina guna ngelai kalak sideban sabab igejabkenna maka Dibata leben ngelai ia i bas geluhna.
4. PERTOTON
Bujur isehken kami man bandu O Tuhan Dibata si tetap mperdiateken ras ngkelengi kami Enggo tangkas i idah ras igejapken kami kerna kuasa ras kemulianNdu ibas gedang-gedang kegeluhen kami. Pengarapen kami gelah ibereken Kam pengertin ras gegeh man kami guna ndalani wari-wari kami janah kuasandu e ipakeken kami jadi palas guna ndahiken dahin kesaksin, persadan ras pe ngelai. I bas Tuhan Yesus isehken kami pertoto enda man baNdu Amin
5. DISKUSI
1) Kai sebabna Paulus notoken perpulungen i Epesus?
2) Kai sibanci ilakoken Saitun ibas dahin persadan, kesaksin, ras ngelai i tengah-tengh gereja?
Anding andingen
Monggal-onggal bagi calung mombak – iandingken man kalak siteridah tempa sibuk, tapi kai pe si idahikenna labo pernah lit ulihna.
Nukur uis nipes i Tigabinanga
Ku Bintang Meriah ku baba gula
Perlu mudes adi kita ersenina
Arus ka meriah ras anak beru